தென்னாபிரிக்க கிரிக்கெட் அணியின் நட்சத்திர துடுப்பாட்ட வீரர்களில் ஒருவரான ரஸ்ஸி வான் டர் டுஸ்ஸன், சர்வதேச கிரிக்கெட்டில் இருந்து உடனடியாக ஓய்வு பெறுவதாக அறிவித்துள்ளார். இதன் மூலம் அவரது ஏழரை ஆண்டுகால சர்வதேச கிரிக்கெட் பயணம் நிறைவுக்கு வந்துள்ளது.
>>ஜிம்பாப்வே செல்லும் இந்திய கிரிக்கெட் அணி<<
37 வயதான வான் டர் டுஸ்ஸன் ஓய்வு அறிவிப்பை வெளியிட்ட போதும் தனது உள்ளூர் கழகமான லயன்ஸ் அணிக்காக தொடர்ந்து விளையாடுவார் என்று குறிப்பிட்டுள்ளார். அதேவேளை தென்னாபிரிக்காவின் அடுத்த தலைமுறை கிரிக்கெட் வீரர்களுக்குப் பயிற்சியளிப்பதன் மூலமும் வழிகாட்டுவதன் மூலமும் கிரிக்கெட் விளையாட்டுக்கு தனது பங்களிப்பைத் தொடர்ந்து வழங்குவார் என்றும் தெரிவித்துள்ளார்.
வான் டர் டுஸ்ஸன் 2018 ஆம் ஆண்டு ஜிம்பாப்வேக்கு எதிரான T20 போட்டி மூலம் சர்வதேச அறிமுகத்தினைப் பெற்றிருந்தார். பின்னர் 2019ஆம் ஆண்டு பாகிஸ்தானுக்கு ஒருநாள் அறிமுகம் பெற்ற அவர், தென்னாபிரிக்க அணி தவிர்க்க முடியாத துடுப்பாட்ட வீரர்களில் ஒருவராக மாறிப் போயிருந்தார்.
ஒருநாள் போட்டிகளில் 71 போட்டிகளில் விளையாடி 50.13 சராசரியுடன் 2657 ஓட்டங்களைக் குவித்துள்ள வான் டர் டுஸ்ஸன் 6 சதங்கள் மற்றும் 17 அரைச்சதங்களையும் பெற்றுள்ளமை குறிப்பிடத்தக்கது. மொத்தமாக போட்டிகளில் 57 T20 போட்டிகளில் விளையாடி 1406 ஓட்டங்களைப் பெற்றுள்ள அவர் டெஸ்ட் கிரிக்கெட்டில் 18 போட்டிகளில் விளையாடி 6 அரைசதங்களுடன் 905 ஓட்டங்கள் எடுத்துள்ளமையும் சுட்டிக்காட்டத்தக்கது.
தனது ஓய்வு குறித்து கருத்து வெளியிட்டுள்ள வான் டர் டுஸ்ஸன் பெருமையுடனும் மிகுந்த நன்றியுணர்வுடனும் சர்வதேச கிரிக்கெட்டிலிருந்து ஓய்வு பெறுவதாக கூறியிருப்பதோடு தென்னாபிரிக்க ஜேர்சி அணிந்து நாட்டுக்காக விளையாடியதே தனது வாழ்வின் மிகப்பெரிய கௌரவம் எனவும் நெகிழ்ச்சியுடன் தெரிவித்துள்ளார்.
>>2024ஆம் ஆண்டின் பின்னர் நியூசிலாந்து அணிக்குத் திரும்பும் சுழல்வீரர்<<
தென்னாபிரிக்க கிரிக்கெட் சபை (CSA) நிர்வாக இயக்குனர் ஈனோக் ன்குவே, வான் டர் டுஸ்ஸன் அணியின் கலாச்சாரத்தை மேம்படுத்துவதில் முன்னணி வீரராகச் செயற்பட்டார் எனப் புகழ்ந்துள்ளார். அதேநேரம் தென்னாபிரிக்க கிரிக்கெட் தலைமை அதிகாரி போலெட்சி மொசெகி, வான் டர் டுஸ்ஸனின் சேவைக்காக நன்றி தெரிவித்து, அவரின் எதிர்கால முயற்சிகளுக்கும் வாழ்த்துகளைத் தெரிவித்துள்ளார்.
>>மேலும் கிரிக்கெட் செய்திகளைப் படிக்க<<
