වෙස්ලි සහ බෙනඩික්වරුන්ගේ අරගලය

ජේම්ස් කාර්ට්මන් පියතුමන් අනුස්මරණය කරමින් ප්‍රදානය කරනු ලබන ශූරතා කුසලානය (James Cartman Trophy) වෙනුවෙන් කොළඹ වෙස්ලි විද්‍යාලය සහ කොටහේන ශාන්ත බෙනඩික්ට් විද්‍යාලය අතර පැවැත්වෙන වාර්ෂික මහා ක්‍රිකට් තරගය මාර්තු මස 31 වැනිදා සහ අප්‍රේල් මස 01 වැනිදා කොළඹ P. Sara Oval ක්‍රීඩාංගණයේ දී පැවැත්වේ.

දෙවිදුහල් අතර ක්‍රිකට් ඉතිහාසයේ ඔවුනොවුන් පළමු වරට වාර්ෂික මහා ක්‍රිකට් තරගයක දී හමුවෙන්නේ මීට වසර 129කට පෙර 1896 වසරේ දී. ඊට පසුව ඔවුන් නැවත හමුවෙන්නේ 2021 වසරේ දී දෙවිදුහල් ක්‍රිකට් ඉතිහාසය වසර 125ක් වෙද්දීයී. එලෙස වර්ණවත් වන දෙවිදුහල් අතර වාර්ෂික මහා ක්‍රිකට් තරග ඉතිහාසයේ ලත් එක ම ජයග්‍රහණය වාර්තා වන්නේ පසුගිය වසරේදීයි.

එහි දී මෙම වසරේ ද නායකත්වයේ කටයුතු කරමින් ශ්‍රී ලංකා වයස අවුරුදු 19න් පහළ ජාතික කණ්ඩායම ද නියෝජනය කරන ශාරුජන් ශම්මුගනාදන් විසින් එම ගෞරවය සාන්ත බෙනඩික්වරුන්ට ලබා දෙනවා.

මෙවර වෙස්ලි විද්‍යාලයීය නායකත්වය හිමි ඇත්තේ අනුග පහන්සර වෙතයි.

වෙස්ලි විද්‍යාලය

මෙවර තරගයට එක් වෙන වෙස්ලි විද්‍යාලයීය කණ්ඩායමේ වැඩිම ලකුණුලාභියා වෙන්නේ නායක අනුග පහන්සර. ඔහු මෙවර තරගාවලියේ දී තරග 14ක ඉනිම 16ක දී ලකුණු 589ක් ලබා ගැනීමට සමත් වෙනවා. ඒ අතර මොරටුව වේල්ස් කුමාර විද්‍යාලයට එරෙහි ව ලබා ගත් ලකුණු 144ක් සහ වත්තල සාන්ත අන්තෝනි විද්‍යාලයට එරෙහි ව නොදැවී ලබා ගත් ලකුණු 104ක් ද ඒ අතර වෙනවා.  කණ්ඩායමේ සිටින එක ම ශතකලාභියා ද වෙන්නේ අනුග පහන්සර.

ලිතුම් සෙනුජ තරග 12ක ඉනිම් 13ක දී අර්ධ ශතක 3ක් සමඟින් ලකුණු 400 සීමාව ඉක්මවා යමින් ද, රුක්ෂාන් තරංග තරග 13ක ඉනිම් 15ක දී අර්ධ ශතකයක් සමඟින් ලකුණු 350 සීමාව ද, සෙහඳු ආතාවුද තරග 14ක ඉනිම 17ක දී අර්ධ ශතකයක් සමඟින් ලකුණු 300ක් ඉක්මවා ලබා ගනිමින් ද මෙම කණ්ඩායම හා එක් වෙනවා.

පන්දු යැවීමේ දී දිනුජ වෙනුසර කඩුලු 45ක් ලබා ගනිමින් කණ්ඩායමේ වැඩිම කඩුලුලාභියා ලෙසින් මෙම තරගය හා එක් වෙනවා. මහනුවර සාන්ත සිල්වෙස්තර විද්‍යාලයට එරෙහි ව ලකුණු 32කට කඩුලු 6ක් දවා ගන්නා ඔහු එම තරගයේ දී ම දෙවැනි ඉනිමේ දී ද ලකුණු 42කට කඩුලු 4ක් දවා ගනිමින් තරගයේ දී කඩුලු 10ක් දවා ගනිමින් දක්ෂතා දක්වනවා.

