ලෝක ටෙස්ට් ක්රිකට් ඉතිහාසයට නවතම වාර්තා කිහිපයක් ම එක් කළ තරගයක් පසුගියදා Kingston හී Sabina Park ක්රීඩාංගණයේ දී නිමා වුණා. බටහිර ඉන්දීය කොදෙව්වන් හා ඔස්ට්රේලියාව අතර පැවැති මෙම තරගයේ දී සත්කාරක බටහිර ඉන්දීය කොදෙව්වෝ දෙවැනි ඉනිමේ දී සියලුම දෙනා ලකුණු 27කට දැවී යන අතර එය ලෝක ටෙස්ට් තරග ඉතිහාසයට එක් වෙන්නේ කණ්ඩායමක් ලබාගත් අඩු ම ලකුණු සංඛ්යාවන් අතර 2 වැනි ස්ථානයට පත් වෙමිනුයි.
1955 වසරේ දී Geoff Rabone ගේ නායකත්වයෙන් යුත් නවසීලන්ත කණ්ඩායම Leonard Hutton ගේ නායකත්වයෙන් යුත් එංගලන්ත කණ්ඩායම හමුවේ ලකුණු 26කට දැවී යන්නේ ලෝක ටෙස්ට් ඉතිහාසයේ කණ්ඩායමක් දැවී ගිය අඩු ම ලකුණු ප්රමාණයේ වාර්තාවට හිමිකම් කියමිනුයි.
එතැන් සිට ගෙවී ගිය වසර 70ක කාලයක් පුරා මෙම වාර්තාව මේ ලෙසින් ම පවතින අතර එහි දෙවැනි ස්ථානයේ තිබූ ලකුණු 30ක් ව තිබූ වාර්තාවයි, මෙවර මේ ලෙසින් යාවත්කාලීන වන්නේ. එදා එංගලන්තයේ Tim O’Brien ගේ නායකත්වය හමුවේ දකුණු අප්රිකාවේ Barberton Halliwell ගේ නායකත්වයෙන් යුත් කණ්ඩායමයි මේ අවාසනාවන්ත වාර්තාවට හිමිකම් කියමින් සිටියේ. එය වසර 129කට පෙර සිදු වූ සිදුවීමක්.
ඊට වසර 28කට පසුව 1924 වසරේ දී ද දකුණු අප්රිකාව, එංගලන්තය හමුවේ නැවත ලකුණු 30ක දී තම ඉනිම අවසන් කර ගන්නවා. එවර දකුණු අප්රිකා කණ්ඩායම Herbie Taylor විසින් මෙහෙයවූ අතර එංගලන්ත කණ්ඩායමේ නායකත්වය හිමි ව තිබුණේ Arthur Gilligan වෙතයි.
නිමා වූ මෙම තරගයේ ඔස්ට්රේලියා කණ්ඩායමේ නායකයා ලෙසින් Pat Cummins කටයුතු කළ අතර අවාසනාවන්ත බටහිර ඉන්දීය කොදෙව් නායකයා බවට පත් වූයේ Roston Chase.
