நாட்டில் தற்போது நிலவி வருகின்ற சீரற்ற காலநிலை மற்றும் வெள்ளம் காரணமாக இலங்கை கிரிக்கெட் சபை நடத்தும் உள்ளூர் போட்டிகள், இலங்கை கால்பந்து சம்மேளத்தினால் நடத்தப்படும் சம்பியன்ஸ் லீக் தொடர் மற்றும் இலங்கை ரக்பி சங்கத்தினால் நடத்தப்படும் மெலிபன் சவால் கிண்ண உள்ளூர் கழகங்களுக்கிடையிலான ரக்பி லீக் போட்டித் தொடர் உள்ளிட்டவை ஒத்திவைப்பதற்கு நடவடிக்கை எடுக்கப்பட்டுள்ளன.
இதில் பிரதானமாக இலங்கை கிரிக்கெட் சபை நடத்தும் 2 முக்கிய மூன்று நாள் போட்டிகள் மற்றும் இன்று (28) நடைபெறவிருந்த பிரீமா 15 வயதுக்குட்பட்ட இலங்கை இளையோர் லீக் சுப்பர் மாகாண கிரிக்கெட் தொடரின் இறுதிப் போட்டியை ஒத்திவைக்க இலங்கை கிரிக்கெட் சபை முடிவு செய்துள்ளது.
பிரதான கழகங்களுக்கு இடையிலான மூன்று நாள் கிரிக்கெட் போட்டி இன்று ஆரம்பமாகவிருந்த நிலையில் அந்தத் தொடர் ஒரு வாரத்திற்கு ஒத்திவைக்கப்பட்டுள்ளது. இதன்படி எதிர்வரும் டிசம்பர் 5ஆம் திகதி இந்தத் தொடர் ஆரம்பமாகும் என்று இலங்கை கிரிக்கெட் சபை அறிவித்துள்ளது.
2025/26 பிரதான கழகங்களுக்கு இடையிலான 3 நாள் கிரிக்கெட் தொடரில் 14 கழகங்கள் பங்கேற்கவுள்ளன. ஏழு அணிகள் கொண்ட இரு குழுக்களாக நடைபெறும் ஆரம்ப சுற்று போட்டிகளில் ஒரு அணி மற்ற அணியுடன் ஒருமுறை மோதும். இரு குழுக்களிலும் முதல் இடத்தை பிடிக்கும் அணிகள் இறுதிப் போட்டிக்கு முன்னேறும். இந்தத் தொடரின் முதல் நாளான இன்றைய தினத்தில் மொத்தம் ஆறு போட்டிகள் நடைபெறவிருந்தமை குறிப்பிடத்தக்கது.
இதனிடையே, 12 கழகங்கள் பங்குபற்றும் பிரிவு B இற்கான மூன்று நாள் போட்டித் தொடரும் இன்று ஆரம்பமாகவிருந்த நிலையில், சீரற்ற காலநிலை காரணமாக இந்தத் தொடரையும் டிசம்பர் 5 ஆம் திகதி வரை ஒத்திவைக்க தீர்மானிக்கப்பட்டுள்ளது.
- பங்களாதேஷ் தொடருக்கான இலங்கை U17 குழாம் அறிவிப்பு
- ஆசியக் கிண்ண கால்பந்து தகுதிச் சுற்றில் இலங்கையை வீழ்த்திய தாய்லாந்து
- T20 உலகக்கிண்ணத்தின் முதல் போட்டியில் அயர்லாந்துடன் மோதும் இலங்கை
இதேவேளை பிரீமா 15 வயதுக்குட்பட்ட இலங்கை இளையோர் லீக் சுப்பர் மாகாண தொடரின் இறுதிப் போட்டி இன்று கொழும்பு தர்ஸ்டன் கிரிக்கெட் மைதானத்தில் நடைபெறவிருந்தது. இதில் கொழும்பு தெற்கு மற்றும் கண்டி அணிகள் மோதவுள்ளன.
எவ்வாறாயினும், இந்தப் போட்டியும் சீரற்ற காலநிலையால் ஒத்திவைக்கப்பட்டதாக இலங்கை கிரிக்கெட் சபை அறிவித்துள்ளது. அதேபோல, இறுதிப் போட்டி நடைபெறும் திகதி எதிர்வரும் தினங்களில் அறிவிக்கப்படும் என்று தெரிவிக்கப்பட்டுள்ளது.
இந்த நிலையில், இலங்கை கால்பந்து சம்மேளத்தினால் நடத்தப்படும் சம்பியன்ஸ் லீக் தொடரில் இன்று (28) ஆரம்பமாகவிருந்த இரண்டாவது வாரத்திற்கான ஆறு போட்டிகள் சீரற்ற காலநிலை காரணமாக ஒத்திவைக்கப்பட்டுள்ளன.
இலங்கையின் 14 முன்னணி கழக அணிகள் பங்கேற்றிருக்கும் சம்பியன்ஸ் லீக் கால்பந்து தொடர் நவம்பர் முதல் வாரத்திலேயே ஆரம்பிக்கப்படவிருந்தது. எனினும் சீரற்ற காலநிலை காரணமாகவே போட்டிகள் ஒத்திவைக்கப்பட்டு கடந்த வாரமே ஆரம்பமானகியமை குறிப்பிடத்தக்கது.
இது இவ்வாறிருக்க, இலங்கை கரப்ப்நதாட்ட சங்கத்தால் ஏற்பாடு செய்யப்படும் மஞ்சி கிண்ண தேசிய கரப்பந்தாட்ட சம்பியன்ஷிப்பின் மத்திய மாகாண போட்டிகள் இம்மாதம் 29 மற்றும் 30 திகதிகளில் கண்டி – பேராதெனியவில் நடத்த திட்டமிடப்பட்டிருந்தது. எனினும், நாட்டில் நிலவி வருகின்ற சீரற்ற காலநிலை காரணமாக அந்தப் போட்டிகளும் ஒத்திவைக்கப்பட்டுள்ளதாக இலங்கை கரப்பந்தாட்ட சங்கம் அறிவித்துள்ளது.
அதேபோல, இலங்கை ரக்பி சங்கமும் இந்த வார இறுதியில் நடத்த திட்டமிடப்பட்ட மெலிபன் சவால் கிண்ண உள்ளூர் கழகங்களுக்கிடையிலான ரக்பி லீக் போட்டித் தொடர் 3ஆவது வாரத்துக்கான போட்டிகளை ஒத்திவைப்பதற்கு தீர்மானித்துள்ளது.
>> மேலும் பல விளையாட்டு செய்திகளைப் படிக்க <<
