17න් පහළ Youth ශූරතාව Colombo North කණ්ඩායමට

U 17 Sri Lanka Youth League 2025

4

ශ්‍රී ලංකා ක්‍රිකට් සංවිධානය කරන වයස අවුරුදු 17න් පහළ Sri Lanka Youth League එක්දින සීමිත පන්දුවාර ක්‍රිකට් තරගාවලියේ ශූරයන් බවට පත් වීමට Colombo North U 17s කණ්ඩායම සමත් වූවා.  

අද (29) ගාල්ල ජාත්‍යන්තර ක්‍රිකට් ක්‍රීඩාංගණයේ දී නිමා වූ අවසන් තරගයේ ප්‍රතිවාදීන් බවට පත් වූයේ Colombo South U 17s කණ්ඩායමයි.  

මීට පෙර පසුගිය ජුනි මාසයේ දී නිමා වූ වයස අවුරුදු 19න් පහළ Sri Lanka Youth League එක්දින සීමිත පන්දුවාර ක්‍රිකට් තරගාවලියේ දී ද මෙම කලාප කණ්ඩායම් ම අවසන් මහා තරග සඳහා සහභාගී වූ අතර එහි දී ද ජයග්‍රහණය හිමි වූයේ Colombo North කණ්ඩායමටයි.  

මෙම තරගයේ කාසියේ වාසිය ජයග්‍රහණය කළ Colombo South U 17s ක්‍රීඩකයෝ පළමුවෙන් පන්දුවට පහර දීමේ අවස්ථාව ප්‍රතිවාදී Colombo North U 17s කණ්ඩායම සතු කළා. ඒ අනුව පිටියට පිවිසි ඔවුන්ගේ ඉනිමේ 2 වැනි පන්දු වාරයේ දී වර්ෂාව හේතුවෙන් තරගය මඳ වේලාවකට නතර වෙනවා.  

ඒ වෙද්දී Colombo North U 17s ක්‍රීඩකයෝ කිසිවෙක් නොදැවී ලකුණු 7ක් ලබා සිටියා. අනතුරුව තරග ආරම්භ වෙන්නේ එක් කණ්ඩායමකට පන්දුවාර 37කට සීමා කෙරෙමිනුයි. ඒ අනුව පිටියට පිවිසි ඔවුන් සියලුම දෙනා දැවී ලකුණු 164ක් ලබා ගත්තා.  

ඊට පිළිතුරු ඉනිමට පිටියට පිවිසි Colombo South U 17s ක්‍රීඩකයෝ තරගය නිමා වීමට තවත් පන්දු 62ක් ඉතිරි ව තිබිය දී සියලුම දෙනා දැවී ලබා ගත්තේ ලකුණු 133ක් පමණයි.  

Colombo North U 17s කණ්ඩායම 

ලිතුම් සෙනුජ (නායක), කෞෂික තිලකරත්න, කවිත් ද සිල්වා, සෙන්තුල් විජේරත්න, මිහින් සොයිසා, ශවීන් පෙරේරා, සනුල් වීරරත්න, දුමීන් ලියනාරච්චි (කඩුලු රකින්නා), ලහිරු ලක්මාල්, මිනුග නෙත්සර සහ සවිඳු සත්සර.  

 

Colombo South U 17s කණ්ඩායම 

රෙහාන් පීරිස් (නායක), හිරුන් මතීෂ, සීමන් අනුහස්, රුසඳු සිල්වා, හිමරු දේශාන්, තෙවිඳු වේවැල්වල, ස්ටීවන් පීරිස් (කඩුලු රකින්නා), මතීෂ අපෝන්සු, ගිම්හාන් මෙන්ඩිස්, ඕෂද මනහර සහ සෙහඳු සූරියආරච්චි. 

 

Colombo North U17s කණ්ඩායම 

ලිතුම් සෙනුජ (නායක), කෞශික තිලකරත්න, කවිත් ද සිල්වා, සන්තුල් විජේරත්න, මිහින් සොයිසා, ශවීන් පෙරේරා, සෙනුල් වීරරත්න, දුමීන් ලියනාරච්චි (කඩුලු රකින්නා), ලහිරු ලක්මාල්, මිනුග නෙත්සර සහ සවිඳු සත්සර. 

