இலங்கை மற்றும் நியூசிலாந்து A கிரிக்கெட் அணிகளுக்கு இடையிலான ஒருநாள் தொடரின் இரண்டாவது போட்டியில், இலங்கை A அணியானது 44 ஓட்டங்களால் டக்வத் லூயிஸ் முறையில் வெற்றியினைப் பதிவு செய்திருக்கின்றது.
>>சகலதுறையிலும் பிரகாசித்த இலங்கை 19 வயதின் கீழ் மகளிர் அணிக்கு முதல் வெற்றி <<
இன்னும் இந்த வெற்றியுடன் இலங்கை A அணியானது ஒருநாள் தொடரினையும் இன்னும் ஒரு போட்டி மீதமிருக்க 2-0 எனக் கைப்பற்றியுள்ளது.
முன்னதாக ஹம்பாந்தோட்டையில் ஆரம்பமாகிய இந்தப் போட்டியில் நாணய சுழற்சியில் வென்று முதலில் துடுப்பாடிய இலங்கை A அணி, லசித் குரூஸ்புள்ளேவின் அதிரடிச் சதம், சொனால் தினுஷ மற்றும் லசித் குரூஸ்புள்ளே ஆகியோரது அதிரடி அரைச்சதங்கள் என்பவற்றின் உதவி காரணமாக 50 ஓவர்களில் 9 விக்கெட்டுக்களை இழந்து 368 ஓட்டங்களைக் குவித்தது.
இலங்கை A அணியின் துடுப்பாட்டம் சார்பாக ஆரம்ப வீரராக களமிறங்கிய லசித் குரூஸ்புள்ளே வெறும் 76 பந்துகளில் 6 சிக்ஸர்கள் மற்றும் 13 பௌண்டரிகள் அடங்கலாக 103 ஓட்டங்கள் பெற்றார்.
மறுமுனையில் அணித்தலைவர் சஹான் ஆராச்சிகே 68 பந்துகளுக்கு 2 சிக்ஸர்கள் மற்றும் 5 பெளண்டரிகள் உள்ளடங்கலாக 74 ஓட்டங்கள் பெற்று இந்த தொடரில் அடுத்தடுத்த அரைச்சதங்களைப் பதிவு செய்தார். இதேநேரம் இறுதிநேர அதிரடி வெளிப்படுத்திய சொனால் தினுஷ 77 பந்துகளில் 4 சிக்ஸர்கள் மற்றும் 6 பௌண்டரிகள் அடங்கலாக 93 ஓட்டங்கள் பெற்றார்.
நியூசிலாந்து A அணியின் பந்துவீச்சில் டிம் ப்ரிங்கிள் 58 ஓட்டங்களுக்கு 3 விக்கெட்டுக்களை கைப்பற்றியதோடு, ஆதிட்யா அஷொக் 2 விக்கெட்டுக்களை எடுத்திருந்தார்.
பின்னர் 369 ஓட்டங்கள் என்ற இமாலய இலக்கை நோக்கிப் பதிலுக்குத் துடுப்பாடிய நியூசிலாந்து A அணி, இலங்கை வீரர்களுக்கு சவாலை வழங்கிய போதும் 28 ஓவர்களின் நிறைவில் போதிய வெளிச்சமின்மை காரணமாக போட்டி நிறுத்தப்பட்டது.
பின்னர் வானிலை சீராகாத காரணத்தினால் 28 ஓவர்களுக்கு போட்டியின் வெற்றி இலக்காக 203 ஓட்டங்கள் டக்வத் லூயிஸ் முறையில் நிர்ணயம் செய்யப்பட்டு 44 ஓட்டங்களால் இலங்கை A அணி வெற்றி பெற்றதாக அறிவிக்கப்பட்டது.
நியூசிலாந்து A அணியின் துடுப்பாட்டத்தில் ஆட்டமிழக்காதிருந்த கேர்டிஸ் ஹீப்பி 53 ஓட்டங்கள் பெற்று ஆட்டமிழக்காது காணப்பட்டிருந்தார்.
இலங்கை A அணியின் பந்துவீச்சில் மிலான் ரத்நாயக்க, ரவின்து பெர்னாண்டோ மற்றும் டில்சான் மதுசங்க ஆகியோர் தலா ஒரு விக்கெட் வீதம் சாய்த்திருந்தமை குறிப்பிடத்தக்கது.
>>மேலும் கிரிக்கெட் செய்திகளைப் படிக்க<<
