තරග දිනවන්නන් සියල්ල Legendsලා නොවේ!

3397

නරක දිනයක දී ක්‍රිකට් ක්‍රීඩකයෙකුට සියල්ල නරකට හිටිය හැකිය. උඩපන්දු අත්හැරිය හැකිය. පිත්ත පන්දුවට යොමු නොවිය හැකිය. පන්දුව යවන්නට පෙර එය හරිහැටි ග්‍රහණය කරගන්නටවත් නොහැකි විය හැකිය. ඒ අවාසනාව ය.

හොඳ දිනයක දී ක්‍රිකට් ක්‍රීඩකයෙකු කරන වැරදි වුවද ඔහුට සාර්ථකත්වය ගෙන ආ හැකිය. අහක යන උඩ පන්දු පවා අතේ සිරවිය හැකිය. පිත්තේ කොනේ වදින පන්දු හතරේ සීමාවට ඇදී යා හැකිය. ෆුල්ටොස් පන්දුවලට ද කඩුලු ලැබිය හැකිය. ඒ වාසනාව ය.

එහෙත් ක්‍රිකට් ක්‍රීඩාවේ ජයග්‍රහණය සෑමවිටම රඳා පවතින්නේ වාසනාව මත නොවේ. ඊට තරග වෙනස් කළ හැකි ක්‍රීඩකයන් (Impact players) අත්‍යාවශ්‍ය ය.

කවුද මේ Impact Players ලා?

©ESPNcricinfo.com – අප දන්නා කාලයේ හොඳම තරග දිනවන්නන් දෙදෙනෙක් – මයිකල් බෙවන් සහ ඇන්ඩි බිකල්. 

තරගයක යම් නිශ්චිත මොහොතක දී ඊට බියගුළුව ක්‍රීඩා කරනවා වෙනුවට කිසිවෙකු නොසිතන නොපතන අයුරින් ක්‍රීඩා කොට ප්‍රතිවාදීන්ගෙන් තරගය උදුරාගන්නන් “තරග වෙනස් කරන්නන්” ලෙස හැඳින්විය හැකිය. ඔවුන් බොහෝ විට තරගයේ වීරයාසම්මානයෙන් පිදුම් ලබන්නේ නැත. ක්‍රිකට් පුරාවෘත්තඅතරට එක්වන්නේ ද නැත. තරගයේ ලකුණු සටහන දෙස බැලීමේ දී ඔවුන්ගේ නම් කැපී පෙනෙන්නේ ද නැත. ඔවුන්ගේ ලකුණු සාමාන්‍යයන් සිත්ගන්නා සුළු වන්නේ ද නැත. එහෙත් තරගයේ ගලා යෑම වෙනස් කරමින් තරගය තමන්ගේ පිල වෙතට හරවන්නේ ඔවුන් බව ක්‍රිකට් බුද්ධිය (Cricket sense) ඇත්තන් හොඳින් හඳුනයි.

තරග වෙනස් කරන්නන් යනු යම් ස්ථිර රාජකාරියක් සඳහා කණ්ඩායමේ සිටින්නන්ය. ඔවුන්ගේ රාජකාරිය දිනපතා පිත්තෙන් ලකුණු 100ක් වාර්තා කිරීම නොවේ. දිනපතා කඩුලු 5කින් දස්කම් දැක්වීම ද නොවේ. දිනපතා උඩපන්දු 2ක් 3ක් රැකගැනීම ද නොවේ. ඔවුන් තරගයට ලබා දෙන හැරවීම ගණිතයෙන් කියවිය නොහැක්කකි. ඇතැම් විට ඔවුන් ලබාගන්නා අවදානම නිසා තරගය පරාජය වෙන්නට ද සිදු විය හැකිය. ප්‍රේක්ෂකයන්ගෙන් නොඅඩුව බැනුම් අසන්නට ද සිදු විය හැකිය. ඒ ඔහුගේ රාජකාරියේ කොටසකි.

ක්‍රිකට් යනු කණ්ඩායම් ක්‍රීඩාවකි. පිතිකරුවන් හයදෙනාටම හෝ හත්දෙනාටම ශතක වාර්තා කළ නොහැකිය. පන්දු යවන්නන් පස්දෙනාටම හෝ හයදෙනාටම කඩුලු 5 බැගින් දවාලිය නොහැකිය. පන්දු රකින්නන් සියලු දෙනාටම උඩපන්දු දෙකක් හෝ තුනක් රැකගත නොහැකිය. කණ්ඩායම තුළ තමන්ගේ කොටස කුමක්ද, බර කුමක්ද, තමන්ගේ රාජකාරිය කුමක්ද යන්න වටහා ගැනීම අත්‍යාවශ්‍ය ය. “තරග වෙනස් කරන්නන්” විශේෂ වන්නේ මමත්වය පසෙකලා අනෙකා වෙනුවෙන් තරගයේ පීඩනය තමන් වෙතට ගෙන එය ප්‍රතිවාදියා වෙතට හරවා යවන්නන් ඔවුන් වන බැවිනි. තමන්ගේ කොටස අකුරටම ඉටුකරන්නන් ඔවුන් වන බැවිනි. ටෙස්ට් තරගවලට වඩා සීමිත පන්දුවාර තරගවලට “තරග වෙනස් කරන්නන්” අතිශයින්ම වැදගත් ය. ශ්‍රී ලංකාව එක්දින තරග ලොවේ ප්‍රබල කණ්ඩායමක් වූ හේතුව ඔබට පැහැදිලි ද?  

