இரண்டாவது கொலிபையர் மோதலுக்கு தெரிவாகியுள்ள கொழும்பு கேப்ஸ்

கொழும்பு ஆர். பிரேமதாச சர்வதேச மைதானத்தில் நேற்று (05) நடைபெற்று முடிந்திருக்கும் LPL 2026 தொடரின் எலிமினேட்டர் போட்டியில், கண்டி ரோயல்ஸ் அணியை 68 ஓட்டங்கள் வித்தியாசத்தில் வீழ்த்திய கொழும்பு கேப்ஸ் அணியானது அபார வெற்றியுடன் தொடரின் இரண்டாவது கொலிபையர் போட்டிக்கு முன்னேறியுள்ளது.

>>LPL 2026 தொடர்; முதல் இறுதிப் போட்டிக்கு தெரிவான ஜப்னா கிங்ஸ்<<

எலிமினேட்டர் போட்டியின் நாணய சுழற்சியில் வென்ற கொழும்பு கேப்ஸ் அணி முதலில் துடுப்பாட்டத்தினைத் தெரிவு செய்தது. அதன்படி களமிறங்கிய கொழும்பு அணிக்கு ஆரம்ப வீரர் பென் மெக்டெர்மோட் அதிரடியான அடித்தளம் அமைத்துக் கொடுத்தார். அவர் வெறும் 39 பந்துகளில் 7 சிக்ஸர்கள் மற்றும் ஒரு பௌண்டரி அடங்கலாக 71 ஓட்டங்கள் விளாசினார். பின்னர் மத்திய வரிசையில் அணித்தலைவர் கமிந்து மெண்டிஸ் 28 ஓட்டங்களும், ஜனித் லியனகே 32 ஓட்டங்களும் சேர்த்தனர். இறுதிநேர அதிரடி காட்டிய ஜேம்ஸ் நீஷம் வெறும் 23 பந்துகளில் 6 பௌண்டரிகள் மற்றும் 1 சிக்ஸர் அடங்கலாக 42 ஓட்டங்கள் குவித்து ஆட்டமிழக்காமல் இருக்க, கொழும்பு கேப்ஸ் அணி நிர்ணயிக்கப்பட்ட 20 ஓவர்களில் 7 விக்கெட் இழப்பிற்கு 203 ஓட்டங்கள் பெற்றது. கண்டி அணியின் பந்துவீச்சில் நுவான் துஷார, ஷஹீன் அப்ரிடி மற்றும் ஷகீர் கான் ஆகியோர் தலா 2 விக்கெட்டுகளைக் கைப்பற்றினர்.

>>WATCH – ஐந்தாவது தடவையாக இறுதிப்போட்டியில் ஜப்னா!; முன்னேறியது கொழும்பு! | LPL 2026<<

தொடர்ந்து 204 ஓட்டங்கள் என்ற கடின இலக்கை நோக்கிப் பதிலளித்த கண்டி ரோயல்ஸ் அணிக்கு தொடக்க வீரர் லஹிரு உதாரவினைத் தவிர யாரும் துடுப்பாட்டத்தில் கைகொடுக்கத் தவறினர்.

தொடர்ந்து கொழும்பு அணியின் துல்லியமான பந்துவீச்சை எதிர்கொள்ள முடியாமல் திணறிய கண்டி ரோயல்ஸ் அணி 18.4 ஓவர்களில் 135 ஓட்டங்களுக்கு அனைத்து விக்கெட்டுகளையும் இழந்து போட்டியில் படுதோல்வி அடைந்தது.

கண்டி ரோயல்ஸ் அணியின் துடுப்பாட்டத்தில் லஹிரு உதார 36 பந்துகளில் 50 ஓட்டங்கள் எடுத்திருக்க, கொழும்பு அணி சார்பில் வனுஜ சஹான், ஷாநவாஸ் தஹானி, முஜீபுர் ரஹ்மான், மல்ஷ தருபதி மற்றும் மிலன் ரத்னாயக்க ஆகியோர் தலா 2 விக்கெட்டுகளை வீழ்த்தி தமது தரப்பு வெற்றியினை உறுதி செய்தனர். போட்டியின் ஆட்டநாயகன் விருதினை கொழும்பு அணியின் வனுஜ சஹான் பெற்றுக் கொண்டார்.

>>மேலும் கிரிக்கெட் செய்திகளைப் படிக்க<<