කාර්යය බහුල ජීවන රටාවත් සමඟින් ඔබට මඟ හැරෙන ක්‍රීඩා පිටියේ උණුසුම් පුවත් සංක්ෂිප්තව, සෑම උදෑසනකම ඔබ වෙත රැගෙන එන ලිපි මාලාව වන “ගෙවුනු දවස”.
ටෙස්ට් තරගය ශ්‍රී ලංකාවට
ගෙවුණු වසරේ ශ්‍රී ලංකා කණ්ඩායමට හිමි වූ වටිනාම ක්‍රීඩකයෙකු ලෙස අවිවාදයෙන්ම සඳහන් කළ හැකි තුන් ඉරියව් ක්‍රීඩක අසේල ගුණරත්නගේ සුපිරි පිතිකරණ දක්ෂතා නිසා සිම්බාබ්වේ කණ්ඩායම සමඟ පැවති එකම ටෙස්ට් තරගය වාර්තාගත අන්දමින් ජය ගැනීමට ඊයේ (18) ශ්‍රී ලංකා පිළට අවස්ථාව උදා විය. ඒ සිව්වැනි ඉනිමේ දී ලකුණු 388ක අති දැවැන්ත ලකුණු සංඛ්‍යාවක් සාර්ථක ලෙස හඹායමිනි.
සිම්බාබ්වේ – සියල්ලන්ම දැවී ලකුණු 356 (පන්දුවාර 94.4): ක්‍රේග් අර්වයින් 160, සිකන්ඩර් රාසා 36, මැල්කම් වොලර් 36, ඩොනල්ඩ් තිරිපානෝ 27, ශෝන් විලියම්ස් 22, හැමිල්ටන් මැසකඩ්සා 19, පීටර් මුවර් 19, රංගන හේරත් 5/116, අසේල ගුණරත්න 2/28.
ශ්‍රී ලංකාව – සියල්ලන්ම දැවී ලකුණු 346 (පන්දුවාර 102.3): උපුල් තරංග 71, දිනේෂ් චන්දිමාල් 55, අසේල ගුණරත්න 45, ඇන්ජෙලෝ මැතිව්ස් 41, දිල්රුවන් පෙරේරා 33, දිමුත් කරුණාරත්න 25, ග්‍රැහැම් ක්‍රීමර් 5/125, ශෝන් විලියම්ස් 2/62.
සිම්බාබ්වේ (දෙවැනි ඉනිම) – සියල්ලන්ම දැවී ලකුණු 377 (පන්දුවාර 107.1): සිකන්ඩර් රාසා 127, මැල්කම් වොලර් 68, පීටර් මුවර් 40, ග්‍රැහැම් ක්‍රීමර් 48, ශෝන් විලියම්ස් 22, රංගන හේරත් 6/133, දිල්රුවන් පෙරේරා 3/95.
ශ්‍රී ලංකාව (දෙවැනි ඉනිම) – කඩුලු 6ක් දැවී ලකුණු 391 (පන්දුවාර 114.5): නිරෝෂන් දික්වැල්ල 81, අසේල ගුණරත්න 80*, කුසල් මෙන්ඩිස් 66, දිමුත් කරුණාරත්න 49, දිල්රුවන් පෙරේරා 29*, උපුල් තරංග 27, ග්‍රැහැම් ක්‍රීමර් 4/150, ශෝන් විලියම්ස් 2/146.
සම්පූර්ණ වාර්තාව: ආසියාවේ විශිෂ්ටතම හඹා යෑම සමඟින් ශ්‍රී ලංකාවට සුපිරි ජයක්!
අසේලගේ පොරොන්දුව
අසේල ගුණරත්න ඉනිම අවසන් කරන්නෙකු වශයෙන් දක්වන දක්‍ෂතාවය නැවතත් අද (18) අවසන් වූ සිම්බාබ්වේ කණ්ඩායමට එරෙහි ටෙස්ට් තරගයේ දී මැනෙවින් ප්‍රදර්ශනය කළේ ඔහු ශ්‍රී ලංකා කණ්ඩායම වෙනුවෙන් පන්දු 151ක දී ලකුණු 80ක් නොදැවී ලබා ගනිමින් කණ්ඩායම ටෙස්ට් ක්‍රිකට් ඉතිහාසයේ 5 වන ඉහළම ලකුණු හඹා යාම වෙත මෙහෙයවීමත් සමඟයි.
“මම අද උදේ අසේලට පැවසුවා ඔහු අද ශතකයක් රැස්කරනවා කියලා. නමුත් එවිට ඔහු ඉතා විශ්වාසයෙන් මට කිව්වා, නෑ චන්දි. අද මට 100ක් ගහන්න උවමනාවක් වෙන එකක් නැහැ. මම ලකුණු 70කට වඩා නොදැවී ගහලා තරගය ජයග්‍රහණය කරනවා කියලා. ඒ වගේ විශ්වාසයක් තමයි මම මගේ ක්‍රීඩකයින්ගෙන් බලාපොරොත්තු වෙන්නේ. අද ඔහුට එය කරන්න අවස්ථාවක් නොලැබෙන්නත් තිබුණා. නමුත් ඔහු කතා කරපු විදිහෙන් නායකයෙක් විදිහට මට ලොකු විශ්වාසයක් ආවා අපි අද තරගය ජය ගනියි කියලා. ඒක ගොඩක් වැදගත් දෙයක්. ඒ නිසා ඒ වගේ ක්‍රීඩකයින් කණ්ඩායමේ සිටීම මට ලොකු සතුටක්.”
අසේල අද උදෑසන ලබා දුන් පොරොන්දුව ගැන පවසමින් චන්දිමාල් එසේ කීවේය.
සම්පූර්ණ වාර්තාව: අසේලගෙන් චන්දිමාල්ට පොරොන්දුවක්