ලෝක ටෙස්ට් ඉතිහාසයේ අඩු ම ලකුණු ප්රමාණයකට දැවී ගිය කණ්ඩායම් 10
Team | Score | Overs | Opposition | Ground | Year | |
1 | නවසීලන්තය | 26 | 27.0 | එංගලන්තය | Auckland | 1955 |
2 | බ. ඉ. කොදෙව් | 27 | 14.3 | ඔස්ට්රේලියාව | Kingston | 2025 |
3 | දකුණු අප්රිකාව | 30 | 18.4 | එංගලන්තය | Gqeberha | 1896 |
4 | දකුණු අප්රිකාව | 30 | 12.3 | එංගලන්තය | Birmingham | 1924 |
5 | දකුණු අප්රිකාව | 35 | 22.4 | එංගලන්තය | Cape Town | 1899 |
6 | දකුණු අප්රිකාව | 36 | 23.2 | ඔස්ට්රේලියාව | Melbourne | 1932 |
7 | ඔස්ට්රේලියාව | 36 | 23.0 | එංගලන්තය | Birmingham | 1902 |
8 | ඉන්දියාව | 36 | 21.2 | ඔස්ට්රේලියාව | Adelaide | 2020 |
9 | අයර්ලන්තය | 38 | 15.4 | එංගලන්තය | Lord’s | 2019 |
10 | නවසීලන්තය | 42 | 39.0 | ඔස්ට්රේලියාව | Wellington | 1946 |
වාර්තා ගත මෙම තරගයට පෙර මෑත ඉතිහාසයේ මෙම ලැයිස්තුව අවසන් වරට යාවත්කාලීන කෙරෙන්නේ ශ්රී ලංකාව මගින්. ඔවුන් 2024 වසරේ නොවැම්බර් මස දකුණු අප්රිකාව හමුවේ ලකුණු 42කට දැවී යමිනුයි ඊට එක් වෙන්නේ. එදා Temba Bavuma ගේ නායකත්වයෙන් යුත් දකුණු අප්රිකානු කණ්ඩායම හමුවේ ධනංජය ද සිල්වා ගේ නායකත්වය යටතේ වූ ශ්රී ලංකා කණ්ඩායම දැවී යන්නේ පන්දුවාර 13.5ක දී හෙවත් පන්දු 88කදීයි. එයිනුත් පන්දු 4ක් ම නිපන්දු ලෙසයි ඔවුන්ට ප්රදානය වෙන්නේ.
එය ලෝක ටෙස්ට් තරග ඉතිහාසයේ කණ්ඩායමක් අඩු ම පන්දුවාර ප්රමාණයකින් දැවී ගිය කණ්ඩායම් අතුරින් 2 වැනි ස්ථානයට පත් සිදුවීමයි. එහි පළමු ස්ථානයේ රැඳී සිටින්නේ 1924 වසරේ දී දකුණු අප්රිකාව පන්දුවාර 12.3ක දී එංගලන්තය හමුවේ දැවී යෑමයි.
- Jadeja තනිවෙයි; ටෙස්ට් ක්රිකට් වැජඹෙයි
- ඔස්ට්රේලියාව සාර්ථක ආරම්භයක් ලබා ගනී
- ශ්රී ලංකා ක්රිකට් කණ්ඩායම්වලට ප්රහාරාත්මක පිතිකරණය පිළිබඳ පුහුණුවක්
- ටෙස්ට් පිටියේ අලුත් ම විනිසුරු “රඹුක්වැල්ල”
- ක්රිකට් නීති කිහිපයක් වෙනස් වෙයි
o 3 වැනි ටෙස්ට් තරගය (දිවා/රාත්රී), Kingston, ජුලි 12 – 14, 2025, Australia tour of West Indies
- කාසියේ වාසිය – ඔස්ට්රේලියාව
ලෝක ටෙස්ට් ශූරතාවලියේ තරගයක් ලෙසින් පැවැති මෙම තරගය ආරම්භ වන විට සත්කාරක බටහිර ඉන්දීය කොදෙව්වෝ තරග 3කින් යුත් තරගාවලියේ පළමු තරග ද්විත්වය ම පරාජය වී සිටියා.
එබැවින් ඔවුන්ට මෙම තරගයේ ජයග්රහණය අතවශ්ය ව තිබෙන්නට ඇත. ඒ නිසා ම ඔවුන් මෙම තරගයේ දී ආරම්භක දකුණත් පිතිකරු Kraigg Brathwaite වෙනුවට මංගල ටෙස්ට් වරම් ලබා දෙමින් 24 හැවිරිදි වියේ පසුවෙන දකුණත් ඉදිරි පෙළ පිතිකරු Kevlon Anderson කැඳවා තිබුණා. Kraigg Brathwaite නිමා වූ ටෙස්ට් තරග ද්විත්වයේ ඉනිම 4ක දී ලබා තිබුණේ ලකුණු 15ක් පමණයි.
ඊට අමතර ව ඉදිරි පෙළ පිතිකරුවෙක් ලෙසින් නම් කර තිබූ Keacy Carty වෙනුවට Mikyle Louis කැඳවා තිබුණා. Keacy Carty නිමා වූ ටෙස්ට් තරග ද්විත්වයට ම ක්රීඩා කර තිබූ අතර ඔහුගේ එම ඉනිම් 4 දී දක්ෂතාව වී තිබුණේ ලකුණු 56ක් ලබා ගැනීම පමණයි.