පළමුවෙන් පන්දුවට පහර දීමට පිටියට පිවිසි Colombo North U17s කණ්ඩායමේ ආරම්භය එතරම් ම සාර්ථක වූයේ නැහැ. ඔවුන්ගේ පළමු කඩුලු ද්විත්වය ලකුණු 23ක් වෙද්දී දැවී යනවා. 

අනතුරු ව 3 වැනි කඩුල්ලට එක් වූ මිහින් සොයිසා සහ සන්තුල් විජේරත්න පන්දු 71කට මුහුණ දෙමින් ලකුණු 55ක සබඳතාවක් එක් කරමින් තම කණ්ඩායම ගෞරවනීය තත්ත්වයකට ගෙන එනවා.  

එහි දී මිහින් සොයිසා පන්දු 34කට මුහුණ දෙමින් හතරේ පහර 2ක් සමඟින් ලකුණු 20ක් ලබා සිටිය දී දැවී යෑමත් සමඟින් එම කඩුල්ලේ සබඳතාව බිඳී යනවා. ඔහු ගේ දැවී යෑමෙන් අනතුරු ව Colombo North U17s ඉනිමේ තවත් කඩුලු 3ක් ලකුණු 20ක් තුළ දැවී යනවා.  

එම අවස්ථාවේ දී ද නැවත කණ්ඩායම ගොඩ ගැනීමේ බර දරන්නේ සන්තුල් විජේරත්න. ඔහු නායක ලිතුම් සෙනුජ සමඟ එක් වෙමින් පන්දු 36ක දී ලකුණු 29ක සබඳතාවක් එක් කරනවා.  

සන්තුල් විජේරත්න ලබා ගත් ලකුණු සංඛ්‍යාව 59ක්. පන්දු 74කින් එක් වූ එම ඉනිමට හතරේ පහර 4ක් ද එකතු වී තිබුණා. ලිතුම් සෙනුජ පන්දු 20කට මුහුණ දෙමින් හතරේ 3ක් සමඟින් ලකුණු 15ක් ලබා ගන්නවා.  

ඔහුගේ දැවී යෑමෙන් අනතුරු ව එම ඉනිමට තවත් ලකුණක් පමණක් එක් වෙද්දී සන්තුල් විජේරත්න ද දැවී යනවා. ඔහු දැවී යන විට පන්දු 74කට මුහුණ දෙමින් හතරේ පහර 4ක් සමඟින් ලකුණු 59ක් ලබා සිටියා.  

ඊට අමතර ව ලහිරු ලක්මාල් පන්දු 35කට මුහුණ දෙමින් හතරේ පහරක් සහ හයේ පහර 2ක් සමඟින් ලකුණු 27ක් ලබා ගත්තා.  

කඩුලු දවා ගැනීමේ දී රුසඳු සිල්වා ලකුණු 16කට කඩුලු 4ක් දවා ගනිමින් ඉනිමේ හොඳම පන්දු යැවීම වාර්තා කළ අතර ඊට අමතර ව ගිම්හාන් මෙන්ඩිස් සහ සෙහඳු සූරියආරච්චි කඩුලු 2ක් බැගින් දවා ගත්තා.  

Colombo North U17s ක්‍රීඩකයෝ සියලුම දෙනා දැවී ලබා ගත්තේ ලකුණු 164ක් වූව ද එය ඩක්වර්ත් ලුවිස් න්‍යාය මත ගණනය කිරීමේ Colombo South U 17s ක්‍රීඩකයන්ට ජයග්‍රහණය සඳහා ලකුණු 167ක ඉලක්කයක් හිමි වුණා.  

