ஐந்து தமிழ்பேசும் வீரர்களுக்கு LPL வாய்ப்பு; நிஸ்ஸங்க, பத்திரண இல்லை!

லங்கா பிரீமியர் லீக் (LPL) தொடருக்கான வீரர்கள் வரைவு இன்று (01) கொழும்பில் நடைபெற்று முடிந்தது.

LPL வரைவில் ஜப்னா கிங்ஸ், கொழும்பு கேப்ஸ், கண்டி றோயல், கோல் கெலண்ட்ஸ் மற்றும் தம்புள்ள சிக்ஸர்ஸ் ஆகிய ஐந்து அணிகள் வீரர்கள் தங்களுடைய அணிகளில் ஒப்பந்தம் செய்திருந்தன.

வீரர்கள் வரைவுக்கு முன்னர் ஒவ்வொரு அணிகளும் தலா 4 வீரர்களை தங்களுடைய அணிக்காக நேரடியாக ஒப்பந்தம் செய்திருந்த நிலையில், மேலும் 16 வீரர்களை இணைப்பதற்கான வாய்ப்பு வழங்கப்பட்டிருந்தது.

>>2026 LPL தொடருக்கு நேரடியாக ஒப்பந்தம் செய்யப்பட்ட 20 நட்சத்திரங்கள்

இதில் இலங்கையின் முன்னணி வீரர்களான அவிஷ்க பெர்னாண்டோ, பினுர பெர்னாண்டோ, நுவான் துஷார, சரித் அசலங்க மற்றும் மஹீஷ் தீக்ஷன ஆகியோரை முறையே ஜப்னா கிங்ஸ், கொழும்பு கேப்ஸ், கண்டி றோயல், கோல் கெலண்ட்ஸ் மற்றும் தம்புள்ள சிக்ஸர்ஸ் அணிகளுக்காக முதல் சுற்றில் ஒப்பந்தம் செய்யப்பட்டனர்.

தொடர்ந்து முன்னணி சர்வதேச வீரர்களாக டேவிட் வீஷா (ஜப்னா கிங்ஸ்), முஜீப் உர் ரஹ்மான் (கொழும்பு கேப்ஸ்), ரஹ்மானுல்லாஹ் குர்பாஸ் (கண்டி றோயல்),  மொஹமட் நவாஸ் (கோல் கெலண்ட்ஸ்) மற்றும் பஷல்ஹக் பரூகி (தம்புள்ள சிக்ஸர்ஸ்) அணிகளுக்காக முதல் சுற்றில் வாங்கப்பட்டனர்.

அதேநேரம் டில்சான் மதுசங்க (ஜப்னா கிங்ஸ்), சதீர சமரவிக்ரம (கொழும்பு கேப்ஸ்), குசல் பெரேரா (கண்டி றோயல்), பிரமோத் மதுசான் (கோல் கெலண்ட்ஸ்) மற்றும் நிரோஷன் டிக்வெல்ல (தம்புள்ள சிக்ஸ்ர்ஸ்) ஆகிய வீரர்கள் அணிகளில் இடங்களை பிடித்திருந்தனர்.

அதுமாத்திரமின்றி தமிழ்பேசும் வீரர்களான விஜயகாந்த் வியாஸ்காந்த் (கோல் கெலண்ட்ஸ்), மொஹமட் சிராஸ் (ஜப்னா கிங்ஸ்), குகதாஸ் மாதுளன் (ஜப்னா கிங்ஸ்), சாருஜன் சண்முகநாதன் (கொழும்பு கேப்ஸ்) மற்றும் அருள் பிரகாசம் (கொழும்பு கேப்ஸ்) ஆகிய வீரர்களுக்கு வாய்ப்புகள் கிடைத்திருந்தமை குறிப்பிடத்தக்கது.

>>2026இல் இலங்கை, நியூசிலாந்து மற்றும் பாகிஸ்தானை எதிர்கொள்ளும் மே.தீவுகள் அணி

இவர்களுடன் பல முன்னணி உள்நாட்டு, வெளிநாட்டு மற்றும் இளம் வீரர்கள் இம்முறை LPL தொடரில் விளையாடும் வாய்ப்பினை பெற்றிருந்த போதும், ஒருசில முக்கிய வீரர்களுக்கு அணிகளில் வாய்ப்புகள் கிடைக்கவில்லை.

இதில் பெதும் நிஸ்ஸங்க மற்றும் மதீஷ பத்திரண ஆகியோர் உபாதை காரணமாக இம்முறை விளையாடவில்லை என்பதுடன், தனன்ஜய டி சில்வா, லஹிரு குமார போன்ற முன்னணி வீரர்களுக்கு  வாய்ப்பு கிடைக்கவில்லை என்பது குறிப்பிடத்தக்கது.

LPL தொடருக்கான அணிக்குழாம்களின் முழு விபரம்

>>மேலும் கிரிக்கெட் செய்திகளைப் படிக்க<<