ගාල්ලේ දී මුහුදට බිලිවීමට ගිය එංගලන්ත ක්‍රිකට් තුන් කට්ටුව

344

දිනය 2003 වසරේ නොවැම්බර් 30 වැනිදා ය. සුදු ජාතික තරුණයින් තිදෙනෙකු ගාල්ල ලයිට් හවුස් හෝටලය අසල මුහුදු වෙරළ සීමාවට සේන්දු වෙමින් සිටියහ. මෙම සුදු ජාතික තරුණයින් තිදෙනා එසේ මෙසේ අය නොවේ. ඔවුන් මෙහි පැමිණියේ සංචාරක එංගලන්ත ජාතික ක්‍රිකට් කණ්ඩායම සමඟයි.

මයිකල් වෝන්, මැතිව් හොගාර්ඩ් සහ ගැරෙත් බැටී නම් මේ තුන් කට්ටුව ගාලු  මුහුදු වෙරළට පැමිණෙන්නේ තවත් දින දෙකකින් ගාල්ලේ දී ඇරඹීමට නියමිත ශ්‍රී ලංකා- එංගලන්ත පළමු ටෙස්ට් තරගයට පෙර මනස තවදුරටත් සැහැල්ලු කරගැනීමේ අරමුණෙනි.

ලෝකෙටම එකක් වූ මාලිංගගේ ලෝක වාර්තාව

පිට පිට පන්දු 3ක දී කඩුලු 3ක් දවා ගැනීම, කඩුලු ත්‍රිත්වයක් හෙවත් ක්‍රිකට් භාෂාවට අනුව ‘හැට්‍රික්’…

වෙරළ සීමාවට පැමිණි සුදු ජාතික තරුණයින් තිදෙනා හාත්පස විමසා බැලුවේ තමන්ට මුහුදේ නෑමට සුදුසු ස්ථානයක් තිබේ ද යන්නයි.

මේ තිදෙනා අතරින් ඉතා හොඳින් පිහිනීමේ හැකියාවක් තිබුණේ මැතිව් හොගාර්ඩ්ටය. හොගාර්ඩ් තරමටම නොහැකිවුවත් සෙසු දෙදෙනාට ද යම්තාක් දුරකට දියේ නොගිලී පිහිනීමේ යම් හැකියාවක් තිබුණි.

 

හාත්පස විමර්ශනය කල මයිකල් වෝන් “අපි සර්ෆිං කරමු” යනුවෙන් යෝජනාවක් ගෙන ආවේය.

“හරි. අපි කැමතියි” යනුවෙන් සෙසු දෙදෙනා එක පයින් ඊට කැමති වූහ.

මේ තිදෙනාගේ හැසිරීම නිරීක්ෂණය කරමින් තවත් තරුණයින් කිහිප දෙනෙකු ද මද දුරකින් සිටියහ. මේ තරුණයින් කිහිප දෙනා මුහුදු වෙරළ ආශ්‍රිතව ජීවිතාරක්ෂක සේවයේ යෙදෙන තරුණයින් කිහිප දෙනෙකි.

“මචං, අර එංගලන්ත ක්‍රිකට් ටීම් එකට සෙල්ලම් කරන ප්ලෙයර්ස්ලා තුන්දෙනෙක් නේද? “

එකෙකු අනෙකා අමතා පැවසුවේය. අදාළ දින කිහිපයේ සංචාරකයින් කිහිපදෙනෙකු මෙම ස්ථානයේ දී මුහුදට බිලිවූ නිසා සියලු දෙනාම සිටියේ විමසිලිමත් දෑසින්ය.

ජීවිතාරක්ෂක තරුණයින් තමන් කෙරෙහි උනන්දු වනු දුටු නිසාත්, මුහුද තරමක රළු බවක් පෙන්වූ නිසාත් එංගලන්ත ක්‍රීඩකයින් තිදෙනා මුහුදට බැසීමට පෙර ජීවිතාරක්ෂකයින්ගේ උපදෙස් පැතීම සුදුසු යැයි  තීරණය කලහ.

“අද මුහුද සෑහෙන්න සැරයි වගේ නේද?” එංගලන්ත ක්‍රීඩකයෙකු සංවාදය ඇරඹුවේය.

තරමක වැහිබර කාලගුණයක් තිබූ එදා සැබැවින්ම මුහුද ඉතා ප්‍රචණ්ඩ සහ අකීකරු ස්වාභාවයක් උසුලමින් තිබුණි.

