இந்தியா மற்றும் இலங்கையில் பெப்ரவரி மாதம் நடைபெறவிருக்கும் 2026ஆம் ஆண்டிற்கான ஆடவர் ICC T20 உலகக் கிண்ணத் தொடரில் பங்கெடுக்கும் 15 பேர் கொண்ட அவுஸ்திரேலிய குழாம் அந்த நாட்டு கிரிக்கெட் சபை (CA) மூலம் அறிவிக்கப்பட்டுள்ளது.
>>T20 உலகக் கிண்ணத் தொடருக்கான ஆப்கானிஸ்தான் குழாம் அறிவிப்பு<<
மிச்சல் மார்ஷ் தலைமையில் அறிவிக்கப்பட்டுள்ள இந்த அணியில், முன்னணி வேகப்பந்துவீச்சாளர்கள் பேட் கம்மின்ஸ் மற்றும் ஜோஷ் ஹேசல்வூட் ஆகியோருக்கு உபாதை ஆபத்துக்கள் இருந்த போதும் வாய்ப்பு வழங்கப்பட்டுள்ளது.
இதில் பேட் கம்மின்ஸ், கடந்த ஜூலை மாதம் முதல் முதுகுப் பகுதியில் ஏற்பட்ட உபாதை காரணமாக சிரமங்களை முகம் கொடுத்து வந்திருந்த நிலையில் ஆஷஸ் தொடரின் மெல்போர்ன் டெஸ்டில் விளையாடி பின்னர் முன்னெச்சரிக்கை நடவடிக்கையாக தொடரிலிருந்து விலகியிருந்தார்.
இதன் காரணமாக பேட் கம்மின்ஸின் உடல்நிலை குறித்து இன்னும் நான்கு வாரங்களில் மேற்கொள்ளப்படும் பரிசோதனை முடிவுகளின் அடிப்படையிலேயே T20 உலகக் கிண்ணத்தில் ஆடுவது உறுதி செய்யப்படும் எனக் குறிப்பிடப்பட்டுள்ளது.
>>T20 தொடரில் முழுமையாக வைட்வொஷ் செய்யப்பட்ட இலங்கை மகளிர்<<
மறுபுறம் தசை உபாதையினால் ஆஷஸ் தொடரை முழுமையாக தவறவிட்ட ஜோஷ் ஹேசல்வூட் மீண்டும் பந்துவீச்சுப் பயிற்சிகளை ஆரம்பித்துள்ளதாக கூறப்படுகின்றது. அவர் T20 உலகக் கிண்ண தொடக்கத்திற்குள் முழு உடற்தகுதியை பெறுவார் நம்பப்படுகின்றது. இதேபோல், பிக் பேஷ் லீக் தொடரின் போது தசை உபாதையினால் பாதிக்கப்பட்ட அதிரடி துடுப்பாட்ட வீரர் டிம் டேவிட்டும் அணியில் இடம்பிடித்துள்ளார்.
அதேவேளை இந்தியா, இலங்கை ஆகியவற்றின் நிலைமைகளை கருத்திற் கொண்டு அவுஸ்திரேலியா இம்முறை சுழற்பந்து வீச்சுக்கு அதிக முக்கியத்துவம் அளித்துள்ளது. அந்தவகையில் அடம் ஷம்பா, மெதிவ் குஹ்னமன் மற்றும் கூப்பர் கொன்னொலி ஆகியோர் சுழற்பந்துவீச்சாளர்களாக ஆஸி. அணிக்கு வலுச் சேர்க்கின்றனர்.
பெப்ரவரி 7ஆம் திகதி தொடங்கும் T20 உலகக் கிண்ணத் தொடரில் அவுஸ்திரேலியா தனது முதல் லீக் போட்டியில் பெப்ரவரி 11ஆம் திகதி அயர்லாந்தை எதிர்கொள்கிறது.
அவுஸ்திரேலிய குழாம்: மிச்சல் மார்ஷ் (தலைவர்), சேவியர் பார்ட்லெட், கூப்பர் கொன்னொலி, பேட் கம்மின்ஸ், டிம் டேவிட், கேமரூன் கிரீன், நதன் எல்லிஸ், ஜோஷ் ஹேசல்வூட், டிராவிஸ் ஹெட், ஜோஷ் இங்கிலீஸ், மெதிவ் குஹ்னமன், கிளன் மெக்ஸ்வெல், மெதிவ் ஷோர்ட், மார்கஸ் ஸ்டொய்னிஸ், அடம் ஷம்பா
>>மேலும் கிரிக்கெட் செய்திகளைப் படிக்க<<
 மூலம் அறிவிக்கப்பட்டுள்ளது.){kind=link}