ඊට අමතර ව දෙනුවන් නෙත්මල් කඩුලු 23ක් දවා ගනිමින් දක්ෂතා දැක් වූවා. ඊට අමතර ව නේමියන් පෙරේරා, ශ්‍රීරාම් ජීවහන් සහ සිතුක හංසිත් පන්දු යවන්නන් අතර විශ්වාසය දිනා සිටිනවා.

වෙස්ලි විද්‍යාලයීය වයස අවුරුදු 19න් පහළ ක්‍රිකට් කණ්ඩායම

අනුග පහන්සර (නායක), නදිල නෙත්මිත, දිමත් සුදර්ශන, දෙනුවන් නෙත්මල්, බිනෝත් සංදිල්, දුල්ශාන් නෙත්මිණ, ශේක්ඩ් ප්‍රනාන්දු, අනුක් පීරිස්, දෙව්මිතු සත්සිලු, සිතුක හංසිත්, දිනුල ඩිසොන්, ශ්‍රීරාම් ජීවහන්, ආද්‍යාන් සයින්, සෙහඳු ආතාවුද, මිනුක ඩයස්, දිනුජ වෙනුසර, ශම්මා ප්‍රනාන්දු, ලිතුම් සෙනුජ, ඒරන් අලි, අහමඩ් අල් නායන්, රශ්මික අමරරත්න, නේමියන් පෙරේරා, සෙනාල් වීරසේකර, රුක්ෂාන් තරංග, දෙනෙත් සිගේරා සහ කවිඳු අමරසිංහ.

 

නලින් නානායක්කාර (ක්‍රිකට් භාර ආචාර්ය), ඉම්රාන් තාහීර් (ප්‍රධාන පුහුණුකරු), ලක්ශාන් හේවගේ (පුහුණුකරු – ජ්‍යෙෂ්ට), තිනෙත් ජයසූරිය (Trainer).

• රුහුණු – මායාවරුන්ගේ රන් සිංහ ගැටුම
• ශ්‍රී ලංකා 19න් පහළ කණ්ඩායම ලෝක කුසලානයට පුහුණු කිරීමේ වගකීම චාමර සිල්වාට
• රන් කුසලානයට ගැටෙන පානදුර – මොරටුව
• තවත් අලුත් ක්‍රිකට් ලීගයක්?
• හිරුන් රාජකීයයන්ට ජය ගෙන එයි!

සාන්ත බෙනඩික්ට් විද්‍යාලය

සාන්ත බෙනඩික්ට් විද්‍යාලය නිමා වූ තරග සමයේ දී තරග 15කට සහභාගී වූව ද පූර්ණ ජයග්‍රහණයක් ලබා ගැනීමට හැකි වෙන්නේ නැහැ. එසේ වූවත් ගාල්ල රිච්මන්ඩ් විද්‍යාලය, කඳාන ද මැසිනෝද් විද්‍යාලය සහ බම්බලපිටිය සාන්ත පීතර විද්‍යාලයට එරෙහි ව පළමු ඉනිමේ ජයග්‍රහණ ලබා ගැනීමට ඔවුන් සමත් වෙනවා.

ඔවුන් මුහුණ දුන් තරග අතුරින් කොළඹ මහානාම විද්‍යාලය හමුවේ කඩුලු 10කිනුත් සහ කොළඹ සාන්ත ජෝසප් විද්‍යාලය හමුවේ ඉනිමක සහ ලකුණු 46ක පරාජයකටත් මුහුණ දීමට ඔවුන්ට සිදු වෙනවා. නිමා වූ තරග අතුරින් කොළඹ රාජකීය විද්‍යාලය සමඟ තරගය විසඳුමකින් තොරව අවසන් වෙන අතර අනෙක් තරග නිමා වෙන්නේ පළමු ඉනිමේ පරාජයන්ට මුහුණ පාමිනි.

කණ්ඩායමේ ක්‍රීඩකයන් අතුරින් වඩාත් බලාපොරොත්තු සහගත පිතිකරුවා වී ඇත්තේ ශාරුජන් ශම්මුගනාදන්. ඔහු තරග 13ක ඉනිම් 23ක දී ලකුණු 1148ක් ලබා ඇති අතර ඊට පසුගියදා බම්බලපිටියට සාන්ත පීතර විද්‍යාලයට එරෙහි ව නොදැවී වාර්තා කරන ලද ද්විත්ව ශතකයක් ද ඇතුලත්. එමෙන් ම ඊට තවත් ශතකයක් සහ අර්ධ ශතක 6ක් ද ඇතුලත් කර ගැනීමට ඔහු සමත් වෙනවා.

