வட மாகாண பாடசாலைகளான வட்டுக்கோட்டை யாழ்ப்பாண கல்லூரி மற்றும் யாழ். புனித பத்திரிசியார் கல்லூரி இடையிலான 109ஆவது பொன் அணிகளின் சமர், கிரிக்கெட் பெரும் போட்டியின் முதல் நாள் ஆட்ட நிறைவில் யாழ். புனித பத்திரிசியார் கல்லூரி துடுப்பாட்டம் மற்றும் பந்துவீச்சு என இரண்டிலும் தனது ஆதிக்கத்தினை வெளிப்படுத்தியுள்ளது.
>>92 ஆவது புனிதர்களின் சமர் மார்ச் 19 இல் ஆரம்பம்
வட்டுக்கோட்டை யாழ்ப்பாண கல்லூரியின் சொந்த மைதானத்தில் இன்று (12) ஆரம்பமாகிய மூன்று நாட்கள் கொண்ட இந்தப் போட்டியில் நாணய சுழற்சியில் வென்ற யாழ். புனித பத்திரிசியார் கல்லூரி அணியானது முதலில் துடுப்பாடும் சந்தர்ப்பத்தினை யாழ்ப்பாண கல்லூரிக்கு வழங்கியது.
அதன்படி போட்டியில் முதல் துடுப்பாட்டத்தினை ஆரம்பம் செய்த யாழ்ப்பாண கல்லூரி அணியினர் மந்தகதியில் ஓட்டங்கள் குவித்து தமது முதல் இன்னிங்ஸ் துடுப்பாட்டத்தினை கட்டமைக்கத் தொடங்கினர்.
இந்த நிலையில் அணியின் முதல் விக்கெட்டாக சுபேஷன் தக்ஷிலன் 07 ஓட்டங்களுடன் ஆட்டமிழந்தார். எனினும் அணிக்கு ரொபின்சன் உதயகுமார் நம்பிக்கை வழங்கி 41 ஓட்டங்கள் பெற்றுக் கொடுத்தார்.
அவரின் பின்னர் மத்திய வரிசையில் களம் வந்திருந்த ஹேமிஷ் ஹர்மிஷோன் யாழ்ப்பாண கல்லூரி அணிக்கு நம்பிக்கை வழங்கினார். அரைச்சதம் விளாசிய ஹர்மிஷோன் 5 பௌண்டரிகள் அடங்கலாக 61 ஓட்டங்கள் பெற்றார்.
ஹர்மிஷோனின் விக்கெட்டின் பின்னர் தடுமாறத் தொடங்கிய யாழ்ப்பாணக் கல்லூரி 79 ஓவர்களில் அனைத்து விக்கெட்டுக்களையும் இழந்து 176 ஓட்டங்கள் பெற்றுக் கொண்டனர்.
புனித பத்திரிசியார் கல்லூரி அணியின் பந்துவீச்சில் மதியழகன் ஸ்டீப் வெறும் 25 ஓட்டங்களுக்கு 4 விக்கெட்டுக்களையும், ஜபின்ஷன் கெமிஷன் 3 விக்கெட்டுக்களையும் சுருட்டினர்.
>>முரளி திசோனின் அபார துடுப்பாட்டத்தால் யாழ். மத்தி வடக்கின் சமரில் வெற்றி
அதனையடுத்து தமது முதல் இன்னிங்ஸ் துடுப்பாட்டத்தினை ஆரம்பம் செய்த புனித பத்திரிசியார் கல்லூரி அணியானது முதல் நாள் ஆட்டநிறைவில் 40 ஓட்டங்களுக்கு விக்கெட் இழப்பின்றி காணப்படுகின்றது. புனித பத்திரிசியார் கல்லூரி அணிக்கு நம்பிக்கை வழங்கும் சிவநாதன் செஹான் 13 ஓட்டங்களுடனும், ஹரின் அட்ரியன் 24 ஓட்டங்களுடனும் காணப்படுகின்றனர்.
>>மேலும் கிரிக்கெட் செய்திகளைப் படிக்க<<
