CSK அணியின் தலைமை பயிற்சியாளர் பதவியிலிருந்து ஸ்டீபன் பிளெமிங் விலகல்

இந்தியன் பிரீமியர் லீக் (IPL) தொடரின் மிக வெற்றிகரமான மற்றும் நீண்ட கால கூட்டணிகளில் ஒன்றான சென்னை சுப்பர் கிங்ஸ் (CSK) மற்றும் அதன் தலைமை பயிற்சியாளர் ஸ்டீபன் பிளெமிங் இடையிலான 18 ஆண்டு கால பயணம் நிறைவுக்கு வந்திருக்கின்றது.

>>இங்கிலாந்து டெஸ்ட் பயிற்றுவிப்பாளர் பதவியிலிருந்து மெக்கலம் நீக்கம்<<

அந்தவகையில் CSK அணியின் தலைமை பயிற்சியாளர் பதவியிலிருந்து ஸ்டீபன் பிளமிங் பரஸ்பர புரிதலுடன் விலகுவதாக, CSK நிர்வாகம் உத்தியோகபூர்வமாக அறிவித்துள்ளது.

2008ஆம் ஆண்டு IPL முதல் பருவத்தில் CSK அணியின் வீரராகத் தனது பயணத்தைத் தொடங்கிய நியூசிலாந்து கிரிக்கெட் அணியின் முன்னாள் தலைவர் ஸ்டீபன் பிளமிங் சென்னை அணியில் வீரராக ஆடிய பின்னர் 2009ஆம் ஆண்டில் அதன் தலைமைப் பயிற்சியாளராகப் பொறுப்பேற்றார்.

பிளமிங் மற்றும் MS டோனி கூட்டணியின் கீழ், CSK அணியானது IPL தொடரில் சிறந்த பதிவுகளை வெளிக்காட்டிய ஓர் அணியாக உருவெடுத்திருந்தது

அந்தவகையில் 5 IPL வெற்றிக் கிண்ணங்கள், 2 சம்பியன்ஸ் லீக் கிண்ணங்கள் அடங்கலாக பிளமிங்கின் ஆளுகையிலான CSK அணியானது IPL தொடர்களில் 12 முறை பிளே-ஒப் சுற்றுகளுக்கும், 10 முறை இறுதிப்போட்டிகளுக்கும் முன்னேறியமை  குறிப்பிடத்தக்கவிடயமாகும்.

ஆனால் 2023ஆம் ஆண்டின் பின்னர் சென்னை சுப்பர் கிங்ஸ் மோசமாக IPL தொடர்களில் பிரகாசித்ததும், பிளமிங் பயிற்சி வழங்கிய சென்னை சுப்பர் கிங்ஸ் இன் சகோதர அணிகளான டெக்சாஸ் சுப்பர் கிங்ஸ் (MLC) மற்றும் ஜோபர்க் சுப்பர் கிங்ஸ் (SA20) ஆகியவை சிறந்த முடிவுகளை காட்டமை சென்னை சுப்பர் கிங்ஸ் உடனான பிளமிங்கின் பிரிவுக்கு காரணமாக அமைகின்றது.

CSK அணியில் இருந்து விலகுவது குறித்து கருத்து வெளியிட்ட பிளமிங், ”விளையாட்டு உலகில் 18 ஆண்டுகள் என்பது ஒரு வாழ்நாள் போன்றது. சென்னை சுப்பர் கிங்ஸ் அணியுடன் இருந்த காலம் எனது பயிற்சியாளர் வாழ்க்கையின் மிகச் சிறந்த பாக்கியம். CSK உடன் நான் இணைந்து பெற்ற மறக்க முடியாத வெற்றிகள் மற்றும் சவாலான தருணங்கள் எப்போதும் என் நினைவில் இருக்கும். CSK எப்போதும் என் இதயத்திற்கு நெருக்கமானதாக இருக்கும்” எனக் குறிப்பிட்டார்.

பிளமிங்கின் இந்த திடீர் விலகல் சென்னை சுப்பர் கிங்ஸ் இரசிகர்களிடையே பெரும் சோகத்தையும், IPL வட்டாரத்தில் ஒரு சகாப்தத்தின் முடிவாகவும் அமைகின்றது. எனினும் அடுத்த பருவத்தில் சென்னை அணியினை யார் வழிநடாத்துவார்கள் என்பது குறித்த உத்தியோகபூர்வ அறிவிப்புக்கள் எதுவும் இன்னும் வெளியாகவில்லை.

>>மேலும் கிரிக்கெட் செய்திகளைப் படிக்க<<