கிரிக்கெட் உலகக் கிண்ண போட்டி அமைப்புக்களில் புதிய மாற்றம்

சர்வதேச கிரிக்கெட் வாரியத்தின் (ஐ.சி.சி.) ஆடவர் ஒருநாள் உலகக் கிண்ணம் மற்றும் T20 உலகக் கிண்ணத் தொடர் என்பவற்றின் போட்டி அமைப்புக்களில் புதிய மாற்றங்கள் அறிமுகப்படுத்தப்பட்டுள்ளன.

 ஐ.சி.சி இன் ஆண்டு நிர்வாகக் கூட்டத்தில், இந்த போட்டி அமைப்பின் புதிய மாற்றங்களுக்கும் 2028ஆம் ஆண்டுக்கான T20 உலகக் கிண்ண மாற்றங்களுக்குமான ஒப்புதல் வழங்கப்பட்டுள்ளது.

>>500 ட்ரோன்கள், இசை நிகழ்ச்சியுடன் பிரம்மாண்டமாகத் தொடங்குகிறது 2026 LPL<<

ஐ.சி.சி. கிரிக்கெட் உலகக் கிண்ணம் (ஒருநாள் உலகக் கிண்ணம்)

புதிய விதிமுறைகளில் 14 அணிகள் பங்கேற்கும் ஐ.சி.சி. இன் ஒருநாள் உலகக் கிண்ணத் தொடரில் அணிகள் எண்ணிக்கையில் மாற்றம் இல்லை என்றாலும், லீக் சுற்றுகளின் சுவாரசியத்தை அதிகரிக்கவும், தொடக்கத்திலிருந்தே ஒவ்வொரு போட்டிக்கும் முக்கியத்துவம் அளிக்கும் வகையிலும் புதிய முத்தரப்பு முறை அறிமுகப்படுத்தப்பட்டுள்ளது.

பழைய வடிவம்

7 அணிகள் கொண்ட இரு குழுக்கள் (42 போட்டிகள்) ஒவ்வொரு குழுவில் இருந்து முதல் 3 இடங்களைப் பிடிக்கும் அணிகள் ”சுப்பர் சிக்ஸ்” சுற்றுக்கு முன்னேறும். அதன் பின்னர் அரையிறுதி மற்றும் இறுதிப்போட்டி நடைபெறும்.

புதிய வடிவம்

சுப்பர் சீரிஸ் சுற்று: புள்ளிகள் அடிப்படையில் அணிகள் தரவரிசையில் இறுதி இடங்களில் உள்ள 3 அணிகள் (12, 13 மற்றும் 14ஆவது இடங்கள்) தங்களுக்குள் விளையாடும். இதில் முதலிடம் பெறும் அணி இரண்டாவது சுற்றுக்கு முன்னேறும்.

சுற்று 2: தலா ஆறு அணிகள் கொண்ட இரு குழுக்கள் (30 போட்டிகள்). ஒவ்வொரு குழுவிலும் உள்ள முதல் 3 அணிகள் மற்றும் இரண்டு பிரிவுகளிலும் மேலதிகமாக, இதற்கு அடுத்தபடியாக அதிக புள்ளிகளைப் பெற்ற ஒரு அணி என மொத்தம் 7 அணிகள் அடுத்த சுற்றுக்கு தகுதிபெறும்.

சுற்று 3 (சுப்பர் 7 சுற்று): தகுதி பெற்ற 7 அணிகளும் Round Robin அடிப்படையில் தங்களுக்குள் தலா ஒருமுறை மோதும் (21 போட்டிகள்). இதில் முதல் நான்கு இடங்களைப் பிடிக்கும் அணிகள் நேரடியாக அரையிறுதிக்கு முன்னேறும்.

