ஜனித், ரூபின் ஹேர்மன் அபாரம்; கொழும்பு கேப்ஸ் இலகு வெற்றி

லங்கா பிரீமியர் லீக் 2026 தொடரின் 9ஆவது போட்டியில், கொழும்பு கேப்ஸ் அணி, கண்டி ரோயல்ஸ் அணியை 23 ஓட்டங்களால் வீழ்த்தி தொடரில் இரண்டாவது வெற்றியைப் பதிவு செய்துள்ளது.

மறுமுனையில் இப்போட்டியில் தோல்வியினைத் தழுவிய கண்டி ரோயல்ஸ் அணிக்கு அது தொடரில் மூன்றாவது தோல்வியாக மாறியுள்ளது.

>>சகலதுறையிலும் பிரகாசித்த இந்திய இளையோருக்கு டெஸ்ட் தொடர் வெற்றி<<

தம்புள்ளையில் இன்று (23) ஆரம்பமான போட்டியின் நாணய சுழற்சியில் வென்ற கண்டி ரோயல்ஸ் அணி முதலில் பந்துவீச்சைத் தெரிவு செய்தது. அதன்படி முதலில் துடுப்பாடிய கொழும்பு கேப்ஸ் அணி தொடக்கம் முதலே அதிரடியாக விளையாடி வலுவான அடித்தளத்தை அமைத்தது.

கொழும்பு அணியின் துடுப்பாட்டத்தில் ஜனித் லியனகே மற்றும் ரூபின் ஹேர்மன் ஆகியோர் அதிரடி காட்ட அவ்வணி 20 ஓவர்கள் முடிவில் 9 விக்கெட்டுக்களை இழந்து 192 ஓட்டங்கள் குவித்துக் கொண்டது.

கொழும்பு அணிக்காக அரைச்சதம் பெற்ற வீரர்களில் ரூபின் ஹேர்மன் 36 பந்துகளுக்கு ஒரு சிக்ஸர் மற்றும் 7 பௌண்டரிகள் அடங்கலாக 53 ஓட்டங்கள் குவிக்க, ஜனித் லியனகே 2 சிக்ஸர்கள் மற்றும் 3 பௌண்டரிகள் உடன் 52 ஓட்டங்கள் பெற்றார்.

>>பாகிஸ்தான் தொடரிலிருந்து காவ்யா காவிந்தி திடீர் விலகல்<<

கண்டி அணியின் பந்துவீச்சில் சஹீன் அப்ரிடி, மொயின் அலி மற்றும் துஷான் ஹேமன்த ஆகியோர் தலா 2 விக்கெட்டுக்கள் வீதம் கைப்பற்றினர்.

பின்னர் 193 ஓட்டங்கள் என்கிற இலக்கை நோக்கி களமிறங்கிய கண்டி ரோயல்ஸ் அணிக்கு தொடக்கம் சவாலாக அமைந்ததுடன் அவர்கள்  20 ஓவர்கள் முடிவில் 8 விக்கெட்டுக்களை இழந்து 169 ஓட்டங்கள் மட்டுமே எடுத்து போட்டியில் தோல்வி அடைந்தனர்.

கண்டி அணியின் துடுப்பாட்டத்தில் அதிகபட்சமாக அதன் தலைவர் அஞ்செலோ மெதிவ்ஸ் 24 பந்துகளில் 39 ஓட்டங்கள் பெற்று ஆட்டமிழக்காது காணப்பட்டிருந்தார். கொழும்பு கேப்ஸ் பந்துவீச்சில் முஜிபுர் ரஹ்மான் 3 விக்கெட்டுக்களைச் சாய்த்து தனது தரப்பு வெற்றியினை உறுதி செய்தார். போட்டியின் ஆட்டநாயகன் விருது ஜனித் லியனகேவிற்கு வழங்கப்பட்டது.

>>மேலும் கிரிக்கெட் செய்திகளைப் படிக்க<<