ක්‍රිකට් බුද්ධිය (Cricket sense) නැතිනම්?

ක්‍රිකට් බුද්ධිය යනු වෙනස් කියවීමකි.

මෑත කාලීනව සැබෑ ක්‍රිකට් ප්‍රේක්ෂකයන් ක්‍රිකට් ක්‍රීඩාවෙන් ඉවත් වී, “ගූගල් සොයන්නන්” වැඩි වශයෙන් ක්‍රිකට් ක්‍රීඩාව වෙත යොමු වී ඇති බව සමාජ ජාලා වෙත අවධානය යොමු කිරීමේ දී දැකගත හැක්කකි. ඔවුන්ට ක්‍රිකට් බුද්ධියක් නැතත් ඔවුන්ට ගණිත බුද්ධිය ඇත. ඔවුන් ක්‍රිකට් ක්‍රීඩාව මනින්නේ ගණිතයෙනි.

එබැවින් අනාගත ශ්‍රී ලංකා සමාජ ජාලා ක්‍රිකට් ප්‍රේක්ෂකයින් සනත් ජයසූරිය හටත් ඔහුගේ එක්දින ලකුණු සාමාන්‍යය (32.36) පදනම් කරගෙන උසුළු විසුළු කරන්නට පටන් ගතහොත් මම පුදුම නොවෙමි. එහෙත් ක්‍රිකට් බුද්ධිය ඇති අයට විහිළුවක් වන්නේ එසේ කරන්නන්ම ය. සනත් ජයසූරිය ක්‍රීඩා කරනු දුටු කෙනෙකුට, ඔහු ලකුණු 32ක සාමාන්‍යයකින් තරග දිනවූ හැටි දන්නා කෙනෙකුට, පවතින වර්තමානයම විහිළුවකි.

ක්‍රිකට් යනු මේසය මත පෑනෙන් කරන ගණන් හැදීමක් හෝ පරිගණක යතුරු පුවරුව මත කරන හරඹයක් නොවේ. ක්‍රිකට් ක්‍රීඩාවට ගණිත දත්තයන් වැදගත් නැතැයිම කියා කිව නොහැකිය. එහෙත් ක්‍රිකට් ක්‍රීඩාවේ දී වඩා වැදගත් වන්නේ ගණිත බුද්ධිය නොව, “ක්‍රිකට් බුද්ධිය (Cricket sense)”යි. 

තරග වෙනස් කළ හැක්කන් හඳුනා ගැනීම ක්‍රිකට් බුද්ධියේ කොටසකි. ක්‍රිකට් පරිපාලකයන්, පුහුණුකරුවන් සහ ප්‍රේක්ෂකයන් එසේ තරග වෙනස් කළ හැක්කන් හඳුනා නොගතහොත් වළට වැටෙන්නේ එරට ක්‍රිකට් ය. වචනයෙන් ඔවුන්ව පැහැදිලි කරනවාට වඩා පහසුවෙන් එවැනි ක්‍රීඩකයන් කිහිප දෙනෙකු හරහා එය පැහැදිලි කළ හැකිය. උදාහරණ සඳහා වැඩිදුර යා යුතු නැත. ශ්‍රී ලංකාවේ සිටි තරග වෙනසක් කරවන්නන් සිහිකරමු.

සනත් ජයසූරිය

සනත් 50ක් ගැහුවොත් මැච් එක දිනුම්” කියමන සැබෑ ක්‍රිකට් ප්‍රේමීන්ගේ පරම්පරාවේ සිටියවුන්ට සුපුරුදු වදනකි. එය අතිශයෝක්තියක් නොවේ. සනත්ට තණතීරුවේ ස්වභාවය වැදගත් නැත, පන්දු යවන්නන්ගේ නම් අදාළම නැත, ලකුණු පුවරුවේ පීඩනය ද අදාළම නැත. සනත් 50ක් ගැහුවොත් දිනනවාම ය. අතරින් පතර තරගයක් දෙකක් පැරදුනත් ප්‍රේක්ෂකයා දිනනවාම ය.

