மேற்கிந்திய தீவுகள் அணிக்கு எதிரான இரண்டாவது ஒருநாள் சர்வதேச போட்டியிலும் இலங்கை மகளிர் கிரிக்கெட் அணி 14 ஓட்டங்களால் த்ரில் வெற்றி பெற்று, ஒருநாள் தொடரை இன்னும் ஒரு போட்டி மீதமிருக்க 2-0 எனக் கைப்பற்றியுள்ளது.
>>இலகு வெற்றியினை இங்கிலாந்துக்கு தாரைவார்த்த இலங்கை அணி<<
கிரனடாவில் நேற்று (22) ஆரம்பமாகிய இந்தப் போட்டியில் நாணய சுழற்சியில் வென்ற மேற்கிந்திய தீவுகள் மூலம் முதலில் துடுப்பெடுத்தாடப் பணிக்கப்பட்ட இலங்கை மகளிர் அணி சீரான இடைவெளிகளில் விக்கெட்டுக்களை இழந்து 47.1 ஓவர்கள் நிறைவில் அனைத்து விக்கெட்டுக்களையும் இழந்து 208 ஓட்டங்களைப் பெற்றுக்கொண்டது.
இலங்கை மகளிர் அணியின் துடுப்பாட்டத்தில் அதிகபட்சமாக விஷ்மி குணரட்ன அரைச்சதம் விளாசி 5 பௌண்டரிகள் அடங்கலாக 58 ஓட்டங்கள் பெற்றார். மேற்கிந்திய தீவுகள் அணியின் பந்துவீச்சில் கரீஷ்மா ராம்ஹரக் 26 ஓட்டங்களுக்கு 3 விக்கெட்டுக்களையும் ஹேலி மெதிவ்ஸ் மற்றும் எப்பி ப்ளச்சர் ஆகியோர் தலா 2 விக்கெட்டுக்கள் வீதமும் சுருட்டினர்.
தொடர்ந்து 209 ஓட்டங்கள் என்ற இலக்கை நோக்கிப் பதிலுக்குத் துடுப்பெடுத்தாடிய மேற்கிந்திய தீவுகள் மகளிர் அணிக்கு இலங்கை வீராங்கனைகள் ஆரம்பம் முதலே கடும் அழுத்தம் கொடுத்தனர். ஒரு கட்டத்தில் 119 ஓட்டங்களுக்கு 7 விக்கெட்டுக்களை இழந்து அவ்வணி தடுமாறிய போதும் ஜன்னிலியா கிளாஸ்கோவ் அரைச்சதம் பெற்று தனது தரப்பிற்காகப் போராடினார்.
எனினும் அவரது போராட்டம் வீணாக மேற்கிந்திய தீவுகள் மகளிர் 48 ஓவர்களில் அனைத்து விக்கெட்டுக்களையும் இழந்து 194 ஓட்டங்களுடன் போட்டியில் தோல்வியினைத் தழுவியது.
>>ஐ.சி.சி ஆடவர் T20 உலகக் கிண்ணம் 2026: நுழைவுச்சீட்டு பற்றிய முக்கிய அறிவிப்பு<<
மேற்கிந்திய தீவுகள் துடுப்பாட்டத்தில் ஜன்னிலியா கிளாஸ்கோவ் 50 ஓட்டங்களைப் பெற்றிருக்க இலங்கை மகளிர் பந்துவீச்சில் இனோக்கா ரணவீர மற்றும் சுஹந்திக்கா குமாரி ஆகியோர் தலா 3 விக்கெட்டுக்கள் வீதம் சாய்த்து தமது தரப்பு வெற்றியினை உறுதி செய்தமை குறிப்பிடத்தக்கது.
போட்டியின் ஆட்டநாயகியாக விஷ்மி குணரட்ன தெரிவாகியிருந்தார். இலங்கை மகளிர் அணியானது இந்த ஒருநாள் தொடரின் மூன்றாவது போட்டியில் புதன்கிழமை (25) ஆடுகின்றது.
>>மேலும் கிரிக்கெட் செய்திகளைப் படிக்க<<
