ஆப்கானிஸ்தானுக்கு எதிராக இலங்கை A அணிக்கு இலகு வெற்றி

Asia Cup Rising Stars 2026

1
SL A team

கத்தாரில் நேற்று (19) ஆரம்பமான ‘ஏசிசி ரைசிங் ஸ்டார்ஸ்’ வளர்ந்து வரும் ஆசியக் கிண்ணத் தொடரில், தாம் எதிர்கொண்ட முதலாவது போட்டியிலேயே ஆப்கானிஸ்தான் A அணியை 6 விக்கெட்டுகளால் வீழ்த்தி இலங்கை A அணி இலகுவான வெற்றியுடன் தொடரை ஆரம்பித்தது.

தோஹாவின் வெஸ்ட் எண்ட் பார்க் மைதானத்தில் நடைபெற்ற இப்போட்டியின் நாணயச் சுழற்சியில் வென்று முதலில் பந்துவீசத் தீர்மானித்த இலங்கை A அணி, ஆப்கானிஸ்தான் இன்னிங்ஸை 139 ஓட்டங்களுக்குள் கட்டுப்படுத்தி, 35.3 ஓவர்களில் அனைத்து விக்கெட்டுகளையும் கைப்பற்றியது. ஆப்கானிஸ்தான் சார்பில் பிரகாசித்த ஒரே துடுப்பாட்ட வீரரான தர்விஷ் ரசூலி 80 ஓட்டங்களைப் பெற்றார்.

இலங்கை A அணி சார்பில் சிறப்பாகப் பந்துவீசிய சாமிக்க ஹீனட்டிகல 11 ஓட்டங்களுக்கு 3 விக்கெட்டுகளை வீழ்த்தினார். மறுபுறத்தில் நிபுன் தனஞ்சய, ஜனித் லியனகே மற்றும் வனுஜ சஹன் ஆகியோர் தலா 2 விக்கெட்டுகளைக் கைப்பற்றினர்.

பதிலுக்குத் துடுப்பெடுத்தாடிய இலங்கை வீரர்கள் ஆரம்பம் முதலே அதிரடியாக விளையாடினர். முதல் விக்கெட்டாக ஆட்டமிழந்த சினெத் ஜயவர்தன 3 சிக்ஸர்கள் மற்றும் 2 பவுண்டரிகளுடன் வேகமாக 28 ஓட்டங்களை எடுத்தார்.

>>விஷ்மியின் ஹெட்ரிக் அரைச் சதத்துடன் இலங்கை மகளிருக்கு 4ஆவது வெற்றி<<

தொடர்ந்து களமிறங்கிய நிஷான் மதுஷ்க மற்றும் லசித் குரூஸ்புள்ளே ஜோடி இரண்டாவது விக்கெட்டுக்கு 55 ஓட்டங்களைப் பகிர்ந்தது. அணியின் மொத்த எண்ணிக்கை 91 ஆக இருந்தபோது நிஷான் 30 ஓட்டங்களில் ஆட்டமிழந்தார். லசித் 40 ஓட்டங்களைப் பெற்ற நிலையில், அணித்தலைவர் பவன் ரத்நாயக்க மற்றும் ஜனித் லியனகே ஆகியோர் இணைந்து 21.4 ஓவர்களிலேயே இலக்கை எட்டி வெற்றியைப் பெற்றுத் தந்தனர்.

ஆட்டநாயகன் விருது சாமிக்க ஹீனட்டிகலவுக்கு வழங்கப்பட்டது.

இத்தொடரில் இலங்கை அணி நாளை (21ஆம் திகதி) ஹொங்கொங்கையும், 23ஆம் திகதி பங்களாதேஷ் A அணியையும் எதிர்கொள்ளவுள்ளது.

போட்டியின் சுருக்கம்

ஆப்கானிஸ்தான் A அணி – 139 (35.3 ஓவர்கள்) – தர்விஷ் ரசூலி 80, சாமிக்க ஹீனட்டிகல 3/11, நிபுன் தனஞ்சய 2/10, வனுஜ சஹன் 2/28, ஜனித் லியனகே 2/28

 

இலங்கை A அணி – 144/4 (21.4 ஓவர்கள்) – லசித் குரூஸ்புள்ளே 40, நிஷான் மதுஷ்க 30, பவன் ரத்நாயக்க 29*, சினெத் ஜயவர்தன 28

 

முடிவு – இலங்கை A அணி 6 விக்கெட்டுகளால் வெற்றி பெற்றது.

>>மேலும் கிரிக்கெட் செய்திகளைப் படிக்க<<