සනත්ට පන්දු යවන්නට ලැබුණු විට ද එසේමය. දිගු සබඳතා බිඳ හෙළන්නට ඔහු උපන් හපනෙකි. ලකුණු නැවැත්විය යුතුම මොහොතක දී ලකුණු නොදී පන්දු යවන්නට ද ඔහුට හැකිය. ඔහුගේ පන්දු රැකීම ද කිසිවකට දෙවෙනි නැත. බාග අවස්ථා, එනම් පන්දුව කෙළින්ම කඩුල්ලට එල්ල කොට දුවද්දී දවා ගැනීම්, අපහසු උඩපන්දු රැකගැනීම් වලින් ඔහු තරග දිනවූ වාර ගණන බොහොමයකි. සනත් ඔහුගේ දවසේ දී තරග දිනවන්නෙක් (Match winner on his day) පමණක්ම නොවේ. බොහෝ විට දස්කම් අතර සිටි සනත් ඕනෑම දිනයක තරගයක් දිනවිය හැක්කෙකි (Match winner on any day). ඒ වාසනාව නිසා නොව, ඔහුගේ රාජකාරිය ඔහු හඳුනාගත් නිසාය. සනත් යනු Impact player කෙනෙකි.

රොමේෂ් කලුවිතාරණ

ඔහු කඩුලු රකින පිතිකරුවෙකි. මැදපෙළ සිට ආරම්භක පිතිකරණය දක්වා උසස් වූයෙකි. ඔහුගේ එක්දින ලකුණු සාමාන්‍යය 22.22කි. වත්මන් සමාජ ජාලා ප්‍රේක්ෂකයන්ට අනුව බැලුවහොත් ඔහු දුර්වල පිතිකරුවෙකි. පිතිකරණයෙන් ඔහු තරග දිනවූ අවස්ථාවන් ගණන මද බව පිළිගත හැකිය. 

එහෙත් ඔහු සනත් ජයසූරිය සමඟ වේගයෙන් කඩුලු අතර දිවගොස් පීඩනය ප්‍රතිවාදීන් වෙත හරවා යැවූයෙකි. පිත්තෙන් ඉක්මන් ලකුණු 25ක් 30ක් ලබාගෙන, කඩුලු රැකීමෙන් නොතිබූ අවස්ථා ජනනය කළ හැකි ක්‍රීඩකයෙකි. ජිමික් කාරයෙකි‘. පිතිකරුවන් සමඟ කතා කොට ඔවුන්ගේ දුර්වලකම් පන්දු යවන්නාට සන්නිවේදනය කිරීමේ දක්ෂයෙකි.

1996 ලෝක කුසලාන අවසන් පූර්ව තරගයේ සචින් ටෙන්ඩුල්කාර්ගේ කඩුල්ල සහ එක්තරා ශ්‍රී ලංකා – ඕස්ට්‍රේලියා තරගයක ඩැරන් ලීමන්ගේ කඩුල්ල, ශ්‍රී ලංකා – කෙන්යා තරගයක දී සිදු කළ තවත් කපටි දවා ගැනීමක් ඇතුළු තරග කිහිපයක දී ඔහු විසින් ජනනය කළ තීරණාත්මක අවස්ථාවන් රැසක් අපගේ මතකයේ ඇත. එලෙස නැති අවස්ථා ජනනය කොට අවශ්‍යම කඩුලු බිඳ හෙලූ කලූ ද Impact player කෙනෙකි.

රසල් ආනල්ඩ්    

ශ්‍රී ලංකා පිතිකරණ ලැයිස්තුවේ අංක 6 ස්ථානය කලකට පෙර අයත්ව තිබුණේ අංක 69′ සහිත ජර්සිය පැළඳී මේ කෙට්ටු පිතිකරුවාට ය. පළමුවෙන් පන්දුවට පහර දෙන ඉනිම්වල ලකුණු තත්වය අවසන් පන්දු වාර කිහිපයේ දී වැඩි කරගැනීමේ විශේෂ හැකියාවක් සහිත වූ රසල්, හයේ පහරවල් එල්ල කළ ක්‍රීඩකයෙකු නොවේ. මැදපෙළ පිතිකරුවෙකු වශයෙන් අනිවාර්යයෙන්ම තිබිය යුතු හැකියාවක් වන දඟපන්දු යවන්නන්ට නිලකුණු පන්දු අඩුවෙන් ලබා දී ක්‍රීඩා කිරීමඔහුට හොඳින්ම කළ හැකිව තිබුණි. ස්වීප් පහර ඔහුගේ ප්‍රධාන අවියකි.

තරගයක දී ලකුණු 100ක් වාර්තා කිරීම ඔහුගේ රාජකාරිය නොවේ. තරගයේ ස්වභාවය අනුව මැදපෙළ සමඟ පන්දුවාර 15ක් 20ක් පුරාවට ඉක්මනින් ලකුණු රැස්කිරීම ඔහුගේ රාජකාරියයි. එය හොඳින් ඉටු කළ ආනල්ඩ්, පන්දු රැකීමෙන් ද ඉහළින්ම සිටි අයෙකි. එක ලකුණ, ලකුණු දෙක නවත්වා, අවශ්‍ය නම් පන්දු යැවීමෙන් ද පන්දුවාර 5ක් හෝ ඇතැම් විට 10ම හෝ යැවීමේ හැකියාව තිබූ ඔහු ඒ සියලු ආකාරයෙන්ම තරග ජයග්‍රහණය කර දී ඇත. ආනල්ඩ් ද Impact player කෙනෙකි.

