இலங்கை தேசிய கால்பந்து அணியின் தலைவரும், கோல் காப்பாளருமான சுஜான் பெரேரா, உட ன் அமுலுக்கு வரும் வகையில் சர்வதேச கால்பந்துப் போட்டிகளிலிருந்து ஓய்வு பெறுவதாக உத்தியோகபூர்வமாக அறிவித்துள்ளார்.
2011 ஆம் ஆண்டு முதல் 2026 ஆம் ஆண்டு வரையிலான தனது 15 ஆண்டுகால சர்வதேச கால்பந்துப் பயணத்தில் 68 சர்வதேசப் போட்டிகளில் விளையாடியுள்ள சுஜான் பெரேரா, இலங்கை அணியை மிக நீண்ட காலம் வழிநடத்திய தலைவர்களில் ஒருவராவார்.
நாட்டிற்காக மிகுந்த அர்ப்பணிப்புடன் விளையாடிய அவர், தனது ஓய்வு முடிவை இலங்கை கால்பந்து சம்மேளனத்தின் (FFSL) தலைவர் ஜஸ்வர் உமருக்கு எழுதிய கடிதத்தின் ஊடாக உத்தியோகபூர்வமாகத் தெரிவித்துள்ளார். அக்கடிதத்தில், தனது கால்பந்துப் பயணம் முழுவதும் தனக்கு வழங்கப்பட்ட ஆதரவுக்கும் ஊக்கத்திற்கும் சம்மேளனத்தின் தலைவருக்கும், இலங்கை கால்பந்து சம்மேளனத்திற்கும் அவர் தனது நன்றிகளைத் தெரிவித்துள்ளார்.
அடுத்த தலைமுறை கால்பந்து வீரர்களுக்கு முன்மாதிரியாகத் திகழ்ந்து, நாட்டிற்கு அவர் ஆற்றிய மகத்தான சேவையைப் பாராட்டும் வகையில், எதிர்வரும் 2027 மார்ச் மாதம் கொழும்பில் நடைபெறவுள்ள சர்வதேச கால்பந்துப் போட்டியொன்றின் போது சுஜான் பெரேராவிற்கு விசேட பாராட்டு மற்றும் பிரியாவிடை விழாவொன்று ஏற்பாடு செய்யப்படும் என சம்மேளனத் தலைவரின் அலுவலகம் அறிவித்துள்ளது.
இதேவேளை, சுஜான் பெரேராவின் ஓய்வுக்காலம் மகிழ்ச்சியாக அமைய தனது வாழ்த்துக்களைத் தெரிவித்துள்ள கால்பந்து சம்மேளனத்தின் தலைவர் ஜஸ்வர் உமர், அடுத்த தலைமுறை இலங்கை கோல் காப்பாளர்களுக்குத் தனது அனுபவத்தையும் அறிவையும் பகிர்ந்து கொள்ளும் வகையில், கோல் காப்பாளர் பயிற்றுவிப்பாளராக (Goalkeeper Coaching) எதிர்காலத்தில் பணியாற்றுவது குறித்துக் கவனம் செலுத்துமாறும் அவரை ஊக்குவித்துள்ளார்.






















