ஹர்ஷிதாவின் பொறுப்பான ஆட்டத்தால் இலங்கை மகளிருக்கு ஹெட்ரிக் வெற்றி

துபாயில் நடைபெற்றுவரும் மகளிர் டி20 ஆசியக் கிண்ணத் தொடரில் நேற்று (06) நடைபெற்ற பங்களாதேஷ் மகளிர் அணிக்கு எதிரான போட்டியில் 4 விக்கெட்கள் வித்தியாசத்தில் இலங்கை மகளிர் அணி வெற்றியீட்டி அரை இறுதியில் விளையாட தகுதி பெற்றது.

துபாய் சர்வதேச கிரிக்கெட் மைதானத்தில் நடைபெற்ற இப்போட்டியில் முதலில் துடுப்பெடுத்தாடிய பங்களாதேஷ் அணி, இலங்கை பந்துவீச்சாளர்களின் துல்லியமான பந்துவீச்சை எதிர்கொள்ள முடியாமல், நிர்ணயிக்கப்பட்ட 20 ஓவர்களில் 8 விக்கெட்டுகளை இழந்து 114 ஓட்டங்கள் மட்டுமே எடுத்தது.

அந்;த அணி சார்பில் சோபனா மோஸ்தரி 34 ஓட்டங்களையும், டிலாரா அக்தர் 26 ஓட்டங்களையும், ஜுஐரியா பிர்தௌஸ் 14 ஓட்டங்னகளையும் அதிகபட்சமாக எடுத்தனர்.

இலங்கை அணி சார்பில் அபாரமாக பந்துவீசிய இடதுகை சுழல்பந்து வீச்சாளர் சமோதி பிரபோதா 21 ஓட்டங்களை விட்டுக்கொடுத்து 3 விக்கெட்டுகளைக் வீழ்த்தினார். இது சர்வதேச டி20 போட்டிகளில் அவரது சிறந்த பந்துவீச்சு பதிவாகும் மற்றொரு இடதுகை சுழல்பந்து வீச்சாளரான சுகந்திகா குமாரி 22 ஓட்டங்களுக்கு 2 விக்கெட்களைக் கைப்பற்றி சிறப்பான பங்களிப்பை வழங்கினார்.

• சேத்தனா, மிதாலி, சமரியின் அதிரடியில் இலங்கை மகளிருக்கு முதல் வெற்றி
• சமரியின் சாதனை பந்துவீச்சினால் இலங்கைக்கு மகளிருக்கு 2ஆவது வெற்றி

இதனையடுத்து 115 ஓட்டங்கள் எடுத்தால் வெற்றி என்ற இலக்குடன் களம் இறங்கிய இலங்கை மகளிர் அணி, முதல் 10 ஓவர்களுக்குள் 44 ஓட்டங்களுக்கு 5 விக்கெட்டுகளை இழந்து கடும் நெருக்கடிக்கு உள்ளானது.

இருப்பினும், நெருக்குதலான சூழலில் உறுதியுடன் களத்தில் நின்ற ஹர்ஷிதா சமரவிக்ரம, இலங்கை அணியை வெற்றிப் பாதைக்கு அழைத்துச் சென்றார். 37 பந்துகளில் 4 பவுண்டரிகள் மற்றும் 2 சிக்ஸர்களுடன் ஆட்டமிழக்காமல் 48 ஓட்டங்களைக் குவித்த அவர், அணியின் கடினமான வெற்றிக்கு வித்திட்டார்.

பங்களாதேஷ் அணியின் பந்துவீச்சில் மருஃபா அக்தர் அக்தர் 21 ஓட்டங்களுக்கு 3 விக்கெட்களை வீழ்த்தினார்.

போட்டியின் ஆட்டநாயகியாக ஹர்ஷிதா சமரவிக்ரம தெரிவானார்.

இந்த வெற்றியின் மூலம் எதிர்வரும் 11ஆம் திகதி நடைபெறவுள்ள 2ஆவது அரை இறுதிப் போட்டியில் விளையாட இலங்கை மகளிர் அணி தகுதி பெற்றது.

போட்டிச் சுருக்கம்

பங்களாதேஷ் மகளிர் அணி – 114/8 (20 ஓவர்கள்) சோபனா மோஸ்தரி 34, டிலாரா அக்தர் 26. சமோதி பிரபோதா 3/21, சுகந்திகா குமாரி 2/22

 

இலங்கை மகளிர் அணி – 115/6 (19.2 ஓவர்கள்) ஹர்ஷிதா சமரவிக்ரம 48*, மருஃபா அக்தர் 3/21

 

முடிவு – இலங்கை மகளிர் அணி 4 விக்கெட்கள் வித்தியாசத்தில் வெற்றி

>>மேலும் கிரிக்கெட் செய்திகளைப் படிக்க<<