ටී. එම්. ඩිල්ෂාන්

ඩිල්ෂාන් ආරම්භක පිතිකරුවෙකු වන්නට පෙර මැදපෙළ පිතිකරුවෙකි. එකල ඔහුගේ රාජකාරිය වූයේ නිදහසේ පන්දුවට පහර දීමයි. නමුත් ඔහු එය කළේ සිහි විකල් වූයෙකු ලෙස නොව හොඳින් සිහි ඇතිවෙකු ලෙස ය. ලකුණු 50ට කඩුලු 4ක් දැවී තිබියදීත්, ලකුණු 200කට කඩුලු 4ක් දැවී තිබියදීත් ඩිල්ෂාන් ක්‍රීඩා කළේ එකම ප්‍රවේගයකිනි.

2007 ලෝක කුසලාන අවසන් පූර්ව තරගයේ දී පළමුවෙන් පන්දුවට පහර දුන් ශ්‍රී ලංකාව, නවසීලන්තයට එරෙහිව පන්දුවාර 34ක දී ලකුණු 152කට කඩුලු 4ක් දැවී සිටියේය. පිටියේ සිටි මහේල ජයවර්ධන දැඩි පීඩනයකට හසුව සිටි අතර එතැන දී පිටියට පිවිසෙන ඩිල්ෂාන් පන්දු 27කින් ලකුණු 30ක් ලබාගෙන පීඩනය ඉවත් කළ අතර, ඉන් පන්නරය ගත් මහේල ශතකයක් වාර්තා කරමින් ලකුණු 289ක් දක්වා ශ්‍රී ලංකා ඉනිම ගෙන ගියේය.

සබඳතා බිඳ හෙළන්නෙකු ලෙස පන්දු යැවීමෙන් දස්කම් දැක්වූ ඩිල්ෂාන්, අත්‍යාවශ්‍යම කඩුලු දවා ගනිමින් ශ්‍රී ලංකාවට ජයග්‍රහණයේ මාවත විවර කළ අවස්ථා බොහොමයකි. පසුව ආරම්භක පිතිකරුවෙකු වූ ඔහු එහි දී ද තරග දිනවන්නෙකු විය. බාග අවස්ථා සාර්ථක කරගනිමින් දුවද්දී දවා ගැනීම් ලබා ගත් අති දක්ෂ පන්දු රකින්නෙකු ද වූ ඔහු සෑම ඉරියව්වකින්ම තරග දිනවූ Impact player කෙනෙකි.

උපුල් චන්දන

ශ්‍රී ලංකාවේ සිටි අතිදක්ෂ පන්දු රකින්නෙකි. පා දඟපන්දු යවන්නෙකු ලෙස ක්‍රීඩා කළ ද කණ්ඩායමට අවශ්‍යම වෙලාවල් වලදී ඔහු පන්දුවට පහර දීමෙන් ද ඉක්මන් ලකුණු වාර්තා කොට දී ඇත. ඇතැම් අවස්ථාවල ජයග්‍රහණයේ හෝ පරාජයේ වෙනස වන්නේ ඔහු විසින් ලබාගන්නා ඒ ඉක්මන් ලකුණු 25-30 විය. ප්‍රතිවාදී පිතිකරුවන් ස්ථාවර සබඳතාවයක නිරත වන්නේ නම්, ඔහුව දවා ගැනීමට කිසිසේත්ම හැකියාවක් ද නැතිනම් ඔහු වැනි පන්දු රකින්නන්ගේ වටිනාකම සබයට පැමිණේ. එවන් අවස්ථාවල කෙළින්ම පන්දුව කඩුල්ලට එල්ල කොට දුවද්දී දවා ගැනීම් ලබා ගත හැකි ඔහු ද Impact player කෙනෙකි.

ලසිත් මාලිංග

ශ්‍රී ලංකාවෙන් බිහි වූ අතිදක්ෂ පන්දු යවන්නන් අතර මුත්තයියා මුරලිදරන් සහ චමින්ද වාස් පෙරමුණේ සිටියි. ඔවුන් ඔවුන්ගේ රාජකාරිය සෑම දිනයක දී ම ඉතා හොඳින් හෝ සාමාන්‍ය අයුරින් හෝ ඉටු කළේය. චමින්ද වාස් පළමු පන්දුවාර කිහිපයේ දී සහ අවසන් පන්දුවාර කිහිපයේ දී කඩුලු දවාගත්තේය. 

මුරලි කඩුලු දෙකක් හෝ තුනක්, නැතිනම් හොඳම දිනයක දී ඊට වැඩි කඩුලු ගණනක් දවාගත්තේය. එකල ශ්‍රී ලංකාව දෙවනුව පන්දු යවමින් තරගයක් ජයගත්තේ නම් තරගය අවසන් පන්දු වාරය හෝ දෙක වෙත ඇදී යන අවස්ථා අඩු ය. ඉහත කී දෙදෙනා තරගයේ මැද දී ම ප්‍රතිවාදීන්ගේ හිස සිඳලීම ඊට හේතුවයි.

