சாமிக்க அபாரம்; புள்ளிப்பட்டியலில் கோல் அணி தொடர்ந்து முதலிடம்

14ஆவது லங்கா பிரீமியர் லீக் (LPL) 2026 போட்டியில் தம்புள்ளை சிக்ஸர்ஸ் அணியை 44 ஓட்டங்கள் வித்தியாசத்தில் வீழ்த்தி கோல் கெலன்ட்ஸ் அணி, தொடரில் தனது நான்காவது வெற்றியைப் பதிவு செய்து அசத்தியுள்ளது.

>>ஜப்னா கிங்ஸ் அணியிடம் படுதோல்வியடைந்த கண்டி ரோயல்ஸ்<<

மேலும் இந்த வெற்றியுடன் கோல் அணியானது, இந்த LPL தொடரின் அணிகளுக்கான புள்ளிகள் பட்டியலில் தொடர்ந்தும் முதலிடத்தில் நீடிக்கின்றது.

தம்புள்ளையில் நேற்று (26) ஆரம்பித்த இந்தப் போட்டியின் நாணயச் சுழற்சியில் வென்ற முதலில் துடுப்பாடிய கெலன்ட்ஸ் அணி, சாமிக்க கருணாரட்னவின் அதிரடி ஆட்டத்தோடு 20 ஓவர்களில் 6 விக்கெட் இழப்பிற்கு 220 ஓட்டங்களைப் பெற்றுக் கொண்டது.

கோல் கெலன்ட்ஸ் அணியின் துடுப்பாட்டத்தில் ஆரம்பவீரர் சேம் ஹர்ப்பர் 27 பந்துகளில் 5 பௌண்டரிகள் மற்றும் ஒரு சிக்ஸர் அடங்கலாக 41 ஓட்டங்கள் எடுத்தார். அதேநேரம் முதல் இன்னிங்ஸின் பிந்திய ஓவர்களில் களமிறங்கிய சாமிக்க கருணாரட்ன வெறும் 34 பந்துகளில் 4 பௌண்டரிகள் மற்றும் 6 சிக்ஸர்களுடன் ஆட்டமிழக்காமல் 72 ஓட்டங்கள் விளாசியிருந்தார்.

தம்புள்ளை சிக்ஸர்ஸ் அணியின் பந்துவீச்சில் துஷ்மந்த சமீர 55 ஓட்டங்களை வாரி வழங்கியிருந்த போதும் 5 விக்கெட்டுகளைக் கைப்பற்றியிருந்தார்.

>>விஷ்மி – ஹர்ஷிதாவின் அபார சதங்களால் பாகிஸ்தானை வீழ்த்தியது இலங்கை<<

பின்னர் கடினமான வெற்றி இலக்கான 221 ஓட்டங்களை அடைய பதிலுக்கு துடுப்பாடிய தம்புள்ளை சிக்ஸர்ஸ் அணி 20 ஓவர்களில் 7 விக்கெட் இழப்பிற்கு 176 ஓட்டங்கள் மட்டுமே எடுத்து தோல்வியடைந்தது.

தம்புள்ளை துடுப்பாட்டத்தில் அதிகபட்சமாக ரமேஷ் மெண்டிஸ் ஆட்டமிழக்காமல் 22 பந்துகளில் 39 ஓட்டங்களும் எடுத்தார்.  கோல் கெலன்ட்ஸ் பந்துவீச்சில் சுழற்பந்துவீச்சாளர் சசிந்து கொலம்பகே 3 முக்கிய விக்கெட்டுக்களை வீழ்த்தியிருந்தமை குறிப்பிடத்தக்கது.

போட்டியின் ஆட்டநாயகனாக சாமிக்க கருணாரட்ன தெரிவாகியிருந்தார். இந்தப் போட்டியோடு லங்கா பிரீமியர் லீக் தொடரின் தம்புள்ளை மைதான ஆட்டங்கள் அனைத்தும் நிறைவடைவதோடு, எஞ்சிய லீக் போட்டிகள் கண்டி பல்லேகலேவில் நாளை (28) தொடக்கம் இடம்பெறவிருக்கின்றன.

>>மேலும் கிரிக்கெட் செய்திகளைப் படிக்க<<