2. ஆடவர் T20 உலகக் கிண்ணம்

கிரிக்கெட் விளையாட்டில் வளர்ந்து வரும் நாடுகளுக்கு அதிக வாய்ப்புக்களை வழங்கும் நோக்கில் T20 உலகக் கிண்ண இரண்டாவது சுற்றான சுப்பர் சுற்றுக்கு தகுதிபெறும் அணிகளின் எண்ணிக்கை 8 அணிகளிலிருந்து 10 ஆக உயர்த்தப்பட்டுள்ளது. அத்துடன் இறுதி கட்டத்தில் விறுவிறுப்பை கூட்ட எலிமினேட்டர் சுற்றுக்களும் சேர்க்கப்பட்டுள்ளன.

பழைய வடிவம்

தலா 5 அணிகள் கொண்ட 4 குழுக்கள் (40 போட்டிகள்) ஒவ்வொரு குழுவுக்கும் 2 அணிகள் வீதம் 8 அணிகள் சுப்பர் 8 சுற்றுக்கு தகுதிபெறும்.

புதிய வடிவம்

குழு சுற்று: தலா 4 அணிகள் கொண்ட 5 குழுக்கள் (30 போட்டிகள்). ஒவ்வொரு குழுக்களில் இருந்தும் முதல் 2 அணிகள் வீதம் மொத்தம் 10 அணிகள் அடுத்த சுற்றுக்கு முன்னேறும்.

சுப்பர் 10: தலா 5 அணிகள் கொண்ட இரு குழுக்கள் (20 போட்டிகள்).

நேரடி தகுதி மற்றும் எலிமினேட்டர்கள்: இரண்டு பிரிவுகளிலும் முதலிடம் பிடிக்கும் அணிகள் நேரடியாக அரையிறுதிக்கு தகுதிபெறும். ஆனால், இரண்டாவது மற்றும் மூன்றாவது இடங்களைப் பிடிக்கும் அணிகள் எலிமினேட்டர் போட்டிகளில் மோத வேண்டும். இதில் வெல்லும் இரு அணிகளும் அரையிறுதிக்கு செல்லும்.

இவை தவிர வளர்முக நாடுகளின் கிரிக்கெட் தரத்தை உயர்த்தவும், அவர்களுக்கு சர்வதேச அங்கீகாரம் வழங்கவும் புதிய தகுதிச் சுற்று விதிகள் வகுக்கப்பட்டுள்ளன.

அந்தவகையில் கடந்த தொடரின் சிறப்பு சூழ்நிலையினைக் கருத்திற் கொண்டு ஸ்கொட்லாந்து நேரடியாக ஐரோப்பிய பிராந்திய இறுதிச் சுற்றுக்கு தகுதிபெற்றுள்ளதாக தெரிவிக்கப்பட்டுள்ளது.

இதேவேளை கடந்த உலகக் கிண்ணத் தொடரில் விளையாடி, அடுத்த தொடருக்கு நேரடியாக தகுதி பெறாத அணிகள் குளோபல் தகுதிச் சுற்றுக்கு தகுதிபெறும்.

எஞ்சிய 8 இடங்கள் பிராந்திய போட்டிகள் மூலம் நிரப்பப்படும் (ஆபிரிக்கா, ஆசியா, ஐரோப்பாவிலிருந்து தலா 2 அணிகள்; அமெரிக்கா மற்றும் கிழக்கு ஆசிய பசிபிக் பிராந்தியத்தில் இருந்து தலா ஒரு அணி).

குளோபல் தகுதிச் சுற்றில் அந்தந்த பிராந்தியத்தின் முதலிடம் பெறும் அணிகள் மற்றும் ஒட்டுமொத்தமாக அடுத்தபடியாக சிறந்த செயற்திறன் கொண்ட 3 அணிகள் என மொத்தம் 8 அணிகள் 2028ஆம் ஆண்டின் T20 உலகக் கிண்ணத் தொடரிற்கு தகுதிபெறும்.

>>மேலும் கிரிக்கெட் செய்திகளைப் படிக்க<<