එහෙත් අවසානය තෙක් ඇදී යන තරගයක් උච්චතම ස්ථානයට පැමිණි විට තරගය ජයග්‍රහණය කිරීම සඳහා අවශ්‍ය පන්නයේ පන්දු යවන්නෙක් ලෙස ලසිත් මාලිංගව හැඳින්විය හැකිය. ඉතාම දැඩි පීඩනයක් මැද නිසි ඉලක්කයට නිලකුණු පන්දු යවමින්, නොඑසේ නම් පා ඇඟිලි තැලෙනසුළු යෝකර් පන්දු යවමින් තරගය වෙනස් කිරීමේ හැකියාව මාලිංගට තිබුණි. ඔහුට කෙතරම් පහර වැදී තිබුණ ද, තරගයේ අවසානයේ දී සියල්ල වෙනස් කිරීමේ හැකියාව ඔහුට තිබුණි. එබැවින් ඔහු ද Match winner කෙනෙකි.

අරවින්ද ද සිල්වා

පිත්තෙන්, පන්දුවෙන් හෝ පන්දු රැකීමෙන් යන ඕනෑම ක්‍රමයකින් තරග ජය ගැනීම දක්වා මෙහෙයවීමේ විශේෂ හැකියාවක් අරවින්ද සතු විය. ඔහු ද ඔහුගේ දිනයේ දී තරග දිනවන්නෙකු නොව, නිරන්තරයෙන් තරග දිනවන්නෙකි. අරවින්ද පිටියට පැමිණෙන විට කණ්ඩායම වැටී සිටින තැන හෝ නැග සිටින තැන ගැන කිසිසේත්ම සැලකිල්ලට නොගනියි. ඔහු ක්‍රීඩා කරන්නේ “ශ්‍රී ලංකාවේ ක්‍රිකට් සන්නාමය” (Sri Lankan brand of cricket) අනුව ය. එනම් දිගින් දිගටම ප්‍රතිවාදියා හා පොර බදන ක්‍රමයයි, සටන්කාමීත්වයයි.

තමන්ගේ දස්කම් විශ්වාස කළ අරවින්ද, ඊට සාධාරණය ඉෂ්ට කළේය. මුරලිදරන්, වාස් ඇතුළු සියල්ලන්ටම කඩුලු ලබා ගත නොහැකි නම්, අරවින්ද පන්දුව අතට ගනියි. නැතහොත් දුවද්දී දවා ගැනීමක් දෙකක් සාර්ථක කරගනියි. ඒ අරවින්ද Impact Player කෙනෙක් වූ නිසාය. 1996 ලෝක කුසලාන අවසන් පූර්ව තරගයේ දී පිත්තෙනුත්, අවසන් මහා තරගයේ දී තුන් ඉරියව්වෙනුත්, 2003 ලෝක කුසලාන අවසන් පූර්ව තරගයේ දී පන්දුවෙනුත්, 2002 ශූරයන්ගේ කුසලාන තරගාවලියේ දී පන්දුවෙන් සහ පිත්තෙනුත් තරග වෙනස් කළේ අන් කිසිවෙකු නොව අරවින්ද ය. ඔහු අනිවාර්යයෙන්ම මහා තරග සඳහා උපන් ක්‍රීඩකයෙකි‘ (Big match player). ශ්‍රී ලංකාවෙන් බිහි වූ හොඳම තරග දිනවන්නන් දෙදෙනා සනත් ජයසූරිය සහ අරවින්ද ද සිල්වා යැයි මෙහි සටහන් කළ හැකිය.

ලොවින් උදාහරණ

බාග අවස්ථාවන් සම්පූර්ණ බවට පෙරලාගැනීම.

ඉන්දියානු එක්දින කණ්ඩායමේ සිටි සුරේෂ් රෙයිනා, යුවරාජ් සිං, රවීන්ද්‍ර ජඩේජා එවැනි තරග වෙනස් කරන ක්‍රීඩකයන් ය. මැදපෙළින් පැමිණ පන්දු 25කට පමණ ලකුණු 35ක් 40ක් ලබාගෙන ප්‍රතිවාදීන්ට තරගයේ පීඩනය පැනවූ ඔවුන්, පන්දුවාර 5ක්  6ක් ලකුණු 25කට 30කට පමණ යවා පන්දුවාර වේගය ද ඉක්මන් කරයි. පන්දු රැකීමේ දී මේ දෙදෙනාම විශිෂ්ටයන් ය. ජොන්ටි රෝඩ්ස්ට අනුව ලොව දක්ෂතම පන්දු රකින්නා සුරේෂ් රෙයිනා ය. ඔවුන්ගෙන් බලාපොරොත්තු වන්නේ එපමණකි. එහෙත් ඔවුන් ඊට වඩා දස්කම් දක්වන සෑම විටකම තරගයේ ජයග්‍රහණය ඔවුන්ගේ කණ්ඩායම සතුවෙයි. හර්දීක් පාන්ඩ්යා එම ස්ථානය හොබවන වත්මන් ඉන්දීය ක්‍රීඩකයාය.

