சன்ரைஸர்ஸ் ஹைதராபாத் அணியின் தலைவராக இஷான் கிஷன்

இந்திய பிரீமியர் லீக் (IPL) T20 2026 தொடரின் ஆரம்ப போட்டிகளில் சன்ரைசர்ஸ் ஹைதராபாத் அணியினை இஷான் கிஷன் வழிநடத்துவார் எனத் தெரிவிக்கப்பட்டுள்ளது.

>> ஆஸி. வேக நட்சத்திரங்கள் IPL ஆரம்பப் போட்டிகளில் ஆடுவது சந்தேகம்

சன்ரைஸர்ஸ் அணியின் வழக்கமான தலைவர் பேட் கம்மின்ஸ் முதுகு உபாதையில் இருந்து இன்னும் முழுமையாக குணமடையாத நிலையில், அவருக்குப் பதிலாக இஷான் கிஷன் தற்காலிகமாக இந்தப் பொறுப்பை ஏற்றுள்ளதாக தெரிவிக்கப்பட்டிருக்கின்றது.

அதேநேரம் இஷான் கிஷன் தலைவராக செயற்படுகின்ற காலகட்டத்தில் அபிஷேக் சர்மா சன்ரைஸர்ஸ் அணியின் பிரதி தலைவராக இருப்பார் எனவும் கூறப்பட்டிருக்கின்றது.

கிரிக்பஸ் (Cricbuzz) செய்தி இணையதளம் வெளியிட்டுள்ள தகவல்களின் அடிப்படையில் பேட் கம்மின்ஸ் முழுமையான உடற்தகுதியினைப் பெற்றவுடன் மீண்டும் தலைவர் பொறுப்பை ஏற்கவிருப்பதோடு, அவர் மார்ச் 23ஆம் திகதி இந்தியாவிற்கு பயணமாகி ஹைதராபாத் அணியுடன் இணைவார் என எதிர்பார்க்கப்படுகின்றது.

பேட் கம்மின்ஸ் கடந்த டிசம்பர் மாதம் ஆஷஸ் தொடரின் போது ஏற்பட்ட காயம் காரணமாக அண்மையில் நிறைவுக்கு வந்த T20 உலகக் கிண்ணத் தொடரிலும் பங்கேற்கவில்லை என்பது குறிப்பிடத்தக்கது.

அதேவேளை சன்ரைஸர்ஸ் ஹைதராபாத் அணி இம்முறைக்கான IPL தொடரில் தமது முதல் போட்டியில் மார்ச் 28ஆம் திகதி நடப்பு சம்பியனான ரோயல் செலஞ்சர்ஸ் பெங்களூர் அணியை எதிர்கொள்கின்றது.

பேட் கம்மின்ஸ் இதுவரை 30 போட்டிகளில் ஹைதராபாத் அணியை வழிநடத்தி 15 வெற்றிகளைப் பெற்றுத் தந்துள்ளதோடு அவரது தலைமையில் 2024ஆம் ஆண்டு சன்ரைஸர்ஸ் அணியானது, இறுதிப் போட்டிக்கும் தெரிவாகியமை சுட்டிக்காட்டத்தக்கது.

>> மேலும் கிரிக்கெட் செய்திகளைப் படிக்க <<