අනතුරු ව ඔවුන්ගේ තේරීම වී තිබුණේ දකුණිතින් වේග පන්දු යවන Anderson Phillip වෙනුවට වමතින් දඟ පන්දු යවන Jomel Warrican කැඳවීමයි.
නමුත් ඒ සියලු තුරුම්පු Kingston පිටියට වැදගත් වූයේ නැහැ. කාසියේ වාසිය දිනා ගත් ඔස්ට්රේලියා නායකයා, පළමුවෙන් පන්දුවට පහර දීම තෝරා ගනිමින් තම පළමු ඉනිමට ලකුණු 225ක් රැස් කරන අතර ඊට පිළිතුරු ලෙසින් බටහිර ඉන්දීය කොදෙව් කණ්ඩායමට ලබා ගැනීමට දෙන්නේ ලකුණු 143ක් පමණයි.
ඒ අනුව ලකුණු 82ක් ඉදිරියෙන් සිටිමින් තම 2 වැනි ඉනිම ආරම්භ කරන සංචාරක ක්රීඩකයෝ එවර සියලුම දෙනා දැවී ලබා ගන්නේ ලකුණු 121ක් පමණයි. එය ඔවුන් මෙම තරගාවලියේ දී ඉනිමක දී ලබා ගත් අඩු ම ලකුණු සංඛ්යාවයි.
ඒ අනුව තරගයේ ජයග්රහණය වෙනුවෙන් බටහිර ඉන්දීය කොදෙව් කණ්ඩායමට අවශ්ය වෙන්නේ ලකුණු 204ක් පමණයි. එම පහසු ඉලක්කය හඹා යෑමේදීයි කොදෙව්වෝ මේ අකරතැබ්බයට මුහුණ දෙන්නේ.
මෙම තරගයේ දී වූ සුවිශේෂි සිදුවීම්
27/10 : මෙම දැවී යෑම බටහිර ඉන්දීය කොදෙව් ටෙස්ට් තරග ඉතිහාසයේ කණ්ඩායමක් දැවී ගිය අඩු ම ලකුණු ප්රමාණයයි.
මීට පෙර මෙම ස්ථානයේ රැඳී තිබුණේ 2004 වසරේ දී Kingston හි දී එංගලන්තය හමුවේ පන්දුවාර 25.3ක දී සියලුම දෙනා දැවී ලබා ගත් ලකුණු 47යි.
170 : මෙම තරගයේ දී කොදෙව්වෝ ඉනිම 2 දී ම වාර්තා කරන්නේ කඩුලු 20ක් දැවී ලකුණු 170ක් පමණයි. එය කොදෙව් ටෙස්ට් තරග ඉතිහාසයේ කණ්ඩායමක් ඉනිම 2 දී ම අඩු ම ලකුණු ප්රමාණයකට දැවී යෑමයි.
ඊට පෙර මෙම ලැයිස්තුවේ පළමු තැන ලකුණු 175කට හිමි ව තිබුණා. ඒ 1957 වසරේ The Oval පිටියේ දී එංගලන්තය හමුවේ කොදෙව්වන් ලකුණු 89කට සහ 86කට දැවී යෑම් නිසායි.
14.3 : කොදෙව්වන්ගේ මෙම ඉනිම පන්දුවාර 14.3කින් සමන්විත වන අතර එය ලෝක ටෙස්ට් තරග ඉතිහාසයේ කණ්ඩායමක් දැවී යෑමට ගත කළ අඩු ම පන්දුවාර ප්රමාණයන් අතර 3 වැනි ස්ථානයට පත් තරගයයි.
මෙම ලැයිස්තුවේ පළමු ස්ථානය දකුණු අප්රිකානුවෝ 1924 වසරේ දී පන්දුවාර 12.3ක දී ලකුණු 30කට නිමා කර ගත් ඉනිම ද එහි 2 වැනි ස්ථානය 2024 වසරේ දී ශ්රී ලංකාව, දකුණු අප්රිකානුවන් හමුවේ පන්දුවාර 13.5ක දී ලබා ගත් ලකුණු 42ට ද හිමි ව තිබුණා.
