இலங்கையைச் சேர்ந்த இளம் கார்பந்தய நட்சத்திரமான யெவான் டேவிட், இத்தாலியின் மொன்சா காரோட்ட ஓடுபாதையில் கடந்த 19ஆம் திகதி நடைபெற்ற யூரோ ஃபோர்மியுலா பகிரங்க சம்பியன்ஷிப்பின் இறுதிச் சுற்றின் மூன்றாவது போட்டியில் முதலிடம் பிடித்தார்.
அதனுடன் ஒட்டுமொத்த போட்டித் தொடரின் இரண்டாவது இடத்தைப் பிடித்த அவர், போட்டித் தொடரின் சிறந்த புதுமுக ஓட்டுநருக்கான ‘ரூக்கீ’ விருதையும் வென்று சாதனை படைத்தார். இலங்கையைச் சேர்ந்த வீரொருவருக்கு ஃபோர்மியுலா போட்டிகள் வரலாற்றில் இத்தகைய வெற்றியும், விருதும் கிடைத்த முதல் சந்தர்ப்பம் இதுவாகும்.
16 சுற்றுகளைக் கொண்ட இந்தப் பந்தயத்தில் 27 நிமிடங்கள் 47.659 செக்கன்களில் போட்டியை நிறைவு செய்து, இலங்கைக்கான முதல் யூரோ ஃபோர்மியுலா விருதை வென்றெடுத்தார். அத்துடன், இது அவரது ஆறாவது வெற்றியாகும். மேலும், இந்த சாதனையுடன், அதிக வெற்றிகள் பெற்ற ஓட்டுநர்கள் பட்டியலில் போலந்தின் டிமெக் கஹார்செக்குடன் (Tymek Kucharczyk) முதலிடத்தைப் பகிர்ந்து கொண்டார்.
- இலங்கையை Formula 1 பந்தயத்தில் பிரதிநிதித்துவம் செய்வாரா யெவான் டேவிட்?
- உலக புகழ்பெற்ற Motopark அணியில் இணையும் யெவான் டேவிட்
இதனிடையே, ஒட்டுமொத்த புள்ளிகள் பட்டியலில், போலந்து ஓட்டுநர் டிமெக் கஹார்செக் 362 புள்ளிகளுடன் சம்பியன் பட்டத்தை கைப்பற்றியபோது, யெவான் டேவிட் 345 புள்ளிகளுடன் வெறும் 17 புள்ளிகள் வித்தியாசத்தில் இரண்டாவது இடத்தைப் பிடித்தார். கொரிய ஓட்டுநர் மைக்கேல் ஷின் 317 புள்ளிகளுடன் மூன்றாமிடத்தைப் பெற்றுக்கொண்டார்.
தனது முதல் யூரோ ஃபோர்மியுலா பருவத்திலேயே இத்தகைய சாதனை வெற்றியைப் பெற்றுள்ள 18 வயதான யெவான் டேவிட், அடுத்த ஆண்டு ஏப்ரல் மாதம் ஆரம்பமாகும் ஃபோர்மியுலா 3 பிரிவில் பங்கேற்க உள்ளார். இது இலங்கை மோட்டார் கார்ப்பந்தய விளையாட்டு வரலாற்றில் ஒரு மைல்கல் சாதனையாக கருதப்படுகிறது.
போட்டி தொடரின் முதல் நாளில், தனது காரில் ஏற்பட்ட விபத்தால் ஆறாம் இடத்துக்கு தள்ளப்பட்ட யெவான், இரண்டாவது நாளில் மீண்டு வந்து, உணர்ச்சிகரமான போட்டியில் இரண்டாம் இடத்தைப் பிடித்து அசத்தினார். மூன்றாவது நாளில் அவரது சிறப்பான செயல்திறன் அவரை சம்பியன்ஷிப்பின் உச்சத்துக்கு கொண்டு சென்றமை குறிப்பிடத்தக்கது.
அதேபோல், இந்தப் போட்டியில் ஏழு புதுமுக ஓட்டுநர்களை பின்னுக்குத் தள்ளி, சிறந்த புதுமுக ஓட்டுநருக்கான ‘ரூக்கீ’ விருதை வென்றமை இலங்கையருக்கு ஃபோர்மியுலா கார்ப்பந்தய போட்டிகளில் கிடைத்த முதல் பெரிய அங்கீகாரமாகும்.
>> மேலும் பல விளையாட்டு செய்திகளைப் படிக்க <<
