இலங்கை அணிக்கு எதிராக நடைபெறவுள்ள டி20 தொடருக்கான பாகிஸ்தான் மகளிர் அணிக்கு விக்கெட் காப்பு துடுப்பாட்ட வீராங்கனை முனீபா அலி தலைவராக நியமிக்கப்பட்டுள்ளார். இத்தொடரின் போது மகளிர் ‘ஹண்ட்ரட்’ தொடரில் பங்கேற்கவுள்ள பாகிஸ்தான் அணியின் வழக்கமான அணித்தலைவி பாத்திமா சனாவுக்கு பாகிஸ்தான் கிரிக்கெட் சபை அனுமதி வழங்கியுள்ளதால், அவருக்குப் பதிலாக முனீபா அலி அணியை வழிநடத்தவுள்ளார்.
இந்த டி20 தொடருக்கு முன்னதாக நடைபெறும் ஒருநாள் போட்டித் தொடருக்கு சனா தலைமை தாங்குவார். அதன் பின்னர், ‘ஹண்ட்ரட்’ தொடரில் விளையாடும் முதல் பாகிஸ்தான் வீராங்கனை என்ற பெருமையுடன் அவர் அந்தத் தொடரில் இணையவுள்ளார்.
முனீபா அலி இதற்கு முன்னர் 2024 ஆம் ஆண்டில் அவுஸ்திரேலிய அணிக்கு எதிரான ஒரு டி20 போட்டியில் பாகிஸ்தான் அணியை வழிநடத்தியுள்ளார். சமீபத்தில் நிறைவடைந்த டி20 உலகக் கிண்ணத் தொடரில் பாகிஸ்தான் அணி பங்கேற்ற 5 போட்டிகளில் 4 இல் தோல்வியடைந்து ஏமாற்றம் அளித்தது. நெதர்லாந்துக்கு எதிராகப் பெற்ற ஒரேயொரு வெற்றி மட்டுமே அந்தத் தொடரில் பாகிஸ்தானுக்குக் கிடைத்த ஆறுதலாகும். இந்த நிலையில், டி20 உலகக் கிண்ணத் தோல்வியைத் தொடர்ந்து தற்போதைய இலங்கைத் தொடருக்கான டி20 அணியில் பாகிஸ்தான் மகளிர் அணியில் பல அதிரடி மாற்றங்களை மேற்கொண்டுள்ளது.
- ஏழாவது தடவையாக ICC மகளிர் T20 சம்பியனாகியது அவுஸ்திரேலியா
- மகளிர் T20 உலகக் கிண்ண முதல் போட்டியில் இலங்கை தோல்வி
அந்த வகையில், டி20 உலகக் கிண்ணத் தொடரின் போது கடுமையான விமர்சனங்களுக்கு உள்ளான ஆலியா ரியாஸ் மற்றும் இரம் ஜாவேத் ஆகியோர் அணியிலிருந்து நீக்கப்பட்டுள்ளனர். அதேபோல, டி20 உலகக் கிண்ணத் தொடரில் ஒருசில போட்டிகளில் விளையாடிய டயானா பெய்க் ஒருநாள் மற்றும் டி20 ஆகிய இரண்டு தொடர்களுக்கான அணிகளிலும் சேர்க்கப்படவில்லை.
இதனிடையே, இலங்கைத் தொடருக்கான பாகிஸ்தான் குழாத்தில் 8 வீராங்கனைகளை புதிதாக பெயரிடப்பட்டுள்ளனர். இதில் டி20 போட்டிகளில் இதுவரை விளையாடாத 19 வயதுடைய துடுப்பாட்ட வீராங்கனைகளான ஈமான் நசீர், மஹாம் அனீஸ் மற்றும் சுழல்பந்து வீச்சாளர் மொமினா ரியாசத் ஆகியோர் முதல் முறையாக பாகிஸ்தான் டி20 அணியில் சேர்க்கப்பட்டுள்ளனர். அத்துடன் நஜிஹா அல்வி, உம்மு-ஏ-ஹானி மற்றும் வாஹீதா அக்தர் ஆகியோர் மீண்டும் அணிக்கு அழைக்கப்பட்டுள்ளனர்.
இலங்கை மற்றும் பாகிஸ்தான் மகளிர் அணிகளுக்கு இடையிலான 3 போட்டிகளைக் கொண்ட ஒருநாள் தொடர் ஜூலை 23 முதல் 28 வரையிலும், அதனைத் தொடர்ந்தான டி20 தொடர் ஜூலை 31 முதல் ஆகஸ்ட் 4 வரையிலும் நடைபெறவுள்ளன. இந்த 6 போட்டிகளும் ஹம்பாந்தோட்டையில் நடைபெறவுள்ளமை குறிப்பிடத்தக்கது.
பாகிஸ்தான் ஒருநாள் குழாம் விபரம்:
பாத்திமா சனா (தலைவர்), ஆயிஷா ஜாபர், குல் பெரோசா, மஹாம் அனீஸ், மொமினா ரியாசத், முனீபா அலி (விக்கெட் காப்பாளர்), நஜிஹா அல்வி, நஷ்ரா சுந்து, சதாஃப் ஷமாஸ், சாய்ரா ஜபீன், சித்ரா அமீன், சயீதா அரூப் ஷா, தஸ்மியா ருபாப், உம்மு-ஏ-ஹானி, வஹீதா அக்தர்.
பாகிஸ்தான் டி20 குழாம் விபரம்:
முனீபா அலி (தலைவர்,விக்கெட் காப்பாளர்), ஆயிஷா ஜாபர், ஈமான் நசீர், ஐமன் பாத்திமா, ஹம்னா பிலால், மஹாம் அனீஸ், மொமினா ரியாசத், நஜிஹா அல்வி, நஷ்ரா சுந்து, சாய்ரா ஜபீன், ஷவால்க் சுல்பிகர், தஸ்மியா ருபாப், துபா ஹசன், உம்மு-ஏ-ஹானி, வாஹீதா அக்தர்.
>>மேலும் கிரிக்கெட் செய்திகளைப் படிக்க<<
