டயமண்ட் லீக் நாயகனாக முடிசூடினார் ருமேஷ் தரங்க

பெல்ஜியத்தின் பிரஸ்ஸல்ஸில் உள்ள ‘கிங் பாடோயின்’ விளையாட்டரங்கில் நேற்று (05) நடைபெற்ற 2026 ஆம் ஆண்டிற்கான டயமண்ட் லீக் தடகளத் தொடரின் இறுதிப் போட்டியின் ஆண்கள் பிரிவு ஈட்டி எறிதலில் வெற்றியைப் பதிவு செய்து, இலங்கையின் நட்சத்திர வீரர் ருமேஷ் தரங்க பத்திரகே வரலாற்றுச் சாதனை படைத்துள்ளார்.  

இதன் மூலம் டயமண்ட் லீக் இறுதிப்போட்டியில் சம்பியன் பட்டம் வென்ற முதல் இலங்கையர் என்ற வரலாற்று சாதனையை அவர் படைத்தார்.  

உலகின் முன்னணி ஏழு ஈட்டி எறிதல் வீரர்கள் பங்குகொண்ட இப்போட்டியில் ருமேஷ் தரங்க தனது முதல் முயற்சியில் 80.42 மீற்றரையும், இரண்டாவது முயற்சியில் 79.73 மீற்றரையுமே பதிவு செய்தார். இருப்பினும், மூன்றாவது சுற்றில் 89.04 மீற்றர் தூரத்தை எறிந்து தனது ஆதிக்கத்தை நிலைநாட்டினார். இந்த தூரமே அவரை வெற்றிப் பாதைக்கு அழைத்துச் சென்றது. தொடர்ந்து தனது அடுத்த முயற்சிகளில் 85.96 மீற்றர் மற்றும் 85.76 மீற்றர் தூரங்களை எறிந்த அவர், இறுதி முயற்சியை தவறிழைத்தார். 

இந்த ஆண்டுக்கான டயமண்ட் லீக் தடகளத் தொடரின் 6 அத்தியாயங்களில் 5இல் வெற்றியையும், இந்த ஆண்டுக்கான 10 சிறந்த ஈட்டி எறிதலில் 08 ஐ தனது பெயருக்கு கீழே பதிவு செய்து சிறப்பான ஆட்டத்தை வெளிப்படுத்தி உலக ஈட்டி எறிதல் தரவரிசையில் முதலிடத்துடன் இறுதிப்போட்டிக்கு நுழைந்த ருமேஷ் தரங்கவுக்கு, இந்த வரலாற்று வெற்றி ஒரு சிறந்த சீசனை நிறைவு செய்துள்ளது. 

இந்த வெற்றியின் மூலம் பெருமைக்குரிய Diamond Trophy’ சம்பியன் கிண்ணத்தையும், 30,000 அமெரிக்க டொலர் பரிசுத் தொகையையும் ருமேஷ் தரங்க தன்வசப்படுத்திக் கொண்டார். 

• சூரிச் டயமண்ட் லீக்கிலும் முதலிடம் பிடித்து சாதனை படைத்தார் ருமேஷ் தரங்க
• லௌசேன் டயமண்ட் லீக்கில் சம்பியனானார் ருமேஷ் தரங்க 

கடந்த ஜூன் மாதம் நடைபெற்ற ரோம் டயமண்ட் லீக் தடகளப் போட்டியில் 92.62 மீற்றர் தூரத்தை எறிந்து போட்டி சாதனையுடன் இலங்கையின் தேசிய சாதனையை முறியடித்ததுடன், உலகின் மிகச் சிறந்த பதிவையும் அவர் பதிவு செய்திருந்தார். அதேபோல, தோஹாவில் 88.68 மீற்றரையும், லௌசேனில் 88.14 மீற்றரையும் எறிந்த அவர், இறுதியாக சூரிச்சில் நடைபெற்ற போட்டியில் 92.07 மீற்றர் தூரத்தைப் பதிவு செய்திருந்தார். 

2026 ஆம் ஆண்டில் இரண்டு தடவைகள் 90 மீற்றருக்கும் அதிகமான தூரத்தை எறிந்து சாதனை படைத்த அவர், உலக ஈட்டி எறிதல் தரவரிசையில் முதலிடத்தைப் பிடித்துள்ளார். அத்துடன், இந்த ஆண்டு நடைபெற்ற பொதுநலவாய விளையாட்டுப் விழாவில் தங்கம் வென்ற ருமேஷ் தரங்கவுக்கு இந்த டயமண்ட் லீக் வெற்றியும் இணைந்து மேலும் பெருமை சேர்த்துள்ளது. 

இதனிடையே, இம்முறை டயமண்ட் லீக் இறுதிப்போட்டியில் போலந்து நாட்டின் டேவிட் வேக்னர் 87.47 மீற்றர் தூரத்தை எறிந்து (தனிப்பட்ட சிறந்த பதிவு) இரண்டாம் இடத்தையும், முன்னாள் ஒலிம்பிக் சம்பியனான டிரினிடாட் மற்றும் டொபாகோவைச் சேர்ந்த கெஷோர்ன் வால்கொட் 83.99 மீற்றர் தூரத்தைப் மூன்றாம் இடத்தையும் பெற்றுக் கொண்டனர். அதேபோல, இரண்டு முறை உலக சம்பியனான கிரெனடாவின் ஆண்டர்சன் பீட்டர்ஸ் 83.70 மீற்றர் தூரத்தைப் பதிவு செய்து நான்காவது இடத்தைப் பிடித்தார். 

இந்தியாவின் நீரஜ் சோப்ரா காயமடைந்த காரணத்தினால் கடந்த வாரம் இப்போட்டியிலிருந்து விலகியதால், இதில் பங்கேற்கவில்லை. 

இதேவேளை, உலக மெய்வல்லுனர் சங்கத்தினால் முதல் தடவையாக ஏற்பாடு செய்யப்பட்டுள்ள அங்குரார்ப்பண World Athletics Ultimate Championship தொடர் இம்மாதம் 11ஆம் திகதி முதல் 13ஆம் திகதி வரை ஹங்கேரியில் நடைபெறவுள்ளதுடன், அதனைத் தொடர்ந்து ஆசிய விளையாட்டு விழா 23ஆவது ஆசிய விளையாட்டு விழா இம்மாதம் 19ஆம் திகதி ஜப்பானில் ஆரம்பமாகவுள்ளது. எனவே இந்த 2 முக்கிய போட்டித் தொடர்களிலும் ருமேஷ் தரங்க தங்கப் பதக்கம் வென்று இலங்கைக்கு பெருமை சேர்க்க வேண்டும் என வாழ்த்துக்களைத் தெரிவித்துக் கொள்கிறோம்.   

>>மேலும் பல மெய்வல்லுனர் செய்திகளைப் படிக்க<<