சகலதுறையிலும் பிரகாசித்த இலங்கை 19 வயதின் கீழ் மகளிர் அணிக்கு முதல் வெற்றி 

அவுஸ்திரேலியாவின் பிறிஸ்பேனில் உள்ள இயன் ஹீலி ஓவல் மைதானத்தில் இன்று (07) நடைபெற்ற முக்கோண ஒருநாள் கிரிக்கெட் தொடரின் 2-வது போட்டியில், இலங்கை 19 வயதுக்குட்பட்ட மகளிர் அணி இங்கிலாந்து அணியை 52 ஓட்டங்களால் தோற்கடித்தது.

நாணயச் சுழற்சியில் வெற்றி பெற்ற இலங்கை 19 வயதுக்குட்பட்ட மகளிர் அணி முதலில் துடுப்பெடுத்தாடத் தீர்மானித்தது. ஆரம்பத் துடுப்பாட்ட வீராங்கனை விமோக்ஷா பாலசூரிய எதிர்கொண்ட நான்காவது பந்திலேயே ஆட்டமிழந்து ஏமாற்றமளித்தார். இலங்கை அணி 23 ஓட்டங்களுக்கு 2 விக்கெட்டுகளை இழந்து தடுமாறிய போது, மற்றொரு ஆரம்ப வீராங்கனையான சஞ்சனா காவிந்தியுடன் இணைந்த லிமன்சா விக்கெட் நிதாமான துடுப்பெடுத்தாடி ஓட்டங்களைக் குவித்தார்.

சிறப்பாக ஆடிய லிமன்சா, 4-வது விக்கெட்டுக்காக தனோத்யா செவ்மினியுடன் இணைந்து 42 ஓட்டங்களையும், 5-வது விக்கெட்டுக்காக ஷஷினி கிம்ஹானியுடன் இணைந்து 56 ஓட்டங்களையும் பகிர்ந்து வலுவான அடித்தளத்தை இட்டுக்கொடுத்தார்.

இதனால் இலங்கை 19 வயதுக்குட்பட்ட மகளிர் அணி 42.4 ஓவர்களில் சகல விக்கெட்களையும் இழந்து 170 ஓட்டங்களைப் பெற்றது.

• ஏப்ரலில் ஆஸி. செல்லும் இலங்கை U19 மகளிர் கிரிக்கெட் அணி
• இலங்கை இளையோர் மகளிர் அணியை வழிநடத்தும் சமோதி

171 ஓட்டங்கள் என்ற இலக்குடன் களமிறங்கிய இங்கிலாந்து அணியின் இன்னிங்ஸ் ஆரம்பம் முதலே சரிவைச் சந்தித்தது. 41 ஓட்டங்களுக்கு 6 விக்கெட்டுகளை இழந்து அந்த அணி திணறியது.

இலங்கை 19 வயதுக்குட்பட்ட மகளிர் அணித் தலைவி சமோதி ப்ரபோதா (13/3) மற்றும் அசேனி தலகுனே (11/3) ஆகியோரின் துல்லியமான பந்துவீச்சில் இங்கிலாந்து வீராங்கனைகள் நிலைகுலைந்தனர். இறுதியில் 118 ஓட்டங்களுக்கு இங்கிலாந்து அணி ஆட்டமிழந்தது.

இங்கிலாந்து அணித் தலைவி ப்றையோனி ஜில்க்ராஸ் 35 ஓட்டங்களையும், பியா வில்லிஸ் ஆட்டம் இழக்காமல் 20 ஓட்டங்களையும், அமேலியா ஒலிவர் 15 ஓட்ங்களையும் ஷ்ரிஸ்டி பட்டில் 11 ஓட்டங்களையும் பெற்றனர்.

இலங்கை 19 வயதுக்குட்பட்ட மகளிர் அணி நாளை (08) அவுஸ்திரேலிய 19 வயதுக்குட்பட்ட மகளிர்; அணியுடன் மோதவுள்ளமை குறிப்பிடத்தக்கது.

போட்டியின் சுருக்கம்

 

இலங்கை மகளிர் U19 அணி – 170 (42.4) லிமன்சா திலகரட்ன 51, ஷஷினி கிம்ஹானி 39, ட்ரூடி ஜொன்சன் 4/9

 

இங்கிலாந்து மகளிர் U19 அணி – 118 (42.1) ப்றையோனி ஜில்க்ராஸ் 35, பியா வில்லிஸ் 20*, அசேனி தலகுனே 3/11, சமோதி ப்ரபோதா 3/13

 

முடிவு – இலங்கை மகளிர் U19 அணி 52 ஓட்டங்கள் வித்தியாசத்தில் வெற்றி

>>மேலும் கிரிக்கெட் செய்திகளைப் படிக்க<<