இங்கிலாந்து U19 மகளிர் அணியை சுழலில் வீழ்த்திய இலங்கை

அவுஸ்திரேலியாவில் நடைபெற்று வரும் மகளிருக்கான இளையோர் முக்கோண T20I தொடரில், இன்று (12) நடைபெற்ற இங்கிலாந்து அணிக்கு எதிரான 2ஆவது போட்டியில் இலங்கை 19 வயதுக்குட்பட்ட மகளிர் அணி 8 ஓட்டங்களினால் த்ரில் வெற்றியைப் பதிவு செய்துள்ளது.

கோல்கோஸ்ட்டில் உள்ள பில் பிப்பேன் ஓவல் மைதானத்தில் நடைபெற்ற இப்போட்டியில் நாணய சுழற்சியில் வெற்றி பெற்ற இலங்கை 19 வயதுக்குட்பட்ட மகளிர் அணி முதலில் துடுப்பெடுத்தாட தீர்மானித்தது. இதன்படி களமிறங்கிய இலங்கை அணி, நிர்ணயிக்கப்பட்ட 20 ஓவர்கள் நிறைவில் 6 விக்கெட் இழப்பிற்கு 136 ஓட்டங்களைப் பெற்றுக்கொண்டது.

இலங்கை அணியின் ஆரம்ப துடுப்பாட்ட வீராங்கனை சஞ்சனா காவிந்தி அபாரமான ஆட்டத்தை வெளிப்படுத்தி 33 பந்துகளில் 45 ஓட்டங்களை (5 பவுண்டறிகள், 2 சிக்ஸர்கள்) விளாசினார். இவருக்குப் பக்கபலமாக இருந்த நெதாகி இசுராஞ்சலி 25 ஓட்டங்களைப் பெற்றார்.

• இலங்கை இளையோர் மகளிர் அணியை வழிநடத்தும் சமோதி
• சகலதுறையிலும் பிரகாசித்த இலங்கை 19 வயதின் கீழ் மகளிர் அணிக்கு முதல் வெற்றி 
• அசேனியின் 5 விக்கெட் குவியல் வீண்: ஆஸியிடம் போராடித் தோற்றது இலங்கை U19 மகளிர் அணி

137 ஓட்டங்கள் என்ற வெற்றி இலக்கை நோக்கிப் பதிலுக்குத் துடுப்பெடுத்தாடிய இங்கிலாந்து 19 வயதுக்குட்பட்ட மகளிர் அணி, ஆரம்பம் முதல் இலங்கை அணியின் பந்துவீச்சை எதிர்கொள்ள திணறியது. அந்த அணி 19.2 ஓவர்களில் அனைத்து விக்கெட்டுகளையும் இழந்து 128 ஓட்டங்களை மாத்திரமே பெற்றுக்கொண்டது.

இலங்கை அணியின் சுழல்பந்து வீச்சாளர்கள் இந்த வெற்றியில் முக்கிய பங்கு வகித்தனர். குறிப்பாக லிமன்சா திலகரட்ன மற்றும் சமோதி ப்ரபோதா ஆகியோரின் துல்லியமான பந்துவீச்சினால் இங்கிலாந்து அணியின் விக்கெட்டுகள் சரிந்தன. இவர்கள் இருவரும் தலா 3 விக்கெட்டுகளைக் கைப்பற்றி வெற்றியை உறுதி செய்தனர். மேலும், அசேனி தலகுனே 2 விக்கெட்டுகளை வீழ்த்தினார்.

இந்த முக்கோண T20I தொடரில் இலங்கை 19 வயதுக்குட்பட்ட மகளிர் அணி தனது அடுத்த போட்டியில் நாளை (13) அவுஸ்திரேலியாவை எதிர்கொள்ளவுள்ளது.

போட்டியின் சுருக்கம்

இலங்கை U19 மகளிர் அணி: 136/6 (20 ஓவர்கள்) – சஞ்சனா காவிந்தி 45, நெதாகி இசுhரஞ்சலி 25. (வீனஸ் வீரப்புலி 2/19)

 

இங்கிலாந்து U19 மகளிர் அணி: 128 (19.2 ஓவர்கள்) – ஜெனிவீவ் ஜீர் 23, பீ வில்லிஸ் 21. (லிமன்சா திலகரட்ன 3/26, சமோதி ப்ரபோதா 3/32, அசேனி தலகுனே 2/17)

 

முடிவு: இலங்கை 19 வயதுக்குட்பட்ட மகளிர் அணி 8 ஓட்டங்களால் வெற்றி

>>மேலும் கிரிக்கெட் செய்திகளைப் படிக்க<<