මදුශංක සිම්බාබ්වේ කණ්ඩායම අමාරුවේ දමයි

ජයග්‍රහණය ලකුණු 10ක් මෙපිටින් සිටිය දී ඩිල්ශාන් මදුශංක විසින් දවා ගත් කඩුලු ත්‍රිත්වයත් සමඟින් සිම්බාබ්වේ කණ්ඩායම සමඟින් පැවැති එක්දින ජාත්‍යන්තර ක්‍රිකට්  තරගයෙන් ලකුණු 7ක ජයග්‍රහණයක් ලබා ගැනිමට ශ්‍රී ලංකා ක්‍රීඩකයෝ අද (29) සමත් වුණා.  

Harare නුවර දී පැවැති මෙම තරගයේ කාසියේ වාසිය ජයග්‍රහණය කළ සිම්බාබ්වේ නායකයාගේ ආරාධනාව අනුව පළමුවෙන් පන්දුවට පහර දීමට පිටියට පිවිසි ශ්‍රී ලංකා ක්‍රීඩකයෝ කඩුලු 6ක් දැවී ලකුණු 298ක් ලබා ගත් අතර ඊට පිළිතුරු ලෙසින් සත්කාරක සිම්බාබ්වේ ක්‍රීඩකයන්ට ලබා ගැනීමට හැකි වෙන්නේ කඩුලු 8ක් දැවී ලකුණු 291ක් පමණයි.  

ශ්‍රී ලංකා කණ්ඩායම 

චරිත් අසලංක (නායක), පැතුම් නිස්සංක, නිශාන් මදුශ්ක, කුසල් මෙන්ඩිස්, සදීර සමරවික්‍රම, ජනිත් ලියනගේ, කමිඳු මෙන්ඩිස්, දුෂ්මන්ත චමීර, මහීෂ් තීක්ෂණ, අසිත ප්‍රනාන්දු සහ ඩිල්ශාන් මදුශංක. 

 

සිම්බාබ්වේ කණ්ඩායම 

Sean Williams (නායක), Brian Bennett, Ben Curran, Brendan Taylor (කඩුලු රකින්නා), Sikandar Raza, Wessly Madhevere, Tony Munyonga, Brad Evans, Richard Ngarava, Blessing Muzarabani සහ Trevor Gwandu.  

තරගයේ පළමුවෙන් පන්දුවට පහර දීමට පිටියට පිවිසි ශ්‍රී ලංකා ඉනිමේ පළමු කඩුල්ල ලකුණු 9ක් වෙද්දී දවා ගැනීමට ප්‍රතිවාදීන් සමත් වෙනවා. ඒ නිශාන් මදුශංක ලකුණු ලබා ගැනීමට ප්‍රථමයෙන් ම දවා ගනිමිනුයි.  

නමුත් 2 වැනි කඩුල්ලට ලකුණු 100ක සබඳතාවක් එක් කරමින් තම කණ්ඩායම වැටි සිටි තත්ත්වයෙන් ගොඩ දැමීමට පැතුම් නිස්සංක සහ කුසල් මෙන්ඩිස් සමත් වෙනවා.  

කුසල් මෙන්ඩිස් පන්දු 63ක දී හතරේ පහර 3ක් සමඟින් ලකුණු 38කට දැවී යෑමත් සමඟින් එම කඩුල්ලේ සබඳතාව බිඳ වැටෙනවා. අනතුරු ව පැතුම් නිස්සංකට එක් වූයේ සදීර සමරවික්‍රම. ඔවුන් 3 වැනි කඩුල්ලට ලකුණු 30ක් එක් කරද්දී පැතුම් නිස්සංක ද දැවී යනවා.  

ඒ වෙද්දී ඔහු පන්දු 92කට මුහුණ දෙමින් හතරේ පහර 12ක් සමඟින් ලකුණු 76ක් ලබා සිටියා. සදීර සමරවික්‍රම ලබා ගත් ලකුණු සංඛ්‍යාව 35ක්. ඔහු ඊට පන්දු 40ක් වැය කළ අතර හතරේ පහර 5ක් ඊට එක් කර තිබුණා. 

