පාකිස්තානය පහසුවෙන් ශූරතාව කරා!

පාකිස්තානයේ පැවැත්වෙන තුන් කොන් විස්සයි විස්ස ක්‍රිකට් තරගාවලියේ අවසන් මහා තරගය අද (29) ක්‍රියාත්මක වුනා.

ශ්‍රී ලංකාව මුහුණ දී ඇති දරුණු ව්‍යසනය වෙනුවෙන් මිනිත්තුවක නිහඬතාවක් පළ කිරීමෙන් අනතුරුව ආරම්භ වූ මෙම තරගයේ කාසියේ වාසිය පාකිස්තානය සතු වූ අතර, පාකිස්තාන නායකයාගේ තීරණය අනුව ශ්‍රී ලංකා පිතිකරුවන්ට පළමුව පන්දුවට පහර දීමේ අවස්ථාව හිමි වුනා.

මෙහි දී පැතුම් නිස්සංක සහ කමිල් මිශාර ශ්‍රී ලංකා ඉනිම ආරම්භ කිරීම වෙනුවෙන් පිටියට පිවිසි අතර, මෙහි දී පැතුම්ගේ ඉනිම ලකුණු 11කට සීමා වුනේ ශ්‍රී ලංකා ඉනිමට ලකුණු 20ක් එක් වන විටයි. කෙසේ වෙතත් ඉන් පසුව කමිල් සහ කුසල් මෙන්ඩිස් දෙවැනි කඩුල්ල වෙනුවෙන් ලකුණු 64ක් එක් කිරීමට සමත් වුනා.

මෙහි දී කුසල්ගේ පිත්තෙන් වාර්තා වුනේ ලකුණු 14ක් පමණයි. කුසල්ගේ දැවී යාමෙන් මොහොතකට පසු ශ්‍රී ලංකා ඉනිමේ ලකුණු තත්වය 98ක් වන විට එතෙක් වේලා විශිෂ්ට ඉනිමක් දියත් කළ කමිල් මිශාර ලකුණු 59කට දැවී ගියා. පන්දු 47ක් තුළ දියත් වූ එම ඉනිමට හයේ පහර 4ක් සහ හතරේ පහර 2ක් අන්තර්ගත වුනා.

කමිල්ගේ දැවී යාමෙන් පසුව ශ්‍රී ලංකා ඉනිම සම්පූර්ණයෙන්ම බිඳ වැටීමට ලක් වූ අතර, ඉන් පසුව පිටියට පිවිසි එකදු පිතිකරුවකු හෝ ලකුණු 10 සීමාව හෝ ඉක්මවා යාමට සමත් වුනේ නැහැ. මෙහි දී ශ්‍රී ලංකා ඉනිමේ අවසන් කඩුලු 08ම ලකුණු 16ක් තුළ බිඳ වැටුණා.

ඒ අනූව පන්දුවාර 19 එක් පන්දුවක් තුළ ශ්‍රී ලංකාව සියල්ලන් දැවී ලබා ගැනීමට සමත් වුනේ ලකුණු 114ක් පමණයි. මෙහි දී පාකිස්තානය වෙනුවෙන් Mohammad Nawaz සහ Shaheen Shah Afridi කඩුලු 3 බැගින් දවා ගැනීමට සමත් වුනා.

• ශ්‍රී ලංකා කණ්ඩායමේ උඳුවප් සංචාරය
• නවක ක්‍රීඩකයා සමඟ ගැටුණු Kohliට දඩ නියම වෙයි!
• නවසීලන්තයේ සංචාරය කිරීමට නියමිත ශ්‍රී ලංකා T20 සංචිතය නම් කරයි

• ශ්‍රී ලංකාව පුහුණු තරග ද්විත්වය පහසුවෙන් ජය ගනී

ඉතා ඉහළ ලකුණු ප්‍රමාණයක් කරා යමින් සිටි ශ්‍රී ලංකා ඉනිමේ මැද පෙළ සහ පසු පෙළ පිතිකරුවන්ගේ දියාරු පිතිකරණය නිසා ශ්‍රී ලංකා ඉනිම ලකුණු 114කින් සීමා වීම නිසා පාකිස්තානයට ඉතා පහසුවෙන් හඹා යා හැකි ඉලක්කයක් හිමි වුනා.

මෙහි දී පාකිස්තානය වෙනුවෙන් Sahibzada Farhan ලකුණු 23ක් වාර්තා කරන අතරේ, Saim Ayubගේ පිත්තෙන් ලකුණු 36ක් එකතු වුනා. එමෙන්ම පාකිස්තාන ඉනිමේ අංක තුන පිතිකරු වූ Babar Azam නොදැවී ලකුණු 37ක් ලබා ගැනීමට සමත් වුනා.

කෙසේ වෙතත් සියලු පාකිස්තාන පිතිකරුවන් එතරම් ප්‍රවේගකාරී ඉනිම් දියත් නොකර තරමක් සෙමෙන් සහ ඉවසිලිවන්ත ලෙස සිය ඉනිම් ක්‍රියාත්මක කිරීම නිසා ඔවුන්ට අදාළ ඉලක්කය හඹා යාම වෙනුවෙන් පන්දුවාර 18 පන්දු 4ක් වැය වුනා. ඒ වන විට පාකිස්තාන ඉනිමේ කඩුලු 4ක් දැවී ගොස් තිබූ අතර, ඉන් කඩුලු ද්විත්වයක්ම පවන් රත්නායකගේ නම ඉදිරියෙන් සටහන් වීම විශේෂත්වයක්.

මේ අනුව පාකිස්තානය මෙම තරගයෙන් කඩුලු 6ක ජයක් ලබමින් මෙම තරගාවලියේ ශූරතාව හිමි කර ගැනීමට සමත් වුනා. තරගයේ වීරයා සම්මානය Mohammad Nawaz හට හිමි වුනා.

දෙස්, විදෙස් ක්‍රිකට් පිටිය පිළිබඳ සියලු උණුසුම් තතු විත්ති ඔබ වෙත සමීප කිරීමට ThePapare සූදානම්, රැඳී සිටින්න ශ්‍රී ලංකාවේ අංක එකේ ක්‍රීඩා නාලිකාව ThePapare සමඟින්.

>> තවත් ක්‍රිකට් පුවත් සඳහා පිවිසෙන්න <<