இலங்கைக்கு எதிரான ஒருநாள் மற்றும் T20I அணியின் கிரிக்கெட் தொடருக்கான ஆப்கானிஸ்தான் குழாமை அந்த நாட்டு கிரிக்கெட் சபை அறிவித்துள்ளது.
இதில் ஒரு முக்கிய மாற்றமாக, அந்த அணியின் நட்சத்திர சுழல்பந்து வீச்சாளர் ரஷித் கானுக்குப் பதிலாக, ஆரம்ப துடுப்பாட்ட வீரர் இப்ராஹிம் சத்ரான் ஆப்கானிஸ்தான் T20I அணியின் புதிய தலைவராக நியமிக்கப்பட்டுள்ளார். முன்னதாக T20I அணியின் துணைத் தலைவராக அவர் செயல்பட்டிருந்தமை குறிப்பிடத்தக்கது.
இம்முறை T20 உலகக் கிண்ணத் தொடரில் ரஷித் கான் தலைமையில் டி பிரிவில் களமிறங்கிய ஆப்கானிஸ்தான் அணி 4 போட்டிகளில் 2 வெற்றி 2 தோல்வியுடன் சுப்பர் 8 சுற்று வாய்ப்பை இழந்து வெளியேறியது.
இதனிடையே, இலங்கை அணிக்கு எதிராக நடைபெறவுள்ள T20I தொடருக்காக அறிவிக்கப்பட்டுள்ள ஆப்கானிஸ்தான் குழாத்தில் தற்போது நடைபெற்று வருகின்ற T20 உலகக் கிண்ணத்தில் விளையாடிய சில முக்கிய வீரர்கள் இந்தத் தொடரில் நீக்கப்பட்டுள்ளனர்.
வேகப்பந்து வீச்சாளர் ஃபசால் ஹக் ஃபரூக்கி, சகலதுறை வீரர் குல்பதீன் நைப் மற்றும் மொஹமட் இஷாக் ஆகியோர் ஒருநாள் மற்றும் T20I அணிகளிலும் இடம் பெறவில்லை.
அதேசமயம், T20I அணியில் விக்கெட் காப்பாளர் நூர் ரஹ்மான், ஷரபுதீன் அஷ்ரப் மற்றும் ஃபரீத் அஹமட் ஆகியோர் சேர்க்கப்பட்டுள்ளனர்.
ஒருநாள் குழாத்தைப் பொறுத்தவரை, ஜியா உர் ரஹ்மான் ஷெரிஃபி முதன்முறையாக உள்வாங்கப்பட்டுள்ளார். இம்முறை T20 உலகக் கிண்ணத்தை உபாதை காரணமாக தவறவிட்ட நவீன் உல் ஹக்குக்குப் பதிலாக இவர் ஆப்கானிஸ்தான் அணிக்காக 3 போட்டிகளில் விளையாடியிருந்தமை குறிப்பிடத்தக்கது.
- இலங்கை – ஆப்கானிஸ்தான் தொடருக்கான போட்டி அட்டவணை வெளியானது
- பாகிஸ்தான் ஒருநாள் குழாத்திலிருந்து பாபர் அசாம் அதிரடி நீக்கம்
- இலங்கை மகளிர் கிரிக்கெட் அணியின் பயிற்சியாளராக ஜேமி சிடன்ஸ் நியமனம்
இந்த நிலையில், ஆப்கானிஸ்தான் அணியின் புதிய பயிற்சியாராக நியமிக்கப்பட்ட றிச்சர்ட் பைபஸ்ஸின் முதல் போட்டித் தொடர் இதுவாகும்.
இதனிடையே, இலங்கை – ஆப்கானிஸ்தான் அணிகளுக்கிடையிலான தொடர் இம்மாதம் 13ஆம் திகதி முதல் 25ஆம் திகதி சார்ஜா மற்றும் டுபாயில் நடைபெறவுள்ளது. எனினும், மத்திய கிழக்கில் நிலவி வரும் ஈரான் – அமெரிக்க நாடுகளுக்கிடையிலான யுத்தம் காரணமாக வழக்கமான வான்வெளிப் பாதைகள் மூடப்பட்டுள்ளன.
