ඉන්දීය එංගලන්ත අවසන් ටෙස්ට් තරග දෙක සඳහා එංගලන්ත තුන් ඉරියව් ක්‍රීඩක Moeen Ali සහභාගී නොවන බව වාර්තා වනවා. මේ බව එංගලන්ත නායක Joe Root ද තහවුරු කර තිබුණා.
පෞද්ගලික හේතූන් මත සිය පවුලේ අය සමග රැඳී සිටීම අවශ්‍ය බව පවසමින් Moeen Ali මෙලෙස එංගලන්ත කණ්ඩායමෙන් ඉවත් වීමට තීරණය කර තිබෙනවා. ඒ අනුව ඔහු නැවත එංගලන්තය බලා යාමට නියමිතයි. ඒ අනුව Jonny Bairstow සහ Mark Wood එංගලන්ත සංචිතය හා එක්වනු ඇති.
අවසන් ටෙස්ට් තරග දෙක සඳහා සහභාගී වන 17 දෙනකුගෙන් යුත් එංගලන්ත සංචිතයක් නම් කර තිබෙනවා.
ටෙස්ට්, එක්දින සහ විස්සයි විස්ස යන සියලු තරග රටාවල ක්‍රීඩා කරන ක්‍රීඩකයන් සංචාර අතරතුර දී ජෛව ආරක්‍ෂිත වටපිටාවක් තුල රැඳී සිටින අතර මාස තුනක කාලයකින් අනතුරුව ඔවුන්ට පවුලේ අය සමඟ එක්වීමට අවසර හිමිවනවා.
“සංචිතයෙන් Moeen විතරයි එංගලන්තයට යන්නේ. ඇත්තටම අපිට ඔහුගෙන් අහන්න බෑ ඔහුට ඉන්න පුළුවන් ද කියලා. ඔහු ඔහුගේ තීරණය අරන් ඉවරයි. අපි උත්සාහ ගන්න ඕනේ හැකි තරම් ක්‍රීඩකයන් ප්‍රමාණයක් තියාගන්න. ඒ වගේම ඔවුන්ගේ මානසික තත්ත්වය ගැනත් අපි හිතන්න ඕනේ. Moeen Ali පසුගිය කාලය තුල මුහුණ දුන්න දේවල් එක්ක ඔහු ඔහුගේ පවුලේ අයත් එක්ක ඉන්න ඕනේ කියන එක සාධාරණ ඉල්ලීමක්” එංගලන්ත නායක දෙවන ටෙස්ට් තරගයෙන් අනතුරුව පැවති මාධ්‍ය හමුවේ දී පවසා සිටියා.
පසුගිය මාස කිහිපයක කාලය තුල Moeen Ali ඉතා දුෂ්කර කාලයකට මුහුණ දුන්නා. ශ්‍රී ලංකාවට පැමිණීමෙන් අනතුරුව ඔහුට කොරෝනා වයිරසය ආසාදනය වූ අතර ඔහුට ටෙස්ට් තරගාවලිය සඳහා ක්‍රීඩා කිරීමට අවස්ථාව හිමිවුනේ නැහැ. සති දෙකක පමණ කාලයක් ඔහු නිරෝධායනයට ලක්වුනා.
තවත් ක්‍රිකට් පුවත්:
- Kings XI Punjab නාමය වෙනස් වෙය
- තවත් ක්‍රීඩකයින් තිදෙනෙක් Fitness කඩුල්ල පැනගනී
- 96 ලෝක ශූරයින් කිහිප දෙනෙකුගෙන් විශේෂ තීරණයක්!
- ක්‍රිකට් වෙනුවෙන් මුරලි ඇතුළු 12ක් අභියාචනාධිකරණයට
- සුපිරි තරු එක්වන ක්‍රිකට් සටනට ශ්‍රී ලංකාවෙන් තවත් තරු තුනක්
එංගලන්ත තරගාවලියේ ද පළමු ටෙස්ට් තරගෙට Moeen Ali ඇතුළත් වුනේ නැහැ. කෙසේ වෙතත් දෙවන තරගයට සහභාගී වූ ඔහු ඉනිම් දෙකේ දී කඩුලු 8ක් දවා ගැනීමට සමත් වුනා. එංගලන්ත දෙවැනි ඉනිමේ දී පන්දු 18ක් තුල වේගවත් ලකුණු 43ක් රැස් කිරීමට ඔහු සමත් වුනා.
