இலங்கை மகளிர் கிரிக்கெட் அணிக்கு எதிரான ஒருநாள் தொடரின் இறுதிப் போட்டியில், மேற்கிந்திய தீவுகள் மகளிர் கிரிக்கெட் அணியானது 6 விக்கெட்டுக்களால் வெற்றி பெற்று தொடரில் ஆறுதல் வெற்றியினை பதிவு செய்துள்ளது.
>>நியூசிலாந்திடம் படுதோல்வி அடைந்த இலங்கை; அரையிறுதி வாய்ப்பையும் இழந்தது<<
எனினும் இந்த தொடரின் முதல் இரண்டு போட்டிகளில் வென்று இலங்கை மகளிர் அணியானது தொடரை 2-1 எனக் கைப்பற்றியுள்ளது. கிரனடாவில் புதன்கிழமை (25) ஆரம்பமாகிய ஒருநாள் தொடரின் மூன்றாவது போட்டியில் நாணய சுழற்சியில் வென்ற இலங்கை மகளிர் தலைவி சாமரி அத்தபத்து முதலில் துடுப்பாட்டத்தினை தெரிவு செய்திருந்தார்.
பின்னர் முதல் துடுப்பாட்டத்தினை ஆரம்பம் செய்த இலங்கை மகளிர் அணியானது 50 ஓவர்கள் முடிவில் 7 விக்கெட்டுகளை இழந்து 217 ஓட்டங்கள் எடுத்தது.
இலங்கைத் துடுப்பாட்டத்தில் ஹர்ஷிதா சமரவிக்ரம பொறுப்புடன் ஆடி 70 ஓட்டங்கள் குவித்தார். அதேநேரம் கவிஷா டில்ஹாரி ஆட்டமிழக்காமல் 45 ஓட்டங்கள் எடுத்தார்.
மேற்கிந்தியத் தீவுகள் பந்துவீச்சில் ஹேலி மெதிவ்ஸ் மற்றும் கரீஷ்மா ரம்ஹராக் ஆகியோர் தலா 2 விக்கெட்டுக்கள் வீதம் கைப்பற்றியிருந்தமை குறிப்பிடத்தக்கது.
>>2026 மகளிர் T20 உலகக் கிண்ணம்; போட்டி அட்டவணை மற்றும் அணிகள் விபரம் வெளியீடு<<
பின்னர் 218 ஓட்டங்கள் எடுத்தால் வெற்றி என களமிறங்கிய மேற்கிந்தியத் தீவுகள் அணிக்கு ஹேலி மெதிவ்ஸ் சதம் விளாச, அவ்வணியானது போட்டியின் வெற்றி இலக்கினை 46 ஓவர்களில் 4 விக்கெட்டுக்களை இழந்து 218 ஓட்டங்கள் பெற்று அடைந்து கொண்டது.
மேற்கிந்திய தீவுகள் அணியின் வெற்றியினை உறுதி செய்த ஹேலி மெதிவ்ஸ் 13 பௌண்டரிகள் மற்றும் ஒரு சிக்ஸர் அடங்கலாக 100 ஓட்டங்கள் பெற்றார். மறுமுனையில் அவருக்கு ஒத்துழைப்பு அளித்த அனுபவ வீராங்கனை ஸ்டபனி டெய்லர் 38 ஓட்டங்கள் எடுத்தார்.
இலங்கை மகளிர் அணியின் பந்துவீச்சில் மால்கி மாதரா 33 ஓட்டங்களுக்கு 2 விக்கெட்டுக்களைச் சாய்த்தும் அவரது பந்துவீச்சு வீணாகியது. போட்டியின் ஆட்டநாயகியாக ஹேலி மெதிவ்ஸ் தெரிவாக, தொடர் நாயகியாக ஹர்ஷிதா சமரவிக்ரம தெரிவானார்.
ஒருநாள் தொடரினை அடுத்து இரு அணிகளுக்கும் இடையிலான மூன்று போட்டிகள் கொண்ட T20 தொடர் பெப்ரவரி 28ஆம் திகதி தொடங்குகின்றது.
ஸ்கோர் விபரம்
இலங்கை: 217/7 (50) – ஹர்ஷிதா சமரவிக்ரம 70, கவிஷா 45*, ஹேலி மெதிவ்ஸ் 33/2(10)
மேற்கிந்திய தீவுகள்: 218/4 (46) – ஹேலி மெதிவ்ஸ் 100, ஸ்டபனி டெய்லர் 38, மால்கி மாதரா 33/2(10)
முடிவு: மேற்கிந்திய தீவுகள் 6 விக்கெட்டுக்களால் வெற்றி
>>மேலும் கிரிக்கெட் செய்திகளைப் படிக்க<<