දකුණු අප්‍රිකානු කණ්ඩායමේ ජොන්ටි රෝඩ්ස්, ලාන්ස් ක්ලූස්නර්, ක්‍රිස් මොරිස්, ජේ.පී. ඩුමිනි එවැනි තරග වෙනස් කරන්නන් ය. ඕස්ට්‍රේලියාවේ ඇඩම් ගිල්ක්‍රිස්ට්, ඇන්ඩෲ සයිමන්ඩ්ස්, ග්ලෙන් මැක්ස්වෙල්, මාක්ස් ස්ටොයිනිස්, මයිකල් බෙවන්, ඇන්ඩි බිකල් එවැන්නන් ය.

නවසීලන්තයේ ක්‍රිස් හැරිස්, කෝරි ඇන්ඩර්සන්, කොලින් ඩි ග්‍රෑන්ඩ්හම් ඒ ගණයෙහි ලා සැලකිය හැකිය. එංගලන්තයේ පෝල් කොලින්ග්වුඩ්, බෙන් ස්ටෝක්ස්, ජේසන් රෝයි, ජොස් බට්ලර් එවැන්නන් ය. පාකිස්තානයේ අබ්දුර් රසාක්, ෂහීඩ් අෆ්රිඩි එවැන්නන් ය.

ශ්‍රී ලංකාවට තරග ජයග්‍රහණය කරන්නට නම් අත්‍යාවශ්‍යව ඇත්තේ ද අසාර්ථක වීම් අඩු, සාර්ථක වීම් වැඩි එවැනි තරග වෙනස් කරන්නන් වේ. භානුක රාජපක්ෂ, කමිඳු මෙන්ඩිස්, අශාන් ප්‍රියන්ජන්, දසුන් ශානක එසේ යොදාගත හැකි ක්‍රීඩකයන් ය.

වර්තමාන තරග දිනවන්නෙකුගේ විශිෂ්ටත්වය 

දැන් අපට තරග වෙනස් කළ හැකි ක්‍රීඩකයන් නැති තරමට අප පහතට වැටී තිබේ ද? එය බොහෝ දෙනාට ඇති ගැටලුවකි. අපි මාස කිහිපයක් පසුපසට අපගේ මතකය රැගෙන යමු.

2019 දකුණු අප්‍රිකාවට එරෙහි ටෙස්ට් තරගාවලියේ පළමු ටෙස්ට් තරගය ජය ගැනීම සඳහා කුසල් පෙරේරා ක්‍රීඩා කළ ඉනිම අති විශිෂ්ට එකක් බව සියලු දෙනාම පිළිගනියි. ඒ “සියලු දෙනාගෙන්” හරි අඩක්ම තරගය ජයග්‍රහණය කළ නිසා සතුටු වන්නන්ය. තවත් පිරිසක් කුසල් පෙරේරා නම් ක්‍රීඩකයාට ඇති ආලය නිසා එය විශිෂ්ට යැයි කියන්නන් ය. තවත් පිරිසක් එහි ගණිතමය විශේෂත්වය මත ඊට කැමති වූවන් ය.

එහෙත් කුසල්ගේ ජයග්‍රාහී ඉනිමේ දී ඔහු පන්දු ඕවර හැසිර වූ ආකාරය, පන්දු ඕවරයක අවසන් පන්දු කිහිපයේ දී ලබා ගත යුතු ලකුණු ප්‍රමාණය තීරණය කළ ආකාරය සහ පීඩනය පන්දු යවන්නන් වෙත තැබූ ආකාරය හසුකරගත හැක්කේ “ක්‍රිකට් බුද්ධියට”ය. “ක්‍රිකට් බුද්ධිය” ඇති ප්‍රේක්ෂක ප්‍රමාණය ද ක්‍රීඩකයන්ගේ ප්‍රමාණය ද පහත බසිමින් පවතින බව පුන පුනා කියමින්ම අපි කුසල්ගේ ඉනිම පැහැදිලි කරගනිමු.

Video – ක්‍රිකට් දේවත්වයට පත්වූ “ලිට්ල් මාස්ටර්” – Sachin Tendulkar

සචින් ටෙන්ඩුල්කාර් තරම් සුපිරි තරුවක් ක්‍රිකට් ක්‍රීඩාවේ තවත් සිටියේ නැත.

තරගය පැවැත්වුණේ ඩර්බන් හිදීයි. තරගයේ සිව්වැනි ඉනිමේ දී ලකුණු 304ක ඉලක්කයක් හඹා යමින් සිටි ශ්‍රී ලංකාව වෙත පන්දු යවමින් සිටි පන්දු බල ඇණිය මෙසේයි.