අද තරගයේ දී නායක චරිත් අසලංකට රැස් කර ගැනීමට හැකි වූයේ ලකුණු 6ක් පමණයි. ඔහුගේ දැවී යෑමෙන් අනතුරු ව පිටියේ එක් වූ ජනිත් ලියනගේ සහ කමිඳු මෙන්ඩිස් එක් ව 6 වැනි කඩුල්ලට ලකුණු 137ක සබඳතාවක් එක් කරමින් ශ්‍රී ලංකා ලකුණු පුවරුව ගෞරවනීය තත්ත්වයකට ගෙන එනවා.  

එහි දී ජනිත් ලියනගේ පන්දු 47කට මුහුණ දෙමින් හතරේ පහර 6ක් සහ හයේ පහර 3ක් සමඟින් නොදැවී ලකුණු 70ක් ද සහ කමිඳු මෙන්ඩිස් පන්දු 36කට මුහුණ දෙමින් හතරේ පහර 4ක් සහ හයේ පහරක් සමඟින් ලකුණු 57ක් ද රැස් කළා.  

කඩුලු දවා ගැනීමේ දී Richard Ngarava කඩුලු 2ක් දවා ගත් අතර ඊට අමතර ව Sean Williams, Sikandar Raza, Trevor Gwandu සහ Blessing Muzarabani කඩුල්ල බැගින් දවා ගත්තා.  

• සිම්බාබ්වේ සමඟ ගැටීමට වෙනස්කම් රැසක් සහිත ශ්‍රී ලංකා T20 සංචිතයක්
• පළමු පෙළ ක්‍රීඩකයින් සහ සහය කාර්ය මණ්ඩල සාමාජිකයින්ට රක්ෂණ ආවරණයක්
• කොදෙව් යන යොවුන් බලඇණිය නම් කරයි
• එංගලන්ත ක්‍රිකට් කණ්ඩායම ශ්‍රී ලංකාවේ තරග සංචාරයකට සූදානම් වෙයි
• 2025 LPL තරගාවලියට දින වකවානු තහවුරු වෙයි 

සිම්බාබ්වේ කණ්ඩායමේ පිළිතුරු ඉනිමේ පළමු කඩුලු ද්විත්වය පළමු පන්දුවාරයේ දී ම දවා ගැනීමට අසිත ප්‍රනාන්දු සමත් වීම කැපී පෙණුනා. නමුත් ඉන් අනතුරුව 3 වැනි කඩුල්ලට ලකුණු 118ක සබඳතාවක් එක් කිරීමට Ben Curran සහ නායක Sean Williams සමත් වෙනවා.  

Sean Williams පන්දු 54කට මුහුණ දෙමින් හතරේ පහර 7ක් සහ හයේ පහර 2ක් සමඟින් ලකුණු 57ක් ලබා සිටිය දී දැවී යෑමත් සමඟින් එම කඩුල්ලේ සබඳතාව බිඳී යනවා. ඔහුගේ දැවී යෑමෙන් අනතුරු ව කඩුල්ලට Ben Curran දැවී යන අතර ඒ වෙද්දී ඔහු පන්දු 90කට මුහුණ දෙමින් හතරේ පහර 8ක් සමඟින් ලකුණු 70ක් ලබා සිටියා.  

සිම්බාබ්වේ කණ්ඩායමේ 5 වැනි කඩුල්ල ලකුණු 161 දී දැවී යන අතර ඒ වෙද්දී ඔවුන්ට ජයග්‍රහණය වෙනුවෙන් අවශ්‍ය වූයේ පන්දු 120ක දී ලකුණු 137ක් පමණයි. එම අවස්ථාවේ පිටියේ එක් ව සිටි  Sikandar Raza සහ Tony Munyonga ඉන් ලකුණු 128ක් එක් කිරීමට සමත් වෙනවා.  

