இந்தியாவுக்கு எதிரான ஒருநாள் போட்டித் தொடருக்கான இங்கிலாந்து அணி அறிவிக்கப்பட்டுள்ளது. இதில், இங்கிலாந்தின் டெஸ்ட் கிரிக்கெட் எதிர்காலத்தைக் கருத்திற்கொண்டு, ஜேகப் பெத்தேல் ஆரம்பத் துடுப்பாட்ட வீரராக களமிறங்கவுள்ளார். இம்மாத இறுதியில் நடைபெறவுள்ள மூன்று போட்டிகள் கொண்ட இந்த ஒருநாள் தொடருக்கான இங்கிலாந்து அணியில், இதுவரை சர்வதேசப் போட்டிகளில் விளையாடாத ஜேம்ஸ் கோல்ஸ் மற்றும் ஜோஷ் டங் ஆகிய இருவருக்கு வாய்ப்பளிக்கப்பட்டுள்ளதுடன், கஸ் அட்கின்சன் மற்றும் சகிப் மஹ்மூத் ஆகியோரும் மீண்டும் ஒருநாள் அணிக்கு அழைக்கப்பட்டுள்ளனர்.
கடந்த ஆண்டு தொடக்கம் இங்கிலாந்து ஒருநாள் அணியின் ஆரம்பத் துடுப்பாட்ட வரிசையில் நிலையற்ற தன்மை நீடித்து வருகிறது. பென் டக்கெட்டுடன் ஏற்கனவே ஃபில் சோல்ட், ஜேமி ஸ்மித், ஸாக் க்ரௌலி மற்றும் ரெஹான் அஹ்மட் ஆகியோர் ஆரம்ப துடுப்பாட்ட வீரர்களாக பரீட்சித்துப் பார்க்கப்பட்டனர். இந்த வரிசையில் தற்போது 5ஆவது ஜோடியாக ஜேகப் பெத்தேல் டக்கெட்டுடன் களமிறங்கவுள்ளதாக கிரிக்இன்போ இணையதளம் செய்தி வெளியிட்டுள்ளது. 4ஆம் இலக்கத்தில் விளையாடி வந்த பெத்தேல், முன்னதாக இங்கிலாந்து 19 வயதுக்குட்பட்டோர் அணி மற்றும் இங்கிலாந்து லயன்ஸ் அணிகளின் ஆரம்பத் துடுப்பாட்ட வீரராக ஜொலித்தவர் என்பது குறிப்பிடத்தக்கது.
இங்கிலாந்தின் புதிய துடுப்பாட்ட வரிசையில் ஜோ ரூட், அணித்தலைவர் ஹெரி ப்ரூக் மற்றும் விக்கெட் காப்பாளர் ஜோஸ் பட்லர் ஆகியோர் முறையே 3, 4, 5 ஆகிய இலக்கங்களில் விளையாடுவார்கள் என எதிர்பார்க்கப்படுகிறது. டி20 உலகக் கிண்ணத்தில் சிறப்பான ஆட்டத்தை வெளிப்படுத்திய வில் ஜேக்ஸ் மத்திய வரிசையில் தொடர்ந்து விளையாடுவார். அணியின் சமநிலையைப் பேணுவதற்காக மேலதிக துடுப்பாட்ட வீரராக டொம் பென்டனை சேர்ப்பதா அல்லது மேலதிக பந்துவீச்சாளரைத் தேர்ந்தெடுப்பதா என்பதில் அணி நிர்வாகம் இன்னும் இறுதி முடிவு எடுக்கவில்லை.
- இங்கிலாந்து T20I அணிக்கு தலைவராகும் 21 வயது சகலதுறை வீரர்
- இலங்கை U19 குழாத்தில் இடம்பிடித்துள்ள மாதுளன், ஆகாஸ்
- மேற்கிந்திய தீவுகள் ஒருநாள் தொடருக்கான நியூசிலாந்து குழாம் வெளியீடு
வேகப்பந்து வீச்சைப் பொறுத்தவரை, கடந்த ஜனவரி மாதம் இலங்கைக்கு எதிரான தொடரில் ஓய்வளிக்கப்பட்டிருந்த ஜொஃப்ரா ஆர்ச்சர் மீண்டும் ஒருநாள் போட்டிக்குத் திரும்புகிறார். அதேபோல, அட்கின்சன், ஜோஷ் டங் மற்றும் காயத்திலிருந்து மீண்டுள்ள சகிப் மஹ்மூத் ஆகியோரின் வருகையால் இங்கிலாந்தின் வேகப்பந்து வீச்சுத் வரிசை பலமடைந்துள்ளது.
அதேவேளை, காயம் காரணமாக பிரைடன் கார்ஸ் மற்றும் ஜேமி ஓவர்டன் ஆகியோர் இத்தொடரைத் தவறவிட்டுள்ளனர். 2027 ஒருநாள் உலகக் கிண்ணத்தைக் இலக்காகக் கொண்டு சுழல்பந்து வீச்சாளர் லியாம் டோசன் அணியில் சேர்க்கப்பட்டுள்ளார்.
மறுபுறம், இந்திய அணியும் ரோஹித் சர்மா, ஜஸ்பிரித் பும்ரா மற்றும் விராட் கோலி (உடற்தகுதி அனுமதிக்கும் பட்சத்தில்) உள்ளிட்ட பலமான வீரர்களுடன் இத்தொடரை எதிர்கொள்ளவுள்ளது. இரு அணிகளுக்கும் இடையிலான 3 போட்டிகள் கொண்ட ஒருநாள் தொடர் ஜூலை 14 ஆம் திகதி எட்ஜ்பாஸ்டனில் ஆரம்பமாகவுள்ளதுடன், எஞ்சிய இரண்டு போட்டிகள் கார்டிஃப் (ஜூலை 16) மற்றும் லோர்ட்ஸ் (ஜூலை 19) மைதானங்களில் நடைபெறவுள்ளன.
இங்கிலாந்து ஒருநாள் குழாம் விபரம்:
ரெஹான் அஹ்மட், ஜொஃப்ரா ஆர்ச்சர், கஸ் அட்கின்சன், டொம் பென்டன், ஜேகப் பெத்தேல், ஹெரி ப்ரூக் (தலைவர்), ஜோஸ் பட்லர், ஜேமஸ் கோல்ஸ், சாம் கரண், லியாம் டோவ்சன், பென் டக்கெட், வில் ஜேக்ஸ், சகிப் மஹ்மூத், ஆடில் ரஷித், ஜோ ரூட், ஜோஷ் டங்.
>>மேலும் கிரிக்கெட் செய்திகளைப் படிக்க<<