* තරගය පැවැත්වුණු 2019 පෙබරවාරි 16 දිනයට අනුව.

  • කගීසෝ රබාඩා (අංක 1 – ICC ටෙස්ට් පන්දු යවන්නන්ගේ ශ්‍රේණිගත කිරීම*)
  • වර්නන් ෆිලැන්ඩර් (අංක 4 – ICC ටෙස්ට් පන්දු යවන්නන්ගේ ශ්‍රේණිගත කිරීම*)
  • කේෂව් මහරාජ් (අංක 24 – ICC ටෙස්ට් පන්දු යවන්නන්ගේ ශ්‍රේණිගත කිරීම*)
  • ඩුවාන් ඔලිවියර් (අංක 25 – ICC ටෙස්ට් පන්දු යවන්නන්ගේ ශ්‍රේණිගත කිරීම*)
  • ඩේල් ස්ටෙයින් (අංක 26 – ICC ටෙස්ට් පන්දු යවන්නන්ගේ ශ්‍රේණිගත කිරීම*)

කුසල් පෙරේරා පිටියට පිවිසෙන විට ශ්‍රී ලංකාව ලකුණු 110කට කඩුලු 4කි. එක් අන්තයකින් කුසල් නිදහසේ ක්‍රීඩා කරද්දී අනෙක් අන්තයේ පිතිකරුවන් එකා බැගින් ක්‍රීඩාගාරය වෙත හැරී යන්නට විය. 9 වැනි කඩුල්ල ලෙස කසුන් රාජිත දැවී යන විට ශ්‍රී ලංකාව ජයග්‍රහණයට ලකුණු 78ක් පිටුපසිනි. ඔලිවියර් පන්දු යැවීමට පැමිණෙයි. පළමු පන්දු 3ම ඉවසා සිටින කුසල් මීළඟ පන්දුවේ දී ලකුණක් ලබාගෙන පැති මාරු කරගනියි.

කේෂව් මහරාජ් විසින් යවන මීළඟ පන්දු වාරයේ පළමු පන්දුවට හයේ පහරක් එල්ල කරන කුසල්, දෙවැනි පන්දුවේ දී ම පැති මාරු කරගනියි. ඔලිවියර්ගේ මීළඟ පන්දු වාරයේ දී ඔහු ලබාගන්නේ එක් ලකුණකි. ශතකය සඳහා අවශ්‍ය ලකුණු 5 මහරාජ්ගේ මීළඟ පන්දු වාරයේ දී ලබා ගන්නා කුසල්, නැවතත් ඔලිවියර් හමුවේ ආරක්ෂාකාරීව එක් ලකුණකින් සෑහීමකට පත්වේ. මේ සියල්ල ඔහු සිදු කරන්නේ අනෙක් පස සිටින අංක 10 පිතිකරුවා වූ විශ්ව ප්‍රනාන්දුව ආවරණය කරගනිමිනි. පන්දුව, ඕවර 78ක් පැරණිය. තවත් පන්දුවාර දෙකකින් නව පන්දුව පිටියට පැමිණේ. එක්දින ආරම්භක පිතිකරුවෙකු වන කුසල් එය සිහියේ තබාගෙන වේගය වැඩිකරයි.

මීළඟ පන්දුවාර කිහිපයේ දී ලකුණු වේගය වැඩිකරන කුසල් නිසා තම හොඳම පන්දු යවන්නන් දෙදෙනා කැඳවන්නට ප්‍රතිවාදී නායකයාට සිදු වේ. ලොව අංක එකේ ටෙස්ට් පන්දු යවන්නා වන කගීසෝ රබාඩා සහ වේගපන්දු පුරාවෘත්තයක් වන ඩේල් ස්ටෙයින් පන්දු යැවීමට පැමිණේ. ඔවුන්ට නව පන්දුව ද හිමි වේ.

Video – කඩුලු රකින සම්ප්‍රදාය මරා දැමූ විශේෂඥයා – Adam Gilchrist

ඇඩම් ගිල්ක්‍රිස්ට් නම් විශේෂඥ පිතිකරු සහ කඩුලු …….

කගීසෝ රබාඩා විසින් නව පන්දුවෙන් යැවෙන 82 වැනි පන්දුවාරයේ දී කුසල් විසින් වාර්තා කරන ලකුණු ප්‍රමාණය 6කි. ඊට වයිඩ් පන්දුවක් ද එක්වේ. ස්ටෙයින්ගේ මීළඟ පන්දු වාරයේ දී ද කුසල් විසින් හයේ පහරක් ඇතුළුව ලකුණු 7ක් වාර්තා වේ. ඊට තවත් අතිරේක ලකුණු 5ක් එක්වන්නේ ප්‍රතිවාදීන්ගේ පීඩනය වැඩි කරමිනි. රබාඩාගේ මීළඟ පන්දු වාරයේ දී හයේ පහරක් සමඟින් ලකුණු 8ක් වාර්තා කරන කුසල්, එක්දින ආරම්භක පිතිකරණයේ අත්දැකීම් මනාව යොදාගනිමින්, ඒ අතරම අංක 10 පිතිකරුවා රැකගනිමින් ක්‍රීඩා කරයි.