7 : කොදෙව්වන්ගේ මෙම ඉනිමේ දී පිතිකරුවන් 7 දෙනෙක් ම දැවී යන්නේ ලකුණු ලබා ගැනීමට ප්රථමයි. එය එතෙක් මෙතෙක් ටෙස්ට් තරග ඉතිහාසයේ එවැන්නක් සිදු වූ පළමු අවස්ථාවයි.
මීට පෙර මෙම වාර්තා පවතින්නේ පාකිස්තානය සතුවයි. 1980 දෙසැම්බර් මස බටහිර ඉන්දීය කොදෙව්වන් සමඟ Karachi නුවරදී පැවැති තරගයේ දී ඔවුන්ගේ කඩුලු 6ක් මේ ලෙසින් ලකුණු නොලබා ම දැවී යනවා.
ඊට පෙර 1996 නොවැම්බර් මස දකුණු අප්රිකාවේ පිතිකරුවෝ 6 දෙනෙක් ද මේ ආකාරයෙන් ම ඉන්දියාව හමුවේ ලකුණු නොලබා ම දැවී යනවා.
15 : මෙම තරගයේ දී වමතින් වේග පන්දු යවන Mitchell Starc පන්දු 15ක් තුළ කඩුලු 5ක් දවා ගන්නවා. එය ටෙස්ට් තරග ඉතිහාසයේ පන්දු යවන්නෙක් ඉතා ඉක්මනින් ම ලබා ගත් කඩුලු 5 ලෙසයි සැලකෙන්නේ.
මෙම වාර්තාවට මීට පෙර හිමිකම් කී තිදෙනෙක් මේ ලැයිස්තුවේ ඉහළින් ම රැඳී සිටියා. ඒ ඔස්ට්රේලියාවේ වමතින් මඳ වේග පන්දු යැවූ Ernie Toshack ඉන්දියාවට එරෙහි ව 1947 වසරේදීත්, එංගලන්තයේ දකුණතින් මඳ වේග පන්දු යැවූ Stuart Broad ඔස්ට්රේලියාවට එරෙහි ව 2015 වසරේදීත් සහ ඔස්ට්රේලියාවේ දකුණතින් මඳ වේග පන්දු යැවූ Scott Boland එංගලන්තයට එරෙහි ව 2021 වසරේදීත් පන්දු 19කදී මේ කඩඉමට පිවිසීමත් සමඟිනුයි.
400 : Mitchell Starc ගේ මෙම දක්ෂතාව තමන්ගේ 100 වැනි ටෙස්ට් තරගයේ දී දක්වන අතර ඒ සමඟම ඔහු තම ටෙස්ට් තරග දිවියේ 400 වැනි කඩුලු සැමරුම ද ලබා ගන්නවා.
19062 : Mitchell Starc මෙම දක්ෂතාව දැක් වීම සඳහා යැවූ පන්දු ප්රමාණය, ලෝක ටෙස්ට් ඉතිහාසයේ කඩුලු 400ක් දවා ගැනීමට යැවූ පන්දු ප්රමාණයන් අතුරින් 2 වැනි ස්ථානයට පත් දක්ෂතාවයි.
ලෝකයේ ඉක්මනින් ම කඩුලු 400ක් දවා ගත් පන්දු යවන්නා බවට පත් ව ඇත්තේ පන්දු 16634කින් එය සපුරා ගත් දකුණු අප්රිකාවේ දකුණතින් වේග පන්දු යවන Dale Steyn.
6/09 : තරගය නිමා වන විට Mitchell Starc පන්දුවාර 7.3ක් යවමින් නිලකුණු පන්දුවාර 4ක් ද සමඟින් ලකුණු 9කට කඩුලු 6ක් දවා ගන්නා ලද අතර එය ඔහුගේ ටෙස්ට් තරග දිවියේ ඉහළ ම දක්ෂතාව බවට ද පත් වුණා.
2 : මෙම තරගයේ දී පළමු පන්දුවාරය තුළ කඩුලු 3ක් දවා ගැනීමට ද Mitchell Starc සමත් වෙනවා. ඔහු තමන් යැවූ පළමු වැනි, 5 වැනි සහ 6 වැනි පන්දුවල දී පිතිකරුවන් දවා ගනිමින් මෙම ලැයිස්තුවේ එවැනි දක්ෂතාවක් කළ පන්දු යවන්නන් අතුරින් 2 වැනි බවට පත් වුණා.