ඒ අනුව ඔවුන්ට අවසන් පන්දුවාරයේ දී ජයග්‍රහණය සඳහා අවශ්‍ය වූයේ ලකුණු 10ක් පමණයි. ඒ සඳහා ඔවුන් සතුව තවත් කඩුලු  5ක් ඉතිරි තිබූ අතර පන්දු යැවීම බාර වූයේ ඩිල්ශාන් මදුශංක වෙතයි.  

ඔහු යැවුණ පළමු පන්දුවේ දී ම එතෙක් සාර්ථක සබඳතාවක් එක් කරමින් තිබූ 6 වැනි කඩුල්ලේ සබඳතාව බිඳ දැමෙනවා. එහි දී ඔහුගේ පළමු බිල්ල බවට පත් වෙන්නේ Sikandar Raza. ඔහු 7 වැනි කඩුල්ල ලෙසින් දැවී යද්දී පන්දු 87කට මුහුණ දෙමින් හතරේ පහර 8ක් සමඟින් ලකුණු 92ක් ලබා සිටියා.  

අනතුරු ව යැවුණ පිට පිට පන්දු ද්විත්වයේ දී Brad Evans සහ Richard Ngarava ද දවා ගනිමින් තම එක්දින ජාත්‍යන්තර තරග පිටියේ පළමු කඩුලු ත්‍රිත්වය වාර්තා කිරීමට ඩිල්ශාන් මදුශංක සමත් වෙනවා. ඒ අනුව ඔහු ශ්‍රී ලංකාව වෙනුවෙන් එක්දින ජාත්‍යන්තර කඩුලු ත්‍රිත්වයක් වාර්තා කළ 8 වැනි පන්දු යවන්නා බවට පත් වෙනවා.  

ඔහු  එම පන්දුවාරය අවසන් කරන්නේ ලකුණු 2ක් පමණක් ලබා දෙමින් වන අතර එම පන්දුවාරයෙන් අවසන් වූ ඔහුගේ පන්දු යැවීම ලකුණු 62කට කඩුලු 4ක් බවට පත් ව තිබුණා.  

ඊට අමතර ව අසිත ප්‍රනාන්දු ලකුණු 50කට කඩුලු 3ක් ද සහ කමිඳු මෙන්ඩිස් ද කඩුල්ලක් දවා ගෙන තිබූණා. සිම්බාබ්වේ ඉනිම අවසන් වෙද්දී Tony Munyonga පන්දු 52කට මුහුණ දෙමින් හතරේ පහරක් සමඟින් නොදැවී ලකුණු 43ක් ලබා සිටියා.  

තරගයේ කෙටි ලකුණු පුවරුව 

• ශ්‍රී ලංකාව – කඩුලු 6ක් දැවී 298 (50.0) පැතුම් නිස්සංක 76, කුසල් මෙන්ඩිස් 38, සදීර සමරවික්‍රම 35, ජනිත් ලියනගේ නොදැවී 70, කමිඳු මෙන්ඩිස් 57, Richard Ngarava 2/34
• සිම්බාබ්වේ – කඩුලු 8ක් දැවී 291 (50.0) Ben Curran 70, Sean Williams 57, Sikandar Raza 92, Tony Munyonga නොදැවී 43, අසිත ප්‍රනාන්ද 3/50, ඩිල්ශාන් මදුශංක 4/62

ශ්‍රී ලංකා කණ්ඩායමට ලකුණු 7ක ජයක්.  

• තරගයේ වීරයා ඩිල්ශාන් මදුශංක (ශ්‍රී ලංකාව) 

 තරගාවලියේ උණුසුම් පුවත් සහ දෙස් විදෙස් ක්‍රීඩා පිටියේ උණුසුම් පුවත් දැන ගැනීමට රැදී සිටින්න ThePapare.com අප සමඟ ම. 

>> තවත් ක්‍රිකට් පුවත් සඳහා පිවිසෙන්න <<