ඊට අමතර ව දිදුල එදිරිසූරිය තරග 15ක ඉනිම් 26ක දී ශතකයක් ද සමඟින් ලකුණු 484ක් ලබා ගෙන ඇති අතර මේ අතරට  ලකුණු 300 සීමාව පසුකිරීමට ක්‍රීඩකයන් තිදෙනක් ද ඇතුලත් වෙනවා.

ඒ ජනිඳු නන්දසේන තරග 14ක ඉනිම් 23ක දී ශතකයක් ද සමඟින් ලකුණු 379ක්, සමිඳූ පිරිස් තරග 13ක ඉනිම් 22ක දී ලකුණු 339ක් සහ ටෙහාන් බීටර් තරග 8ක ඉනිම් 14ක දී ලකුණු 303ක් ලෙසින් ලබා ගනිමිනුයි.   

කණ්ඩායමේ වැඩිම කඩුලුලාභියා වෙන්නේ උප නායක මෙවන් දිසානායක. ඔහු කඩුලු 48ක් දවා ගනිමින් දක්ෂතා දක්වනවා. ඊට අමතර ව අයේෂ් ගජනායක කඩුලු 21ක් දවා ගනිමින් එම ලැයිස්තුවේ 2 වැනි ස්ථානයට පත් වෙනවා.

මානික්‍ය දේශප්‍රිය, නිර්වාන් ජයතිලක, සමිඳු පීරිස් සහ දිනත් සෙනිල ද පන්දු යවන්නන් ලෙසින් දක්ෂතා දක්වා තිබෙනවා.

සාන්ත බෙනඩික්ට් විද්‍යාලයීය වයස අවුරුදු 19න් පහළ කණ්ඩායම

ශාරුජන් ශම්මුගනාදන් (නායක), මෙවන් දිසානායක (උප නායක), දුමිඳු යෙහෙන්, දිනත් සෙනිල, අයේෂ් ගජනායක, හරේන් ඔලගම, නඳුන් ප්‍රනාන්දු, දිදුල එදිරිසූරිය, මාරියෝ ප්‍රනාන්දු, ට්‍රිශාන් සිල්වා, මිහිල රවිශ්ක, යොහාන් එදිරිසිංහ, ටෙහාන් බිටර්, විහඟ රත්නායක, මානික්‍ය දේශප්‍රිය, ජනිඳු නන්දසේන, සමිඳු පීරිස්, අකේන් පෙරේරා, නිර්වාන් ජයතිලක සහ බුද්ධිම තරුපති.

 

ඩබ්ලිව්. එස්. ජනක් (ක්‍රිකට් භාර ආචාර්ය), අසංක වන්නිනායක (සහාය ක්‍රිකට් භාර ආචාර්ය), පෙම්ලාල් ප්‍රනාන්දු (ප්‍රධාන පුහුණුකරු), ප්‍රගීත් නිශාන්ත (සහාය පුහුණුකරු), ලාල් වික්‍රමතුංග (සම්බන්ධීකාරක).

සාන්ත බෙනඩික්ට් – වෙස්ලි විද්‍යාලාන්තර වාර්ෂික මහා ක්‍රිකට් තරගය සඳහා එක් වෙන දෙවිදුහල් හී ක්‍රීඩකයන්ට ThePapare.com හී සුබ පැතුම්!

 මෙම තරගයේ පන්දුවෙන් පන්දුව සජීවී අත්දැකීම් Dialog TV නාලිකා අංක 63 සුසර කර ගැනීමෙන් මෙන්ම, ThePapare 2, ThePapare.com සහ Dialog ViU App ඔස්සේ ද නැරඹීමට ඔබට පහසුකම් සපයා තිබෙනවා.

පාසල් වාර්ෂික මහා ක්‍රිකට් තරග උණුසුම සහ දෙස් විදෙස් ක්‍රීඩා පිටියේ උණුසුම් පුවත් ඔබ වෙත සමීප කිරීමට ThePapare සූදානම්, රැඳී සිටින්න ශ්‍රී ලංකාවේ අංක එකේ ක්‍රීඩා නාලිකාව ThePapare සමඟින්.

>> තවත් ක්‍රිකට් පුවත් සඳහා පිවිසෙන්න <<