இந்தச் சூழலில், இவ்விரு அணிகளுக்குமிடையிலான தொடரைத் திட்டமிட்டபடி குறிப்பிட்ட திகதி மற்றும் இடங்களில் நடத்த முடியுமா என்பது குறித்து ஆப்கானிஸ்தான் கிரிக்கெட் சபை தீவிரமாகக் கண்காணித்து வருவதோடு, சம்பந்தப்பட்ட அனைத்துத் தரப்பினருடனும் ஆலோசனைகளை மேற்கொண்டு வருவதாகத் தனது அறிக்கையில் தெரிவித்துள்ளது.
இது தொடர்பான இறுதி முடிவு இன்னும் ஒரு சில நாட்களில் எடுக்கப்படும் என்ற போதிலும், ஐக்கிய அரபு இராச்சியம் கிரிக்கெட் சபை மற்றும் மைதான அதிகாரிகளுடன் இணைந்து, ஏற்கனவே திட்டமிடப்பட்ட திகதிகளில் போட்டிகளை நடத்துவதற்கே ஆப்கானிஸ்தான் கிரிக்கெட் சபை முதற்கட்டமாக முயற்சி செய்து வருகிறது. ஒருவேளை நிலவும் சூழல் காரணமாக மாற்றங்கள் தேவைப்பட்டால், போட்டிகளை நடத்தும் நாடு மற்றும் போட்டி அட்டவணை ஆகியவற்றில் மாற்று வழிகளை ஆராயவும் தயாராக இருப்பதாக ஆப்கானிஸ்தான் கிரிக்கெட் சபை மேலும் குறிப்பிட்டுள்ளது.
மறுபுறத்தில் குறித்த தொடரை ஐக்கிய அரபு இராச்சியத்தில் நடத்த முடியாமல் போனால் இலங்கையில் அந்த தொடரை நடத்துவதற்கான ஏற்பாடுகளும் இடம்பெற்று வருவதாக தெரிவிக்கப்பட்டுள்ளது. ஒருவேளை, மத்திய கிழக்கில் தற்போது நிலவி வருகின்ற போர் பதற்றம் தொடர்ந்து அதிகரிக்குமானால் இந்த தொடர் தள்ளிவைக்கப்பட வாய்ப்புள்ளதாகவும் கிரிக்கெட் வட்டாரங்கள் செய்தி வெளியிட்டுள்ளன.
ஆப்கானிஸ்தான் T20I மற்றும் ஒருநாள் குழாம் விபரம்:
T20I அணி: இப்ராஹிம் சத்ரான் (தலைவர்), ரஹ்மானுல்லா குர்பாஸ், நூர் ரஹ்மான், சதிகுல்லா அடல், தர்வீஷ் ரசூலி, ஷாஹிதுல்லா கமால், அஸ்மத்துல்லாஹ் உமர்சாய், மொஹமட் நபி, ஷரபுதீன் அஷ்ரஃப், ரஷித் கான், நூர் அஹ்மட், ஷரீப் ரஹ்மத், முஜீப் உர் ரஹ்மான், ஜியா உர் ரஹ்மான் ஷெரிஃபி, பரீட் அஹ்மட் மலிக் மற்றும் அப்துல்லாஹ் அஹ்மத்ஸாய்.
ஒருநாள் அணி: ஹஷ்மத்துல்லாஹ் ஷாஹிதி (தலைவர்), ரஹ்மத் ஷா, ரஹ்மானுல்லா குர்பாஸ், இக்ராம் அலிகில், இப்ராஹிம் சத்ரான், சதிகுல்லா அடல், தர்வீஷ் ரசூலி, அஸ்மத்துல்லாஹ் உமர்சாய், மொஹமட் நபி, ரஷித் கான், நங்யல் கரோட்டி, ஏஎம் கஸன்பர், ஜியா உர் ரஹ்மான் ஷெரிஃபி, ஃபரீத் அஹ்மட் மலிக் மற்றும் பிலால் சமி.
>>மேலும் கிரிக்கெட் செய்திகளைப் படிக்க<<
