ராவல்பிண்டியில் இன்று (29) இடம்பெற்று முடிந்த இலங்கை – பாகிஸ்தான் அணிகள் இடையிலான முத்தரப்பு T20I தொடரின் இறுதிப் போட்டியில், பாகிஸ்தான் அணி 6 விக்கெட்டுக்களால் வெற்றி பெற்று, தொடரின் சம்பியன் பட்டத்தையும் சுவீகரித்துள்ளது.
>>பாதிக்கப்பட்டுள்ள மக்களுக்கு உதவும் இலங்கை கிரிக்கெட் அணி
போட்டியில் முன்னதாக நாணயச் சுழற்சியில் வென்ற பாகிஸ்தான் அணியின் தலைவர் சல்மான் அகா முதலில் பந்துவீசத் தீர்மானித்தார்.
அதன்படி முதலில் துடுப்பெடுத்தாட நிர்ப்பந்திக்கப்பட்ட இலங்கை அணி சிறந்த ஆரம்பத்தினைப் பெற்றுக் கொண்டது. கமில் மிஷார அதிரடி கலந்த நிதானத்துடன் இலங்கை அணியின் ஓட்டங்களை உயர்த்தியதோடு, இப்போட்டியில் அரைச்சதமும் பதிவு செய்தார். அவர் 47 பந்துகளில் 4 சிக்ஸர்கள் மற்றும் 2 பௌண்டரிகள் அடங்கலாக 59 ஓட்டங்களை எடுத்திருந்தார்.
எனினும் அவரின் விக்கெட்டினை அடுத்து இலங்கை பாகிஸ்தானின் சுழலுக்கு தடுமாறத் தொடங்கியது. அந்தவகையில் ஒரு கட்டத்தில் 84 ஓட்டங்களுக்கு ஒரு விக்கெட்டினை மாத்திரம் இழந்து காணப்பட்ட இலங்கை அணியானது எஞ்சிய அனைத்து விக்கெட்டுக்களையும் வெறும் 30 ஓட்ட இடைவெளியில் இழந்து 19.1 ஓவர்களுக்கு 114 ஓட்டங்களை மட்டுமே பெற்றது.
அபாரமாகச் செயற்பட்ட பாகிஸ்தான் அணியின் பந்துவீச்சில் சுழற்பந்துவீச்சாளரான மொஹமட் நவாஸ் தனது 4 ஓவர்களில் வெறும் 17 ஓட்டங்களை மட்டுமே விட்டுக்கொடுத்து 3 விக்கெட்டுகளைக் கைப்பற்றினார். வேகப்பந்துவீச்சாளர் ஷஹீன் அப்ரிடியும் 3 விக்கெட்டுகளை எடுக்க, அப்றார் அஹ்மட் 2 விக்கெட்டுக்களை சுருட்டினார்.
பின்னர் வெறும் 115 ஓட்டங்கள் எடுத்தால் வெற்றி என்ற இலக்குடன் களமிறங்கிய பாகிஸ்தான் அணியின் தொடக்கம் வலுவாக இருந்தது. சயீம் அய்யூப் மற்றும் சாஹிப்சதா பர்ஹான் ஆகியோர் விரைவாக ஓட்டங்களைக் குவித்தனர். சயிம் அயூப் 36 ஓட்டங்களுடன் ஆட்டமிழக்க, பாபர் அசாம் பொறுப்புடன் துடுப்பெடுத்தாடி அணியை வெற்றிக்கு இட்டுச் சென்றார்.
>>சீரற்ற காலநிலையால் உள்ளூர் கிரிக்கெட், கால்பந்து, ரக்பி போட்டிகள் ஒத்திவைப்பு
பாகிஸ்தான் அணி இறுதிக் கட்டத்தில் சில விக்கெட்டுகளை இழந்தபோதும், பாபர் அசாம் 34 பந்துகளில் 37 ஓட்டங்கள் எடுக்க பாகிஸ்தான் 18.4 ஓவர்களில் 4 விக்கெட்டுகளை மாத்திரம் இழந்து 118 ஓட்டங்களை எடுத்து இலக்கை அடைந்தது.
இலங்கை அணியின் பந்துவீச்சில் பவன் ரத்நாயக்க 11 ஓட்டங்களுக்கு 2 விக்கெட்டுக்களையும் கைப்பற்றியும் அது வீணாகியது. பாகிஸ்தானின் வெற்றிக்காக பந்துவீச்சில் பெரும் பங்களித்த மொஹமட் நவாஸ் ஆட்ட நாயகனாகவும், தொடர் நாயகனாவும் தெரிவு செய்யப்பட்டார்.
>>மேலும் கிரிக்கெட் செய்திகளைப் படிக்க<<




















