ப்ளூ ஸ்டார்ஸ் அணிக்கு எதிராக கொழும்பு சுகததாச அரங்கில் நடைபெற்ற சுப்பர் லீக் தொடரின் 28ஆவது போட்டியில் கொழும்பு எப்.சி அணி 2-0 என்ற கோல்கள் கணக்கில் வெற்றிபெற்றது.
போட்டி ஆரம்பித்த ஆறாவது நிமிடத்தில் பெனால்டி கட்டத்துக்கு அருகில் ப்ளூ ஸ்டார் அணியின் பின்கள வீரர்கள் பந்தை தடுக்க முற்பட்ட போதும், பந்தினை பெற்றுக்கொண்ட கொழும்பு எப்.சி அணியின் முன்கள வீரர் அஹமட் ஷன்ஷி கோல் எல்லையை நோக்கி பந்தை செலுத்தினார்.
>>நியூவ் யங்ஸை 6-0 என வீழ்த்திய அப் கண்ட்ரி லயன்ஸ்!<<
கோல் காப்பாளரான உதயங்க பெரேராவிடம் பந்து சென்ற நிலையில் அதனை துரதிஷ்டவசமாக தவறவிட்ட நிலையில், அஹமட் ஷன்ஷி அணிக்கான முதலாவது கோலை பெற்றுக்கொடுத்தார்.
தொடர்ந்து ஆட்டத்தின் 15ஆவது நிமிடத்தில் ப்ளூ ஸ்டார் அணியின் நவோத் விஹங்க கொழும்பு எப்.சி அணியின் பெனால்டி கட்டத்துக்குள் பந்தை எடுத்துச்சென்ற போது பின்கள வீரர்களால் வீழ்தப்பட்டார். எனவே ப்ளூ ஸ்டார்ஸ் அணிக்கு பெனால்டி வாய்ப்பு கொடுக்கப்பட்டது. எனினும் இந்த வாய்ப்பினை ப்ளூ ஸ்டார் அணியினர் கோலாக மாற்றுவதற்கு தவறியிருந்தனர்.
பின்னரும் இரண்டு அணிகளுக்கும் கோல் அடிக்கும் வாய்ப்புகள் கிடைத்தும் இரண்டு அணிகளும் வாய்ப்புகளை சரியாக நிறைவுசெய்யாததன் காரணமாக முதல் பாதி 1-0 என நிறைவுக்கு வந்தது.
முதல் பாதி – கொழும்பு எப்.சி 1-0 ப்ளூ ஸ்டார் வி.க
இரண்டாவது பாதி ஆரம்பித்த மூன்றாவது நிமிடத்தில் (48) கொழும்பு எப்.சி அணியானது தங்களுடைய இரண்டாவது கோலை பதிவுசெய்தது. முஹமட் சகீல் வலது பக்க கோர்னர் பகுதியிலிருந்து செலுத்திய பந்தினை பெனால்டி எல்லைக்குள் இருந்து சலன பிரேமரத்ன ஹெர்டர் செய்து கோலாக்கினார்.
இந்த கோல் வாய்ப்புக்கு பின்னர் இரண்டு அணிகளும் தங்களுடைய வாய்ப்புகளை சரியான முறையில் நிறைவுசெய்யவில்லை. மேலதிகமாக வழங்கப்பட்ட 8 நிமிட வாய்ப்பிலும் அணிகள் கோலடிக்காத நிலையில் 2-0 என்ற கோல் கணக்கில் கொழும்பு எப்.சி அணி வெற்றியை பெற்றுக்கொண்டது. இந்த வெற்றியுடன் 4ஆவது வெற்றியை பெற்ற கொழும்பு எப்.சி அணியினர் 14 புள்ளிகளுடன் புள்ளிப்பட்டியலில் இரண்டாவது இடத்தை பிடித்துள்ளனர்.
முழு நேரம் – கொழும்பு எப்.சி 1-0 ப்ளூ ஸ்டார் வி.க
கோல் பெற்றவர்கள் – அஹமட் ஷன்ஷி 6, சலன பிரேமரத்ன 48
>> மேலும் கால்பந்து செய்திகளுக்கு <<
