சுப்பர் லீக் கால்பந்து தொடரின் சுப்பர் சிக்ஸ் சுற்றின் இரண்டாவது போட்டியில் ப்ளூ ஸ்டார் அணியை 5-3 என்ற கோல்கள் கணக்கில் அப் கண்ட்ரி லயன்ஸ் அணி வீழ்த்தி வெற்றிபெற்றது.
கொழும்பு சுகததாஸ அரங்கில் நடைபெற்ற இந்தப் போட்டியில் 7ஆவது நிமிடத்தில் நவீன் ஜுட் பந்தினை பெனால்டி கட்டத்துக்கு வெளியிலிருந்து உள்ளே எடுத்துவந்து கோல் கம்பத்தின் வலதுபக்க கம்பத்தில் அடிக்க, பந்து கம்பத்தில் பட்டு கோலுக்குள் புகுந்தது.
>>ரினோனை வீழ்த்தி 9 வெற்றிகளுடன் சுப்பர் 6 சுற்றில் அப்கண்ட்ரி லயன்ஸ்<<
இதனை தொடர்ந்து 26ஆவது நிமிடத்தில் ப்ளூ ஸ்டார் அணியின் மத்திய பின்கள வீரர் மொஹமட் சுஹைப் பெனால்டி எல்லைக்கு வெளியிலிருந்து வேகமாக அடித்த பந்து கோலுக்குள் நுழைய போட்டி 1-1 என சமனாகியது.
மீண்டும் போட்டியில் முன்னிலை பெறுவதற்கான முயற்சியினை மேற்கொண்ட அப் கண்ட்ரி லயன்ஸ் அணிக்கு, பெஞ்சமின் யோர்க் இரண்டாவது கோலை 41ஆவது நிமிடத்தில் அடித்தார். பந்தினை எடுத்துச்சென்று யோர்க் பந்தினை கோலினை நோக்கி அடிக்க, கோல் காப்பாளர் பந்தினை தடுத்தார். எனினும், பந்து மீண்டும் யோர்க்கிடம் செல்ல அதனை கோலுக்குள் செலுத்தி அணியின் முன்னிலையை உறுதிசெய்தார்.
முதல் பாதி – அப் கண்ட்ரி எப்.சி 2 – 1 ப்ளூ ஸ்டார் வி.க
பின்னர் ஆரம்பித்த இரண்டாவது பாதியின் ஆரம்பத்தில் இரண்டு அணிகளும் கோலடிக்கவில்லை. எனினும் 66ஆவது நிமிடத்தில் பெனால்டி கட்டத்துக்குள் வைத்து மொஹமட் ஆகிப் கொடுத்த பந்தினை செனால் சந்தேஷ் கோலை நோக்கி அடிக்க, அதனை கோல் காப்பாளர் தடுத்தார். எனினும் அவரிடமிருந்து நழுவிச்சென்ற பந்தினை பெஞ்சமின் யோர்க் கோலுக்கு செலுத்தி அணியின் முன்னிலையை 3-1 என மாற்றினார்.
கோலடித்த சில நிமிடங்களில் (69ஆவது நிமிடம்) அப்துல் ரஹ்மான் யஹியா பெனால்டி கட்டத்துக்கு வெளியிலிருந்து வேகமாக அடித்த பந்து கோலுக்குள் புகுந்த நிலையில், முன்னிலை 4-1 என மாறியது. மீண்டும் கோல் காப்பாளரிடமிருந்து நழுவிய பந்தினை 76ஆவது நிமிடத்தில் பெஞ்சமின் யோர்க் கோலாக்கி, தன்னுடைய ஹெட்ரிக் கோலினை பதிவுசெய்தார்.
>>கொழும்பு எப்.சியை வீழ்த்தி எட்டாவது வெற்றியை பெற்ற அப்கண்ட்ரி லயன்ஸ்<<
எனவே 5-1 என்ற சிறந்த முன்னிலையை பெற்ற அப் கண்ட்ரி லயன்ஸ் அணி வெற்றியை நெருங்கியது. எனினும் 79ஆவது நிமிடத்தில் ஜெரி ஒம்பபே கொடுத்த பந்தினை மொஹமட் சஹலான் கோலடித்து ப்ளூ ஸ்டார் அணியின் கோல் எண்ணிக்கையை 2ஆக மாற்றினார். தொடர்ந்து கோலுக்காக போராடிய ப்ளூ ஸ்டார் அணியால் ஆட்டத்தின் 90+2 நிமிடத்தில் கோல் ஒன்றை பெற்றுக்கொள்ள முடிந்தது. ஜெரி ஒம்பபே இந்த கோலினை பெற்றுக்கொடுத்த போதும், போட்டியில் 5-3 என்ற கோல் கணக்கில் அப் கண்ட்ரி லயன்ஸ் அணி வெற்றிபெற்றது.
இதேவேளை சுப்பர் சிக்ஸின் முதல் போட்டியில் ரினோன் அணிக்கு எதிராக 2-0 என்ற கோல்கள் கணக்கில் ரெட் ஸ்டார் அணி வெற்றிபெற்றிருந்தமை குறிப்பிடத்தக்கது.
முழுநேரம் – அப் கண்ட்ரி எப்.சி 5 – 3 ப்ளூ ஸ்டார் வி.க
கோல் பெற்றவர்கள் – நவீன் ஜூட் 7, பெஞ்சமின் யோர்க் 41, 66, 76, அப்துல் ரஹ்மான் யஹியா 69, மொஹமட் சுஹைப் 26, மொஹமட் சஹலான் 79, ஜெரி ஒம்பபே 90+2
