வடமாகாண பாடசாலைகளான யாழ்ப்பாணம் மத்திய கல்லூரி மற்றும் யாழ்ப்பாணம் சென். ஜோன்ஸ் கல்லூரி இடையிலான 119ஆவது வடக்கின் சமர் கிரிக்கெட் பெரும் போட்டியின் முதல் நாள் ஆட்டம், யாழ். மத்திய கல்லூரி மற்றும் சென். ஜோன்ஸ் கல்லூரி ஆகியவற்றின் பந்துவீச்சு ஆதிக்கத்தோடு நிறைவடைந்திருக்கின்றது.
>>பாகிஸ்தான் ஒருநாள் குழாத்திலிருந்து பாபர் அசாம் அதிரடி நீக்கம்<<
யாழ். மத்திய கல்லூரியின் சொந்த மைதானத்தில் இன்று (05) தொடங்கிய இந்தப் போட்டியில் நாணய சுழற்சியில் வெற்றி பெற்றிருந்த யாழ். மத்திய கல்லூரி அணியின் தலைவர் அன்தனேஸ்வரன் அபிஷேக் முதலில் சென். ஜோன்ஸ் கல்லூரி அணியினைத் துடுப்பாடப் பணித்தார்.
அதன்படி முதலில் துடுப்பாடிய சென். ஜோன்ஸ் மெதுவான ஆரம்பத்தினை பெற்ற நிலையில் அதன் முதல் விக்கெட்டாக உதயனன் அபிஜோய்சாந்த் 16 ஓட்டங்களுடன் ஆட்டமிழந்தார். சென். ஜோன்ஸ் கல்லூரி அணியின் முதல் விக்கெட்டினைக் கைப்பற்றிய இடதுகை சுழல்வீரரான முரளி திசோன் தொடர்ந்தும், அவ்வணிக்கு நெருக்கடிக்கு உருவாக்கினார்.
பின்னர் எதிரணியின் சுழல்பந்துவீச்சாளர்கள் காரணமாக சிறந்த இணைப்பாட்டம் ஒன்றை உருவாக்கத் தவறியிருந்த சென். ஜோன்ஸ் கல்லூரி அணியானது குறுகிய இடைவெளிகளில் விக்கெட்டுக்களை இழந்து இறுதியில் 42.2 ஓவர்களில் அனைத்து விக்கெட்டுக்களையும் பறிகொடுத்து முதல் இன்னிங்ஸ் துடுப்பாட்டத்திற்காக 119 ஓட்டங்கள் மட்டுமே பெற்றது.
சென். ஜோன்ஸ் கல்லூரி அணியின் துடுப்பாட்டம் சார்பாக அதிகபட்சமாக சற்குணராஜா வினுக்ஷன் 22 ஓட்டங்கள் பெற, முரளி திசோன் யாழ். மத்தி அணியின் பந்துவீச்சு சார்பில் 39 ஓட்டங்களுக்கு சாய்த்தார். அதேநேரம் வலன்டின் ஹரிஸ் 37 ஓட்டங்களுக்கு 3 விக்கெட்டுக்களைச் சுருட்டினார்.
இதன் பின்னர் தமது முதல் இன்னிங்ஸ் துடுப்பாட்டத்தினை ஆரம்பம் செய்த யாழ். மத்திய கல்லூரி அணியும் துடுப்பாட்டத்தில் தடுமாறியது. கௌசிகனின் பந்துவீச்சினை முகம் கொடுப்பதில் சிக்கலை எதிர்கொண்ட அவர்கள் 40 ஓவர்கள் நிறைவில் அனைத்து விக்கெட்டுக்களையும் இழந்து 95 ஓட்டங்கள் மாத்திரமே முதல் இன்னிங்ஸில் பெற்றனர்.
யாழ். மத்திய கல்லூரி அணியின் துடுப்பாட்டம் சார்பாக அன்தனேஸ்வரன் அபிஷேக் அதிகபட்சமாக 23 ஓட்டங்கள் எடுத்தார். சென். ஜோன்ஸ் கல்லூரி அணியின் பந்துவீச்சில் கணேஷமூர்த்தி கெளசிகன் 41 ஓட்டங்களுக்கு 5 விக்கெட்டுக்களை எடுத்தார். மறுமுனையில் சென். ஜோன்ஸ் கல்லூரி தலைவைரான மர்பின் ரண்டயோ 19 ஓட்டங்களுக்கு 3 விக்கெட்டுக்களை கைப்பற்றினர்.
பின்னர் 24 ஓட்டங்கள் முன்னிலை பெற்றவாறு இரண்டாவது இன்னிங்ஸ் துடுப்பாட்டத்தினை தொடங்கிய சென். ஜோன்ஸ் கல்லூரி அணியானது முதல்நாள் ஆட்டநிறைவில் ஓட்டங்கள் எதுவுமின்றி காணப்படுகின்றது.
>> மேலும் கிரிக்கெட் செய்திகளைப் படிக்க <<
