முக்கியமான வெற்றிகளுடன் தொடரும் ப்ளூ ஸ்டார் மற்றும் ரெட் ஸ்டார்!

சுப்பர் லீக் கால்பந்து தொடரில் சனிக்கிழமை (05) மற்றும் ஞாயிற்றுக்கிழமை (06) நடைபெற்ற முக்கியமான போட்டிகளில் முறையே ப்ளூ ஸ்டார் மற்றும் ரெட் ஸ்டார் அணிகள் வெற்றிகளை தக்கவைத்துள்ளன.

சனிக்கிழமை நடைபெற்ற ப்ளூ ஸ்டார் மற்றும் டிபெண்டர்ஸ் அணிகளுக்கு இடையிலான போட்டியில் மொஹமட் இஷாக்கின் இரண்டு கோல்களின் உதவியுடன் ப்ளூ ஸ்டார் அணி வெற்றியை பெற்றுக்கொண்டது.

>>ரத்னம் அணியை வீழ்த்தி முதல் வெற்றியை பதிவுசெய்த நியூவ் யங்ஸ்<<

ஆட்டத்தின் 30ஆவது நிமிடத்தில் கொபி கொனாடு தட்டிக்கொடுத்த பந்தை கோல் கம்பத்துக்குள் செலுத்தி மொஹமட் இஷாக் முதல் கோலை பெற்றுக்கொடுத்து கோல் கணக்கை ஆரம்பித்தார். இதன் பின்னர் முதல் பாதியில் கோல்கள் பெறப்படாத நிலையில், 1-0 என ப்ளூ ஸ்டார் அணி முன்னிலை பெற்றது.

தொடர்ந்து ஆரம்பித்த இரண்டாவது பாதியின் 56ஆவது நிமிடத்தில் அணித்தலைவர் ஜெரி ஒம்பீபி பெனால்டி எல்லைக்கு அருகிலிருந்து தட்டிக்கொடுத்த பந்தை மொஹமட் இஷாக் ஹெடர் செய்து இரண்டாவது கோலை பெற்று அணியை 2-0 என முன்னிலைப்படுத்தினார்.

இதன் பின்னர் கோல் முயற்சிகளை மேற்கொண்ட டிபெண்டர்ஸ் அணிக்கு 61ஆவது நிமிடத்தில் பெனால்டி எல்லைக்குள் இருந்து சமோத் குமார தட்டிக்கொடுத்த பந்தை கோல் கம்பத்துக்குள் உதைத்து சௌந்தராஜ் அரவின்ராஜ் அணிக்கு முதல் கோலை பெற்றுக்கொடுத்தார்.

பின்னர் இறுதிவரை இரண்டு அணிகளும் கோல் முயற்சிகளை சரியாக நிறைவுசெய்யாத நிலையில், 2-1 என்ற கோல்கள் கணக்கில் ப்ளூ ஸ்டார் அணி வெற்றிபெற்று, 10 புள்ளிகளுடன் புள்ளிப்பட்டியலில் ஆறாவது இடத்தை பிடித்துள்ளது.

முழு நேரம் – ப்ளூ ஸ்டார்  வி.க 2 – 1 டிபெண்டர்ஸ் எப்.சி

கோல் பெற்றவர்கள் – மொஹமட் இஷாக் 30’, 56’ (ப்ளூ ஸ்டார்ஸ்), சௌந்தராஜ் அரவின்ராஜ் 61’ (டிபெண்டர்ஸ்)

இதேவேளை நேற்று (06) ஞாயிற்றுக்கிழமை நடைபெற்ற போட்டியில் ரத்னம் அணியை எதிர்கொண்ட ரெட் ஸ்டார் அணி 3 – 0 என்ற கோல்கள் கணக்கில் இலகுவான வெற்றியை பெற்றது.

தங்களுடைய முதல் வெற்றியை எதிர்நோக்கி களமிறங்கிய ரத்னம் அணியானது மீண்டும் தோல்வியை சந்தித்து வெற்றிபெறாத அணியாக இந்த தொடரை தொடர்கின்றது.

>>கடைசி நிமிட கோலுடன் போட்டியை சமப்படுத்திய கொழும்பு எப்.சி<<

ஆட்டத்தின் முதல் பாதியில் சிறப்பாக விளையாடி ரெட் ஸ்டார் அணியின் கோல் வாய்ப்புகளை ரத்னம் அணி தவிர்த்திருந்தது. முதல் பாதி கோலின்றி நிறைவடையும் என எதிர்பார்த்த தருணத்தில் ரெட் ஸ்டார் அணியின் கோர்னர் பகுதியிலிருந்து அசாண்டே ஜெரோம் உதைத்த பந்தினை முன்கள வீரர் சுபுன் தனஞ்சய இலாவகமாக கோலடித்து அணியின் கணக்கை ஆரம்பிக்க, முதல் பாதி 1-0 என நிறைவடைந்தது.

பின்னர் ஆரம்பித்த இரண்டாவது பாதியின் 69ஆவது நிமிடத்தில் பந்தினை மத்தியக்களத்துக்கு அருகிலிருந்து எடுத்துச்சென்ற அசாண்டே ஜெரோம் கோல் கீப்பரை ஏமாற்றி அணிக்கான இரண்டாவது கோலை பெற்றார்.

மீண்டும் ஆட்டநேரம் நிறைவுக்கு பின்னர் மேலதிகமாக வழங்கப்பட்ட நேரத்தின், 90+2 நிமிடத்தில் மொஹமட் ரிப்கான் ஹெடர் செய்து கோல் ஒன்றினை பெற்றுக்கொடுக்க, 3-0 என்ற கோல்கள் கணக்கில் ரெட் ஸ்டார் அணி வெற்றிபெற்றது. இதன்மூலம் தங்களுடைய நான்காவது வெற்றியை பெற்றுக்கொண்ட ரெட் ஸ்டார் அணி 14 புள்ளிகளுடன் தரவரிசையில் 4ஆவது இடத்துக்கு முன்னேறியுள்ளது.

முழுநேரம் – ரெட் ஸ்டார் எப்.சி 3 – 0 ரத்னம் வி.க

கோல் பெற்றவர்கள் – சுபுன் தனஞ்சய 45’, அசாண்டே ஜெரோம் 69’, மொஹமட் ரிப்கான் 90+2’

>> மேலும் கால்பந்து செய்திகளுக்கு <<