“අපට නාන්න, සර්ෆිං කරන්න හොඳ තැනක් පෙන්වන්න පුළුවන් ද?” තවත් එංගලන්ත ක්‍රීඩකයෙකු කතාවට එක්වෙමින් ජීවිතාරක්ෂක තරුණයින්ගෙන් ඉල්ලීමක් කළේය.

තම පළපුරුද්ද අනුව දිය නෑමට සුදුසුම ස්ථානයක් පෙන්වීම ජීවිතාරක්ෂකයින්ට අපහසු කාරණාවක් වූයේ නැත.

ජීවිතාරක්ෂක තරුණයින්ගෙන් ලද උපදෙස් අනුව එංගලන්ත ක්‍රීඩකයින් තිදෙනා මුහුදට බැසීමට සූදානම් වූහ.

නව පණක් ලද්දාක් මෙන් එංගලන්ත ක්‍රිකට් තුන් කට්ටුව මුහුදට බැස විනෝද වන්නට වූහ. උපරිම ආකාරයෙන් විනෝද වෙමින් සිටි එංගලන්ත ක්‍රීඩකයින් තිදෙනාට තමන් පිටුපසින් සිටින භයානක මාරයා ගැන කිසිදු අවබෝධයක් තිබුණේ නැත.

විශාල දිය රැළි කිහිපයක් පැමිණ තමන්ව සිය අණසකට යටත් කර ගන්නා බව ක්‍රිකට් තුන් කට්ටුව තේරුම් ගන්නා විට ප්‍රචණ්ඩ මුහුදු රැළි ඔවුන් තිදෙනා කලින් ස්නානය කරමින් සිටි තැනට බොහෝ ඈතටකට ඔවුන් ඇදගෙන ගොසින් තිබුණි.

කවදත් පිහිනීමට උපන් හපන්කම් දැක්වූ මැතිව් හොගාර්ඩ් ගොඩබිම බලා පිහිනීම ආරම්භ කළේය. තමා හිසට තම අතමය සෙවණැල්ල කියා වටහා ගත් මයිකල් වෝන්ද ලද අවසරයකින් කිට්ටුව තිබූ ගල් පරයක් මතට යාන්තම් බඩගා ගත්තේය.

පන්දු යවන්නන්ට උන්හිටිතැන් අමතක කරවූ සනත්

1996 ලෝක කුසලාන තරගාවලියේ දිල්ලියේ දී පැවති මූලික වටයේ එක් තරගයක දී මනෝජ් ප්‍රභාකර්ට…

නමුත් එංගලන්ත කණ්ඩායම වෙනුවෙන් එක් ටෙස්ට් තරඟයක් ක්‍රීඩා කර තිබූ ගැරෙත් බැටීගේ ඉරණම එතරම් සුන්දර වූයේ නැත. ප්‍රචණ්ඩ මුහුදු රැළි බැටීව තවදුරටත් මුහුද දෙසටම ඇදගෙන යන්නට විය. කෙතරම් උත්සහා කළ ද බැටීව ලෙහෙසියෙන් අතහරින්නට මුහුදු රැළි සූදානම් වූයේ නැත.

අසල වූ ගලක් මතට නැග ගන්නට බැටී අවසානයේ සමත් වූ නමුත් එහි පෘෂ්ඨය ඉතාම ලිස්සන සුළු බවකින් යුක්ත විය. මේ කාරණාව නිසාම ඊළඟට පැමිණි විශාල ජල ප්‍රහාරය සමඟ බැටී නැවතත් ඈත මුහුද දෙසටම විසි කර දැම්මේය.

මේ අතර ගල්පරයක් මතට නැග ගත් වෝන් මහ හඬින් මරළතෝනි දෙමින් ජීවිතාරක්ෂකයින්ගෙන් උදව් ඉල්ලුව ද බොහෝ ඈතින් ගොඩබිම සිටි කිසිවෙකුට ඒ හඬ ඇසුණේ නැත.

අවසානයේ හස්ත සංඥා මාර්ගයෙන් ජීවිතාරක්ෂකයින්ට තමන් සිටින තත්ත්වය සන්වේදනය කරන්නට මයිකල් වෝන් සමත් විය.

වහ වහාම ක්‍රියාත්මක වූ ජීවිතාරක්ෂකයින් මුහුද මැදට පිහිනා ගොස් එංගලන්ත ක්‍රීඩකයින් දෙදෙනා නිරුපද්‍රිතව ගොඩබිමට ගෙන එන්නට සමත් වූහ. මුහුද දෙසට පිහිනිමින් සිටි ජීවිතාරක්ෂක තරුණයින්ට අමාරුවෙන් ගොඩබිමට ඇදෙන මැතිව් හොගාර්ඩ් දැක ගැනීමට හැකි විය. ඔහුට තවදුරටත් කිසිදු ආපදාවක් නොමැති බව ජීවිතාරක්ෂකයින්ට පෙනී ගියේය.

