இந்தியாவுக்கு எதிரான மூன்று போட்டிகள் கொண்ட T20I தொடருக்கான 15 பேர் கொண்ட ஆப்கானிஸ்தான் அணியில் வேகப்பந்து வீச்சாளர் நவீன்-உல்-ஹக் சேர்க்கப்பட்டுள்ளார். இதன் மூலம் கிட்டத்தட்ட இரண்டு ஆண்டுகளுக்குப் பிறகு அவர் தேசிய அணிக்குத் திரும்பியுள்ளார்.
இந்திய அணிக்கெதிராக எதிர்வரும் செப்டம்பர் 13ஆம் திகதி டெல்லியில் ஆரம்பமாகவுள்ள T20I தொடரில், புதிய தலைவரான இப்ராஹிம் சத்ரான் தலைமையில் ஆப்கானிஸ்தான் அணி களம் இறங்குகிறது.
அறிவிக்கப்பட்டுள்ள இக்குழாத்தில் கடைசியாக 2024 டிசம்பரில் ஆப்கானிஸ்தான் அணிக்காக விளையாடிய நவீன்-உல்-ஹக், ஐக்கிய அரபு இராச்சியத்தில் நடைபெற்ற மேற்கிந்தியத் தீவுகளுக்கு எதிரான தொடர் மற்றும் அதைத் தொடர்ந்து இந்த ஆண்டின் ஆரம்பத்தில் நடைபெற்ற T20 உலகக் கிண்ணத் தொடர் ஆகியவற்றில் இடம்பெறவிருந்தார். இருப்பினும், வலது தோள்பட்டையில் ஏற்பட்ட அழுத்த முறிவு காரணமாக எட்டு மாதங்களுக்கும் மேலாக அவர் போட்டிகளில் பங்கேற்க முடியாமல் வெளியே இருந்தார்.
அதேவேளை, அண்மையில் அயர்லாந்துக்கு எதிராக நடைபெற்ற ஒருநாள் தொடரை ஆப்கானிஸ்தான் 4-0 என வெற்றி கொண்டது. இதில் கரீபியன் பிரீமியர் லீக் போட்டிகள் காரணமாகப் பங்கேற்காத சிரேஷ்ட சகலதுறை ஆட்டக்காரர் மொஹமட் நபி, தற்போது மீண்டும் வெள்ளைப் பந்து அணிக்குத் திரும்பியுள்ளார்.
- ஆப்கானிஸ்தான் T20I அணியின் தலைவர் பதவியில் இருந்து ரஷித் கான் நீக்கம்
- இலங்கை அணிக்காக சொனால் தினுஷ போராட்டம்
- பிரபாத் ஜயசூரியவின் செயலுக்கு ஐ.சி.சி. இன் ஒழுங்கு நடவடிக்கை
இதேவேளை, ரஹ்மானுல்லா குர்பாஸுக்கு அடுத்தபடியாக இரண்டாவது விக்கெட் காப்பாளராக, சர்வதேச போட்டிகளில் இதுவரை அறிமுகமாகாத விக்கெட் காப்பு துடுப்பாட்ட வீரரான நூர் உல் ரஹ்மான் அணியில் சேர்க்கப்பட்டுள்ளார். மேலும், T20 உலகக் கிண்ணத்தில் வாய்ப்பைத் தவறவிட்ட சுழல்பந்து வீச்சாளர் நங்கேலியா கரோட்டேவும் T20I குழாத்தில் இணைக்கப்பட்டுள்ளார்.
இதனிடையே, கடந்த மார்ச் மாதம் நிறைவடைந்த T20 உலகக் கிண்ணத் தொடருக்குப் பிறகு ஆப்கானிஸ்தான் அணி பங்கேற்கும் முதல் சர்வதேச T20I தொடர் இதுவாகும். உலகக் கிண்ணத்தில் ‘சுப்பர் 8’ சுற்றுக்குத் தகுதிபெறும் வாய்ப்பை ஆப்கானிஸ்தான் அணி இழந்ந்திருநதது. அத்தொடருக்குப் பிறகு, ரஷீத் கானுக்குப் பதிலாக இப்ராஹிம் சத்ரான் ஆப்கானிஸ்தான் அணியின் புதிய தலைவராக நியமிக்கப்பட்டார்.
ஆப்கானிஸ்தான் அணி இந்திய மண்ணில் இந்தியாவை எதிர்கொள்ளவுள்ளதுடன், அனைத்து மூன்று T20I போட்டிகளும் செப்டம்பர் 13, 15 மற்றும் 17 ஆம் திகதிகளில் முறையே டெல்லி அருண் ஜெட்லி மைதானத்தில் நடைபெறவுள்ளன.
இந்தியாவுக்கு எதிரான T20I தொடருக்கான ஆப்கானிஸ்தான் அணி:
இப்ராஹிம் சத்ரான் (தலைவர்), ரஹ்மானுல்லா குர்பாஸ், நூர் உல் ரஹ்மான், செடிகுல்லா அடல், தர்விஷ் ரசூலி, அஸ்மதுல்லா ஒமர்சாய், குல்பதின் நைப், மொஹமட் நபி, ரஷீத் கான், நங்கேலியா கரோட்டே, நூர் அஹமட், முஜீப் உர் ரஹ்மான், ஃபஸல்ஹக் ஃபரூக்கி, அப்துல்லா அகமத்சாய், நவீன்-உல்-ஹக்.
>>மேலும் கிரிக்கெட் செய்திகளைப் படிக்க<<