ඩේල් ස්ටෙයින් විසින් යවන 85 වැනි පන්දු වාරයේදීත් හයේ පහරක් ඇතුළුව ලකුණු 8ක් සොරාගන්නා කුසල්, 86 වැනි පන්දු වාරයේ දී තරගය විජයග්‍රාහීව අවසන් කරන්නේ 1996 අර්ජුන රණතුංග විසින් ග්ලෙන් මැක්ග්‍රාගේ පන්දුව තර්ඩ් මෑන් වෙතට තල්ලු කළ ආකාරයෙනි.

පසුව ක්‍රීඩාගාරය තුළ ඇතිවූ සිද්ධියක් මුල්කොටගෙන ප්‍රේක්ෂකයන්ට මේ විශිෂ්ට ඉනිම අමතකව ගියත්, විමසිල්ලෙන් තරගය නැරඹූ සියලු දෙනාටම අදටත් එය හොඳින් මතක ඇතැයි සිතමි.

මෙය මෙතරම් පැහැදිලි කරන්නට වූයේ ක්‍රිකට් පිතිකරණය කෙතරම් බුද්ධිමත්ව කළ යුතු ද, පීඩනය මැද එය කළ හැකි පිතිකරුවන් අපට සිටිනවා ද නැද්ද යන්න පැහැදිලි කිරීමටයි. කුසල් පෙරේරාගේ ඒ ඉනිම ලෝක ක්‍රිකට් ඉතිහාසයේ විශිෂ්ටතම ටෙස්ට් ඉනිම්වලින් එකක් යැයි කියන්නේ එබැවිනි. එය කුසල් විසින් තමන් “තරගයක් වෙනස් කළ හැකි පිතිකරුවෙක්” බව මුළු ලොවටම ඔප්පු කර පෙන්වූ අවස්ථාවකි.

ඔවුන්ට ඒ හැකියාව තිබේ. ප්‍රශ්නය නම් එකක් දෙකක් වැරදුණු විට නැති පීඩනයක් ඔවුන් මත පැටවීමයි. ඔවුන්ට වැරදි නිවැරදි කරගෙන ඉහළට එන්නට අවශ්‍ය පරිසරය නිර්මාණය කර නොදීමයි. එනම් ක්‍රීඩක කළමනාකරණයක් නොමැතිකමයි. වත්මන් එක්දින ක්‍රිකට් ක්‍රීඩාවට එය අත්‍යාවශ්‍ය ය. මන්ද යත්, නූතන ක්‍රිකට් ක්‍රීඩාව රඳා පවතින්නේ තරග වෙනස් කරන්නන් මත වීමයි.

සචින් ටෙන්ඩුල්කාර්ලා සයදෙනෙකුට එකම කණ්ඩායමේ ක්‍රීඩා කළ නොහැකිය. අරවින්ද වැනි සයදෙනෙකු කණ්ඩායමකට තොරාගන්නේ ද නැත. ඒ, ක්‍රිකට් ක්‍රීඩාව කණ්ඩායම් ක්‍රීඩාවක් වන බැවිනි. එය කණ්ඩායමක වෙනස් ක්‍රීඩකයන් විසින් වෙනස් රාජකාරි ඉටු කිරීම මඟින් එක් ජයග්‍රහණයක් ලබා ගන්නා ක්‍රීඩාවකි. “තරග වෙනස් කරන්නා” යන ස්ථානය එහි වැදගත් ස්ථානයකි.

සනත් කෑගහන්නේ මොකද? – තෙවැනි ඇසින්

සනත් ජයසූරිය ගැන අප කොතෙකුත් කතා අසා ඇතත්……..

එය කෙතරම් වැදගත් දැයි වටහා ගැනීමට අවශ්‍ය නම් ඔබ 1996 ලෝක කුසලානයේ අරවින්ද සහ සනත්ගේ දස්කමුත්, 1999 ලෝක කුසලානයේ මයිකල් බෙවන්ගේ දස්කමුත්, 2003 ලෝක කුසලානයේ ඇන්ඩෲ සයිමන්ඩ්ස්ගේ දස්කමුත්, 2007 ලෝක කුසලානයේ ටී. එම්. ඩිල්ෂාන්ගේ / චාමර සිල්වාගේ දස්කමුත්, 2011 ලෝක කුසලානයේ යුවරාජ් සිංගේ දස්කමුත්, 2015 ලෝක කුසලානයේ ග්ලෙන් මැක්ස්වෙල්ගේ දස්කමුත් හොඳින් අධ්‍යයනය කළ යුතුය. තරග වෙනස් කිරීම කලාවකි, එහෙත් එහි පිකාසෝලා ලෙජන්ඩ්ස්ලා වන්නේ නැත. විය යුතු ද නැත.

>> තවත් විශේෂාංග ලිපි සඳහා පිවිසෙන්න <<