“මට ඇත්තටම මහත් බියක් ඇති වුනා. වෝනි යාන්තමින් අප වැටී සිටි තත්ත්වය ජීවිතාරක්ෂකයින්ට සන්වේදනය කර ගත් නිසායි අපේ දිවි බේරුණේ.” පසුව බැටී පසුව ප්‍රකාශ කළේය.

“මේ දිනවල මුහුද හරිම සැරයි. ඒ වගේම ඔවුන් නැග සිටි ගල්පරය අසල මුහුද හරිම රළුයි.” ජීවිතාරක්ෂකයින් අතර සිටි තරුණයෙකු කීවේය.

අසරණ මොහොතක උදව්වට ආ අසල්වැසියෝ

1996 ලෝක කුසලානය ආරම්භ වීමට හරියටම සති දෙකකට කලින් කොළඹ පිහිටි ශ්‍රී ලංකා මහ බැංකු…

ත්‍රාසජනක චිත්‍රපටයක බිහිසුණු රූප රාමු පෙළක් සිහිගැන්වූ මෙම සිද්ධියේ දී එංගලන්ත ක්‍රීඩකයින් දෙදෙනාගේ දිවි බේරුණේ අභීතව ක්‍රියා කළ ජීවිතාරක්ෂක තරුණයින් කිහිප දෙනාට පිං සිදුවන්නටය.

අනෙක් ක්‍රීඩකයින් දෙදෙනා කෙසේ වෙතත් එවර ශ්‍රී ලංකාවට පැමිණි ගැරෙත් බැටී සෙසු ලෝකයාට ඒ වන විට සුපුරුදු නමක් නොවීය. නමුත් තම දෙවන ටෙස්ට් තරගය ආරම්භ වීමත් පෙර ලෝක ප්‍රසිද්ධ චරිතයක් වන්නට බැටීට හැකියාවක් තිබුණි. ඒ ක්‍රීඩාවෙන් නොව මුහුදේ ගිලී අවාසනාවන්ත ඉරණමකට මුහුණපෑවෙක් ලෙසිනි.

මෙලෙස දින දෙකකට පෙර ඉතා අසීරුවෙන් ජීවිතය බේරා ගත් ගැරෙත් බැටී ශ්‍රී ලංකාව සමඟ වූ ප්‍රථම ටෙස්ට් තරගයේ දී ඉහල දස්කම් දැක්වීමට ද සමත් විය. එම තරගය ජය පරාජයකින් තොරව අවසන් කරගැනීමට බැටීගෙන් ලැබුණු දායකත්වය අති විශාලය.

ගාල්ල ටෙස්ට් තරගය පුරාවට කඩුලු 05ක් දවා ගත් බැටී පිතිකරුවෙකු ලෙසත් සෑහෙන වේලාවක් කඩුල්ලේ රැඳී සිටිමින් ශ්‍රී ලාංකික ජයග්‍රහණය ප්‍රමාද කිරීමට කටයුතු කලේ දින කිහිපයකට පෙර තමා මුහුණ දුන් මාරාන්තික අත්දැකීම සම්පූර්ණයෙන්ම අමතක කරමිනි.

ඊට වසර කිහිපයකට පෙර මෙරට සංචාරය කළ සිම්බාබ්වේ ක්‍රිකට් කණ්ඩායමේ ඇලිස්ටෙයාර් කැම්බල් සහ හෙන්රි ඔලොන්ගාගේ ද ජීවිතය බේරුණේ ශ්‍රී ලාංකික ජීවිතාරක්ෂකයින් කිහිප දෙනෙකුගේ දක්ෂතාවයට පිං සිදුවන්නටය.

1996/97 මෙරට සංචාරයකට පැමිණි සිම්බාබ්වේ කණ්ඩායමේ ක්‍රීඩකයින් කිහිප දෙනෙකු ශ්‍රී ලංකාවේ දකුණු මුහුදු තීරයේ දිය නෑමට ගොස් දරුණු අනතුරකට මුහුණ දුන් අතර අදාළ ක්‍රීඩකයින් ද ජීවිතය බේරාගත්තේ ඉතාම අසීරුවෙන්ය.

>> තවත් විශේෂාංග ලිපි සඳහා පිවිසෙන්න <<