சுற்றுலா நியூசிலாந்து மற்றும் இலங்கை A கிரிக்கெட் அணிகள் இடையிலான இரண்டாவது நான்கு நாட்கள் கொண்ட முதல்தரப் போட்டியில் இலங்கை A இன்னிங்ஸ் மற்றும் 109 ஓட்டங்களால் வெற்றியினைப் பதிவு செய்திருக்கின்றது.
சமநிலை அடைந்த இலங்கை – நியூசிலாந்து A அணிகளின் முதல் முதல்தரப் போட்டி
அத்துடன் இந்த வெற்றியுடன் இலங்கை A அணியினர் இரு போட்டிகள் கொண்ட முதல்தரக் கிரிக்கெட் தொடரினையும் 1-0 எனக் கைப்பற்றியிருக்கின்றமை குறிப்பிடத்தக்கது.
இந்த தொடரின் முதல் போட்டி சமநிலை அடைந்திருக்க இரண்டாவது போட்டி காலியில் கடந்த வியாழன் (23) ஆரம்பமாகியது.
போட்டியின் நாணய சுழற்சியில் வென்ற நியூசிலாந்து A அணியின் தலைவர் றையிஸ் மரியூ முதலில் துடுப்பாட்டத்தினை தெரிவு செய்ததோடு, இதன்படி முதலில் துடுப்பாடிய நியூசிலாந்து A தரப்பு 87.1 ஓவர்களில் அனைத்து விக்கெட்டுக்களையும் இழந்து 305 ஓட்டங்கள் பெற்றது.
நியூசிலாந்து A தரப்பின் துடுப்பாட்டத்தில் மெதிவ் போய்ல் 4 சிக்ஸர்கள் மற்றும் 7 பெளண்டரிகள் அடங்கலாக 102 ஓட்டங்கள் எடுக்க, கேர்டிஸ் ஹீப்பி 59 ஓட்டங்கள் பெற்றிருந்தார்.
இலங்கை A அணி பந்துவீச்சில் திலும் சுதீர 107 ஓட்டங்களுக்கு 6 விக்கெட்டுக்கள் எடுக்க, ரமேஷ் மெண்டிஸ் 3 விக்கெட்டுக்களை சுருட்டினார்.
பின்னர் தமது முதல் இன்னிங்ஸ் துடுப்பாட்டத்தினை ஆரம்பம் செய்த இலங்கை A கிரிக்கெட் அணி கமில் மிஷாரவின் அபார சதம் நிஷான் மதுஷ்க, லஹிரு உதார, சொனால் தினுஷ மற்றும் நுவனிது பெர்னாண்டோ ஆகியோரது பொறுப்பான அரைச்சதங்களோடு 127 ஓவர்களில் 518 ஓட்டங்கள் எடுத்தது.
இலங்கை A அணியின் துடுப்பாட்டம் சார்பில் கமில் மிஷார 2 சிக்ஸர்கள் மற்றும் 19 பெளண்டரிகள் அடங்கலாக 174 ஓட்டங்களையும் லஹிரு உதார 61 ஓட்டங்களையும், சொனால் தினுஷ ஆட்டமிழக்காது 60 ஓட்டங்களையும் நிஷான் மதுஷ்க 57 ஓட்டங்களையும், நுவனிது பெர்னாண்டோ 55 ஓட்டங்களையும் பெற்றனர்.
பின்னர் 213 ஓட்டங்கள் பின்தங்கி இரண்டாம் இன்னிங்ஸ் துடுப்பாட்டத்தினை ஆரம்பம் நியூசிலாந்து A அணியானது 31.2 ஓவர்களில் அனைத்து விக்கெட்டுக்களையும் இழந்து 104 ஓட்டங்களுடன் போட்டியில் இன்னிங்ஸ் தோல்வியினைத் தழுவிக் கொண்டது.
நியூசிலாந்து A அணியின் இரண்டாம் இன்னிங்ஸ் துடுப்பாட்டத்தில் அதிகபட்சமாக மெக்ஸ் ச்சூ 35 ஓட்டங்கள் எடுக்க, இலங்கை A அணியின் பந்துவீச்சில் திலும் சுதீர இம்முறை 4 விக்கெட்டுக்களைச் சாய்த்திருந்தார். இவர்கள் தவிர ரமேஷ் மெண்டிஸ் மற்றும் மொஹமட் சிராஸ் ஆகியோரும் தலா 2 விக்கெட்டுக்கள் வீதம் சாய்த்து இலங்கையின் வெற்றியினை உறுதி செய்திருந்தனர்.
ஸ்கோர் சுருக்கம்
நியூசிலாந்து A – 305 (87.1) மெதிவ் போய்ல் 102, கேர்டிஸ் ஹீப்பி 59, திலும் சுதீர 6/107, ரமேஷ் மெண்டிஸ் 3/103 & 104 (31.2) மேக்ஸ் ச்சூ 35, திலும் சுதீர 4/38, மொஹமட் ஷிராஸ் 2/27, ரமேஷ் மெண்டிஸ் 2/33
இலங்கை A – 518 (127) கமில் மிஷார 174, லஹிரு உதார 61, சொனால் தினுஷ 60*, நிஷான் மதுஷ்க 57, நுவனிது பெர்னாண்டோ 55, டேல் பிலிப்ஸ் 3/44
முடிவு – இலங்கை A அணி இன்னிங்ஸ் மற்றும் 109 ஓட்டங்களால் வெற்றி பெற்றது.
>>மேலும் கிரிக்கெட் செய்திகளைப் படிக்க<<
