இலங்கைக்கு எதிரான இரண்டாவது டெஸ்ட் போட்டியில் தென்னாபிரிக்கா அணி 358 ஓட்டங்களை குவித்த போதும், பதிலுக்கு துடுப்பெடுத்தாடி வரும் இலங்கை அணி துடுப்பாட்ட வீரர்களின் பங்களிப்புடன் இரண்டாவது நாளில் ஆதிக்கம் செலுத்தி வருகின்றது.
இன்றைய நாளை 7 விக்கெட்டுகளை இழந்து 269 ஓட்டங்களை பெற்றிருந்த நிலையில் ஆரம்பித்த தென்னாபிரிக்கா அணியின் 8வது விக்கெட் விரைவாக வீழ்த்தப்பட்டது. கேஷவ் மஹாராஜ் ஓட்டங்களின்றி விஷ்வ பெர்னாண்டோவின் பந்துவீச்சில் ஆட்டமிழந்தார்.
எனினும் மறுபக்கம் அரைச்சதத்துக்காக களத்திலிருந்த கெயல் வெரைன், காகிஸோ ரபாடாவுடன் இணைந்து 9வது விக்கெட்டுக்காக மிகச்சிறந்த இணைப்பாட்டம் ஒன்றை பகிர்ந்தார்.
முதல் நாளில் இலங்கை அணியின் பௌன்ஸர் பந்துகளுக்கு தடுமாறிய இவர், இன்றைய தினம் அற்புதமாக ஆடி ஓட்டங்களை குவித்தார். மறுபக்கம் ரபாடா சிறந்த பங்களிப்பை வழங்கினார்.
ஒன்பதாவது விக்கெட்டுக்காக 59 ஓட்டங்களை இவர்கள் பகிர்ந்த நிலையில், அசித பெர்னாண்டோவின் பந்துவீச்சில் ரபாடா 23 ஓட்டங்களுடன் ஆட்டமிழக்க, இறுதி துடுப்பாட்ட வீரரான டேன் பெட்டர்சனுடன் இணைந்து தன்னுடைய மூன்றாவது சதத்தை கெயல் வெரைன் பதிவுசெய்தார்.
இறுதி விக்கெட்டுக்காக 33 ஓட்டங்கள் இணைப்பாட்டமாக பெறப்பட்ட நிலையில், டேன் பெட்டர்சன் ஆட்டமிழக்க, தென்னாபிரிக்கா அணி முதல் இன்னிங்ஸில் 358 ஓட்டங்களை பெற்றுக்கொண்டது. இறுதிவரை ஆட்டமிழக்காமல் துடுப்பெடுத்தாடிய கெயல் வெரைன் 105 ஓட்டங்களை பெற்றார். இலங்கை அணியின் பந்துவீச்சில் லஹிரு குமார 4 விக்கெட்டுகளையும், அசித பெர்னாண்டோ 3 விக்கெட்டுகளையும் வீழ்த்தினர்.
பின்னர் தங்களுடைய முதல் இன்னிங்ஸை ஆரம்பித்த இலங்கை அணி முதல் போட்டியை விட மிகவும் கவனத்துடன் நிதானமாக ஓட்டங்களை குவித்தது. முதல் விக்கெட்டுக்காக 41 ஓட்டங்கள் பகிரப்பட்ட போதும் திமுத் கருணரத்ன 20 ஓட்டங்களுடன் ரபாடாவின் பந்துவீச்சில் ஆட்டமிழந்தார். இந்த தொடரில் களமிறங்கிய மூன்று இன்னிங்ஸ்களிலும் ரபாடாவின் பந்துவீச்சில் ஆட்டமிழந்து வெளியேறியிருந்தார்.
திமுத் கருணாரத்னவை தொடர்ந்து பெதும் நிஸ்ஸங்க மற்றும் தினேஷ் சந்திமால் ஆகியோர் நேர்த்தியான இணைப்பாட்டம் ஒன்றை பெற்றனர். இருவரும் சத இணைப்பாட்டத்தை கடந்ததுடன், பெதும் நிஸ்ஸங்க அரைச்சதத்தை விளாசினார். இருவரும் 109 ஓட்டங்களை பெற்றிருந்த சந்தர்ப்பத்தில் 44 ஓட்டங்களை பெற்றிருந்த சந்திமால் ஆட்டமிழந்து அரைச்சதத்தை தவறவிட்டார்.
தொடர்ந்து அஞ்செலோ மெதிவ்ஸுடன் இணைந்து ஆடிய பெதும் நிஸ்ஸங்க 49 ஓட்டங்களை இணைப்பாட்டமாக பெற்று சதத்தை நெருங்கிய தருணத்தில் 89 ஓட்டங்களுடன் கேஷவ் மஹாராஜின் பந்துவீச்சில் ஆட்டமிழந்தார்.
இலங்கை 199 ஓட்டங்களுக்கு 3 விக்கெட்டுகளை இழந்திருந்த நிலையில், இறுதியாக ஜோடி சேர்ந்த மெதிவ்ஸ் மற்றும் கமிந்து மெண்டிஸ் ஆகியோர் இன்றைய ஆட்டநேர நிறைவுவரை விக்கெட்டினை விட்டுக்கொடுக்காமல் ஆடினர். இதில் மெதிவ்ஸ் 40 ஓட்டங்களையும், கமிந்து மெண்டிஸ் 30 ஓட்டங்களையும் பெற, இலங்கை அணி 3 விக்கெட்டுகளை இழந்து 242 ஓட்டங்களை பெற்றுள்ளது. அதுநேரம் தென்னாபிரிக்காவின் முதல் இன்னிங்ஸ் ஓட்டங்களை எட்ட இலங்கை அணி 116 ஓட்டங்களை பெற வேண்டும் என்பது குறிப்பிடத்தக்கது.