“අපි ගත්තොත් මේ ආසියානු සංචාරය ඔහුට ඉතාමත් අමාරු එකක් වුනා. කොරෝනා වයිරසය ආසාදනය වෙලා ඔහු වැඩි කාලයක් තනියෙන් හිටියේ. අපි හිතනවා ඔහුට දැන් මේ බුබුලෙන් එළියට යන්න ඕන වෙලා තියෙන්නේ. එක සාධාරණ හේතුවක්. මට විශ්වාසයි එක ඔහුට අමාරු තීරණයක් වෙන්න ඇති. ඒත් අපි ඒකට ගරු කරනවා” Root පවසා සිටියා.
2019 වසරේ එංගලන්තයේ පැවති අළුබඳුන ටෙස්ට් තරගාවලියෙන් අනතුරුව ජාත්‍යන්තර ක්‍රීඩාවෙන් තාවකාලිකව සමුගැනීමට Moeen Ali තීරණය කළා. ඉන් අනතුරුව ඔහු සහභාගි වූ පළමු ටෙස්ට් තරගය මෙම තරගයයි. කෙසේ වෙතත් මෙම තරගය Moeen Ali ක්‍රීඩා කරන අවසන් ටෙස්ට් තරගය වනු ඇතැයි මාධ්‍ය කිහිපයක් වාර්තා කර තිබුණා. එංගලන්ත නායක Joe Root එය සම්පූර්ණයෙන් ප්‍රතික්ෂේප කළා.
“ඇයි මේ තරගය ඔහුගේ අවසන් තරගය වෙන්නේ? තරගයත් එක්ක ඔහුගේ දක්ෂතාවය වැඩි වුනා. ඒ වගේම ඔහු පෙන්වා දුන්නා ජාත්‍යන්තර මට්ටමේ දී ඔහුට දස්කම් දක්වන්න පුළුවන් කියලා. නැවත එංගලන්තයට යන්න ඔහු ගත් තීරණය නිසා ඔහුගේ ටෙස්ට් දිවිය නිමාවෙන්නේ නැහැ.”
ඉන්දීය පළමු ටෙස්ට් තරගයෙන් අනතුරුව එංගලන්ත කණ්ඩායම ඔවුන්ගේ සංචිතයට වෙනස්කම් කිහිපයක් සිදු කළා. Jos Buttler නැවත එංගලන්තයට ගිය අතර Jofra Archer ආබාධයකට ලක් වුනා. වේගපන්දු යවන ක්‍රීඩක James Anderson සහ දඟපන්දු යවන ක්‍රීඩක Dom Bess වෙනුවට වෙනත් ක්‍රීඩකයන් දෙදෙනෙක් සංචිතයට යොදවා තිබුණා.
කෙසේ වෙතත් Moeen Ali නැවත එංගලන්තයට යාම නිසා තුන්වැනි ටෙස්ට් තරගය සඳහා වෙනස්කම් කිහිපයක් සිදු කිරීමට එංගලන්තයට සිදුව තිබෙනවා.
ඉන්දීය එංගලන්ත දෙවන ටෙස්ට් තරගය ලකුණු 317කින් ජයග්‍රහණය කිරීමට ඉන්දීය කණ්ඩායම සමත් වුනා. ඉන්දීය පළමු ඉනිම ලකුණු 329ක් ලෙස දැක්වුනු අතර එංගලන්ත කණ්ඩායම පළමු ඉනිම සඳහා ලබාගත්තේ ලකුණු 134ක් පමණයි. ලකුණු 286කට සීමා වූ ඉන්දීය දෙවන ඉනිමෙන් අනතුරුව එංගලන්තය ලකුණු 164කට දැවී ගියා.
තරගාවලියේ තුන්වැනි ටෙස්ට් තරගය එළඹෙන 24 වැනිදා අහමදාබාද්හිදී ආරම්භ වීමට නියමිතයි.
අවසන් ටෙස්ට් තරග දෙක සඳහා නම් කළ එංගලන්ත සංචිතය: Joe Root (නායක), James Anderson, Jofra Archer, Jonny Bairstow, Dominic Bess, Stuart Broad, Rory Burns, Zak Crawley, Ben Foakes, Dan Lawrence, Jack Leach, Ollie Pope, Dom Sibley, Ben Stokes, Olly Stone, Chris Woakes, Mark Wood
Cricbuzz ඇසුරිනි
>> තවත් ක්‍රිකට් පුවත් සඳහා පිවිසෙන්න <<