ඒ අනුව පිටියට පිවිසි Colombo South U 17s කණ්ඩායම සාර්ථක ආරම්භයක් ලබා ගත්ත ද ඔවුන්ට දිගින් දිගට ම එම තත්ත්වය රැකගෙන යෑමට හැකි වෙන්නේ නැහැ 

ඔවුන් පළමු කඩුලු ද්විත්වය දැවී යද්දී ලකුණු 92ක් ලබා ගනිමින් ප්‍රතිවාදීන් සසල කර තිබුණා. ඒ වෙද්දී ආරම්භක පිතිකරුවන් වූ හිරුන් මතීෂ පන්දු 16කට මුහුණ දෙමින් හතරේ පහර 3ක් සමඟින් ලකුණු 15ක් ලබා ගනිමින් ද සහ නායක රෙහාන් පීරිස් පන්දු 42කට මුහුණ දෙමින් හතරේ පහර 6ක් සමඟින් ලකුණු 37ක් ද ලබා ගනිමින් ද තම ඉනිම් අහිමි කරගෙන සිටියා.  

ඉනිමේ හොඳම කඩුලු අතර සබඳතාව වූයේ රෙහාන් පීරිස් සහ සීමන් අනුහස් එක් ව 2 වැනි කඩුල්ලට පන්දු 59ක දී එක් කළ ලකුණු 59යි. එහි දී සීමන් අනුහස් පන්දු 35කට මුහුණ දෙමින් හතරේ පහර 3ක් සහ හයේ පහරක් සමඟින් ලකුණු 28ක් ලබා ගත්තා.  

ඔවුන්ට අමතර ව හිමරු දේශාන් පන්දු 16කට මුහුණ දෙමින් හතරේ පහරක් සහ හයේ පහරක් සමඟින් ලකුණු 15ක් ලබා ගත් අතර අනෙක් කිසිදු පිතිකරුවෙක්ට ඉලක්කම් 2 ලකුණු සංඛ්‍යාවකට පැමිණීමට ප්‍රතිවාදී පන්දු යවන්නෝ ඉඩ ලබා දුන්නේ නැහැ.  

පන්දු යැවීමේ දී මිනුග නෙත්සර ලකුණු 37කට කඩුලු 4ක් දවා ගනිමින් ඉනිමේ හොඳම පන්දු යැවීම වාර්තා කළ අතර ඔහුට අනගි සහයෝගයක් ලබා දුන් ලහිරු ලක්මාල් ලකුණු 26කට කඩුලු 3ක් ද සහ ශවීන් පෙරේරා ලකුණු 9කට කඩුලු 2ක් ද දවා ගත්තා. ඊට අමතර ව සවිඳු සත්සර ට ද කඩුල්ලක් හිමි වුණා.   

තරගයේ කෙටි ලකුණු පුවරුව 

  • Colombo North U 17s කණ්ඩායම – සියලුම දෙනා දැවී 164 (36.5) සන්තුල් විජේරත්න 59, මිහින් සොයිසා 20, ලහිරු ලක්මාල් 27, ගිම්හාන් මෙන්ඩිස් 2/25, සෙහඳු සූරියආරච්චි 2/31, රුසඳු සිල්වා 4/16
  • Colombo South U 17s කණ්ඩායම – සියලුම දෙනා දැවී 133 (26.4) රෙහාන් පීරිස් 37, සීමන් අනුහස් 28, මිනුග නෙත්සර 4/37, ශවීන් පෙරේරා 2/09, ලහිරු ලක්මාල් 3/26

Colombo North U 17s කණ්ඩායමට ඩක්වර්ත් ලුවිස් න්‍යාය මත ලකුණු 33ක ජයක් 

  • අවසන් මහා තරගයේ විරයා – ලහිරු ලක්මාල් (Colombo North U 17s)
  • තරගාවලියේ දක්ෂතම පන්දු යවන්නා – චනුල් කොඩිතුවක්කු (Team Kandy U 17s)
  • තරගාවලියේ දක්ෂතම පිතිකරු – සනිතු ගුණතිලක (Team Kandy U 17s)
  • තරගාවලියේ දක්ෂතම ක්‍රීඩකයා – චනුල් කොඩිතුවක්කු (Team Kandy U 17s)

දෙස් විදෙස් ක්‍රීඩා පිටියේ උණුසුම් පුවත් දැන ගැනීමට රැදී සිටින්න ThePapare.com අප සමඟ ම. 

>> තවත් ක්‍රිකට් පුවත් සඳහා පිවිසෙන්න <<