தம்புள்ளை சர்வதேச கிரிக்கெட் மைதானத்தில் நடைபெற்ற லங்கா பிரீமியர் லீக் 2026 தொடரின் 8ஆவது போட்டியில், கோல் கெலன்ட்ஸ் அணியை 6 விக்கெட்டுக்கள் வித்தியாசத்தில் வீழ்த்தி தம்புள்ளை சிக்ஸர்ஸ் அணியானது அபார வெற்றி பெற்றுள்ளது.
>>இரண்டாவது வெற்றியுடன் LPL தொடரில் முன்னேறும் ஜப்னா கிங்ஸ்<<
இந்தப் போட்டியில் தோல்வியினைத் தழுவிய கோல் கெலன்ட்ஸ் இம்முறை LPL தொடரில் முதல் தோல்வியினை தழுவியிருக்கின்றமை குறிப்பிடத்தக்கது.
முன்னதாக இந்த மோதலில் தம்புள்ளை சிக்ஸர்ஸ் நாணய சுழற்சியில் வென்று முதலில் பந்துவீச்சைத் தெரிவு செய்தது. அதன்படி முதலில் துடுப்பாடத் தொடங்கிய கோல் கெலன்ட்ஸ் அணி 20 ஓவர்கள் நிறைவில் 8 விக்கெட் இழப்பிற்கு 178 ஓட்டங்கள் எடுத்தது.
கோல் கெலன்ட்ஸ் துடுப்பாட்டத்தில் சாமிக்க கருணாரட்ன அதிரடியாக துடுப்பாடி 30 பந்துகளில் 4 பௌண்டரிகள் மற்றும் 2 சிக்ஸர்களுடன் 45 ஓட்டங்கள் குவித்து அணியின் அதிகபட்ச ஓட்டங்களைப் பதிவு செய்தார். அதேநேரம் ஆரம்ப வீரர் சாம் ஹார்ப்பர் 22 பந்துகளில் 3 பௌண்டரிகள் மற்றும் 3 சிக்ஸர்களுடன் 40 ஓட்டங்கள் விளாசினார்.
தம்புள்ளை சிக்ஸர்ஸ் அணியின் பந்துவீச்சில் பசால்ஹக் ஃபரூக்கி 3 விக்கெட்டுகளையும், மார்க்ஸ் எக்கர்மேன் 2 விக்கெட்டுக்களையும் வீழ்த்தினார்.
தொடர்ந்து களமிறங்கிய தம்புள்ளை சிக்ஸர்ஸ் அணி போட்டியின் வெற்றி இலக்கான 179 ஓட்டங்களை 16.1 ஓவர்களில் 4 விக்கெட்டுக்களை மாத்திரம் இழந்து 180 ஓட்டங்களுடன் அடைந்தது.
தம்புள்ளை சிக்ஸர் துடுப்பாட்டத்தில் தென்னாபிரிக்க வீரர் ரீசா ஹென்ரிக்ஸ் மிகச்சிறப்பான ஆட்டத்தை வெளிப்படுத்தி வெறும் 37 பந்துகளில் 9 பௌண்டரிகள் மற்றும் ஒரு சிக்ஸருடன் 64 ஓட்டங்கள் பெற்று ஆட்டமிழக்காமல் அணியை வெற்றிப் பாதைக்கு அழைத்துச் சென்றார்.
கோல் பந்துவீச்சில் தசுன் ஷானக்க, மொஹமட் நவாஸ், எஷான் மாலிங்க மற்றும் சாமிக்க கருணாரட்ன ஆகியோர் தலா ஒரு விக்கெட் வீதம் கைப்பற்றியும் அது வீணாகியது. போட்டியின் ஆட்டநாயகனாக ரீசா ஹென்ரிக்ஸ் தெரிவாகியிருந்தார்.
>>மேலும் கிரிக்கெட் செய்திகளைப் படிக்க<<