ඊට පෙර මෙම අසීරු අවස්ථාව උදාකරගෙන තිබුණේ ඉන්දියාවේ වමතින් මඳ වේග පන්දු යවන Irfan Pathan. ඔහු 2006 වසරේ දී Karachi නුවර දී ඉන්දියාවට එරෙහි ව පළමු වැනි පන්දුවාරයේ සිව් වැනි, 5 වැනි සහ 6 වැනි පන්දුවල දී කඩුලු ත්රිත්වයක් දවා ගනිමින් මෙම දක්ෂතාව සිදු කර තිබුණා.
0/3 (1.0) : බටහිර ඉන්දීය කොදෙව්වන්ගේ මෙම අවාසනාවන්ත ඉනිමේ පළමු පන්දුවාරය අවසන් වූ පසුව ලකුණු පුවරුව දැක් වෙන්නේ මේ ලෙසින්. එය ලෝක ටෙස්ට් තරග ඉතිහාසයේ කඩුලු 3ක් ලකුණු නොලබා දැවී ගිය 6 වැනි අවස්ථාවයි.
ඊට පෙර මෙම ලැයිස්තුවේ ඔස්ට්රේලියාව (1950), ඉන්දියාව (1952), සිම්බාබ්වේ (1999), පාකිස්තානය (2006) සහ බංග්ලාදේශය (2014) රැඳී සිටිනවා.
49 : මෙම තරගයේ දී දකුණිතින් වේග පන්දු යවන Scott Boland, බටහිර ඉන්දීය කොදෙව් කණ්ඩායමට එරෙහි ව කඩුලු ත්රිත්වයක් වාර්තා කරනවා. එය ලෝක ටෙස්ට් තරග ඉතිහාසයේ වාර්තා වූ 49 වැනි කඩුලු ත්රිත්වයයි.
ඔහු එම තරගයේ දී Justin Greaves, Shamar Joseph සහ Jomel Warrican තම ගොදුරු බවට පත් කර ගන්නා ලද අතර පන්දු යැවීම නිමා කරන්නේ 2.0-1-2-3 ලෙසිනුයි.
516 : මෙම තරගයේ දී කණ්ඩායම් ද්විත්වය එක් ව ඉනිම් 4 දී රැස් කළ ලකුණු ප්රමාණය ලෝක ටෙස්ට් තරග ඉතිහාසයේ කණ්ඩායම් ද්විත්වයක් එක් ව රැස් කළ අඩු ම ලකුණු සංඛ්යාවන් අතර 7 වැනි ස්ථානයට ලැයිස්තු ගත වෙනවා.
ඔවුන් මෙම ලැයිස්තුව හා එක් වෙන්නේ 1896, එතෙක් 7 වැනි ස්ථානය හිමිකර ගෙන සිටි දකුණු අප්රිකාව සහ එංගලන්තය අතර Gqeberha හි දී පැවැති තරගයේ දී වාර්තා වූ ලකුණු 537 අභිබවා යමිනුයි.
1045 : මෙම තරගය ලොව අඩු ම පන්දු ප්රමාණයකින් අවසන් වූ තරග අතුරින් 4 වැනි ස්ථානයට පත් තරගයයි.
ඔවුන්ට අමතර ව මෙම ලැයිස්තුවේ 1 වැනි ස්ථානය පන්දු 792කින් 1888 වසරේ දී Lord’s ක්රීඩාංගණයේ දී නිමා වූ එංගලන්තය සහ ඔස්ට්රේලියාව අතර තරගයත් සහ 2 වැනි ස්ථානය පන්දු 976කින් 1907 වසරේ දී Leeds හි දී නිමා වූ එංගලන්තය සහ දකුණු අප්රිකාව අතර තරගයත් සහ 3 වැනි ස්ථානය පන්දු 1006කින් 1896 වසරේ දී Gqeberha හි දී නිමා වූ දකුණු අප්රිකාව සහ එංගලන්තය අතර තරගයත් ලැයිස්තු ගත ව තිබෙනවා.
දෙස් විදෙස් ක්රීඩා පිටියේ උණුසුම් පුවත් දැන ගැනීමට රැදී සිටින්න ThePapare.com අප සමඟ ම.
>> තවත් විශේෂාංග ලිපි සඳහා පිවිසෙන්න <<