இலங்கை மற்றும் நியூசிலாந்து A கிரிக்கெட் அணிகள் இடையிலான ஒருநாள் தொடரின் முதல் போட்டியில் இலங்கை வீரர்கள் 140 ஓட்டங்களால் அபார வெற்றியினைப் பதிவு செய்துள்ளனர்.
>>இலங்கை A கிரிக்கெட் குழாத்தில் வியாஸ்காந்த், ஆகாஷ், ஷிராஸ்
இலங்கைக்கு சுற்றுப் பயணம் மேற்கொண்டுள்ள நியூசிலாந்து A கிரிக்கெட் அணியானது மூன்று ஒருநாள் மற்றும் இரண்டு நான்கு நாட்கள் போட்டிகள் கொண்ட தொடர்களில் ஆடுகின்றது. இந்த நிலையில் இரு அணிகளும் பங்கெடுக்கும் ஒருநாள் தொடரின் முதல் போட்டி இன்று (05) காலியில் ஆரம்பமாகியது.
போட்டியின் நாணய சுழற்சியில் வென்ற நியூசிலாந்து A அணியின் தலைவர் மெக்ஸ் ச்சூ முதலில் களத்தடுப்பினைத் தெரிவு செய்தார். அதன்படி முதலில் துடுப்பாடிய இலங்கை A அணிக்கு கமில் மிஷார சிறந்த ஆரம்பம் வழங்கிய போதும் பின்னர் தடுமாற்றம் காட்டியது.
ஒரு கட்டத்தில் 126 ஓட்டங்களுக்கு 5 விக்கெட்டுக்களை இழந்து காணப்பட்ட இலங்கை A அணிக்கு மிலான் ரத்நாயக்க மற்றும் அணித்தலைவர் சஹான் ஆராச்சிகே ஆகியோர் கைகொடுக்க, இலங்கை A அணியானது 49.2 ஓவர்களில் அனைத்து விக்கெட்டுக்களையும் இழந்து 261 ஓட்டங்கள் பெற்றது.
இலங்கை A அணியின் தரப்பில் கமில் மிஷார வெறும் 49 பந்துகளில் ஒரு சிக்ஸர் மற்றும் 12 பௌண்டரிகள் அடங்கலாக 79 ஓட்டங்கள் எடுத்தார். மறுமுனையில் சஹான் ஆராச்சிகே 7 பௌண்டரிகள் மற்றும் ஒரு சிக்ஸருடன் 66 ஓட்டங்களையும், மிலான் ரத்நாயக்க 53 ஓட்டங்களையும் 3 பௌண்டரிகள் ஒரு சிக்ஸர் அடங்கலாக பெற்றிருந்தனர்.
>>இலங்கை இளையோர் மகளிர் அணியை வழிநடத்தும் சமோதி
நியூசிலாந்து A அணியின் பந்துவீச்சில் கிறிஸ்டியன் கிளார்க் மற்றும் ஆதிட்யா அஷோக் ஆகிய இருவரும் தலா 2 விக்கெட்டுக்கள் வீதம் சாய்த்திருந்தமை குறிப்பிடத்தக்கது.
பின்னர் போட்டியின் வெற்றி இலக்காக நிர்ணயம் செய்யப்பட்ட 262 ஓட்டங்களை அடைய ஆடிய நியூசிலாந்து A அணியானது அதிரடியான ஆரம்பம் பெற்ற போதும் வனுஜ சஹனின் சுழலில் தடுமாற 28.4 ஓவர்களுக்கு அனைத்து விக்கெட்டுக்களையும் இழந்து 121 ஓட்டங்களுடன் போட்டியில் படுதோல்வி அடைந்தது.
நியூசிலாந்து A அணியின் துடுப்பாட்டம் சார்பில் அதிகபட்சமாக டேல் பிலிப்ஸ் 30 ஓட்டங்கள் பெற்றார். இலங்கைத் தரப்பில் அதன் வெற்றியினை உறுதி செய்த வனுஜ சஹான் 13 ஓட்டங்களுக்கு 5 விக்கெட்டுக்களையும், சோனால் தினுஷ 2 விக்கெட்டுக்களையும் கைப்பற்றினர்.
இலங்கை – நியூசிலாந்து A அணிகள் இடையிலான ஒருநாள் தொடரின் இரண்டாவது போட்டி புதன்கிழமை (08) ஹம்பாந்தோட்டையில் நடைபெறுகின்றது.
>>மேலும் கிரிக்கெட் செய்திகளைப் படிக்க<<
